1 Pawluh la Silas ce Amphipolis luh la Apollonia luh zehtaw awla, Thessalonica luh a ym phawlu. Yn luh a Judah ha sinakok khy a myi. 2 Pawluh ce sinakok dukka voang theila y thumcian bawva cai theila Jahhnguːp hnguːp thum cyp talagamcaw umnaw theila yn ha dy y sumsa. 3 Messiah phehphaei khyam theila byt nyak kuːh thoo bya lawh ey tinyak khyang saksi ha dy susaih theila, "Nyangmi jyang kei susaih khyang Jesuh ce Messiah y thawn," y tinyak. 4 Aciya Judah ha ce jum awla Pawluh la Silas dy ym bawngei. Nuatpaw jummeitih Grik khyang juː ha la ming liantih hngutaw ha na khy ym jummei lu.

5 Ynbawlakhy Judah khyang juː ycya ha ce myangshing awla, tukjyh nyak duːn na kuːh seetih ha dyn theila luh dukka ym lingso shyak. Jason imm khy von thawn awla Pawluh la Silas khyang puː ha cenga lu haija ym suijok. 6 Ynbawlakhy yn ha na yn hyih ym hnguh kaw khiannyng Jason la ycya jummeitih ha imm duk kuːh lawthlei giah awla, luh a kuːh khyang lianzaw ha hngoaimaw va lu theila, "Myn somdek khuptua shyak tih ha tuh a myn luh a ym phawlu, 7 Jason na khy yn ha y imm dukka y dovei. Yn ha ce Jesuh tinyak khyang ycya syamphalyang pahuat myi tila hyau theila, Caesar samphalyang awng eyng khyaukhaw dyn joaw," tila ym paang. 8 Yn ym jyak hnguva, khyang puː la khyang lianzaw ha ce ym lungbawng awtlat nuva ym myijei. 9 Yn pynnyng Jason la yciya ha khyaammei khawh tangkaw bei shyak pynnyng ym tuːh bya.

10 Yn muː tyng ngyng jummeitih ha ce Pawluh la Silas Berea luh a ajyanga ym tuːh bya. Yn luh y hngih phaw hnguva, yn hyih ce Judah ha sinakok ka y hngih zet. 11 Berea luh shaw ha ce Thessalonia luh shaw ha thyaakka ym lungbawng poai jyng kuːmcei. Ikhiannyngma tijyngcee yn ha ce ciciat nyak kyng khyaukhaw dynnei theiawla Pawluh na saih khyang ahngoan, hngoan kaw ym hnguat ty tawk talagamcaw khuhnguːp shuːp phuat awla ym hngi. 12 Yn khiannyng Judah khyang juː panu ha ce jummei nyak ym tyakkei lu. Yn hnguva Greek hngutaw la putaw ha na khy jummei nyak ym tyakkei lu. 13 Ynbawlakhy Berea luh a Pawluh ce Nuatpaw khyaukhaw susaih khyang Thessalonica luh kuːh Judah khyang ha na ym jyak hnguva, yn luh a lyklu theiawla khyang puː ha lingso haija yn ha na ym thukthawn. 14 Yn hnguva jummeitih ha na Pawluh cee panglai khyamma ym thyaakei hlyi. Ynbawlakhy Silas la Timawte ce yn luh a ym myi hnguːt. 15 Pawluh thyaakei tih ha ce Athen luh cyp thyaakei theiawla Silas la Timawte hyih jyang ajyanga tymlu hai hngih a shin hnguːt khyang khyaukhaw lawh theila Berea luh cyp y hngih zet bya.

16 Pawluh ce Athen luh a Silas la Timawte zong hnguva, yn luh ce a luːpzaw ha eyng luih khyang hnguh theila y lung sanglai. 17 Yn khiannyng yn ce sinakok dukka myitih Judah khyang juː ha eyng kuːhthuːh Nuatpaw khuːhbia tih Griik khyang juː ha dy ym cijang. Yn pynnyng tukjyh nyak duːn na myitih khyang ha dy hnguːp hnguːi ym sumsa. 18 Ephicurean bawng ha la Stoic thiamvatih ciya ha khycee ynih dy huattyng sumsa khyaukhaw ym cahei thong.

Aciya ha na, "Myn khyau cypkyapei cee ibyang hyau hluː maa? tila ym hyau. Aciya ha naakhy, yn na ce pee ciya nuat ha bawng y hyau, tila ym hyau. Yn ha na ni bawva ym hyau khyang cee Pawluh na Jesuh bawng la byt nyakkuːh thoo bya* khyang sityang poai susaih khiannyng a thawn," tila ym hyau. 19 Yn pynnyng yn ha na Pawluh cee Areopaggus junga zehpui naw theila yn ha na, "Nyang cawkhyau khyang atha tih ha keimi na hnguat ty kym luː. 20 Yn ha ce keimi tawkka atha tih a thawn khiannyng ibyang hyau hluː ma tinyak khyang jyak ky kym luː," tila ym hyau. 21 (Yn hnguva Athen luh shaw ha la yn luh a myitih khyang cya shaw khiin ha tomti ce atha tih sityang poai ngeisyam khiannyng ikhy cai kawva acuːn ym summei.)

22 Yn khiannyng Pawluh ce Areopagus junga tung theila, "Athen luh shaw ha aw, nyangmi cee jummei nyak kyng ahlyi ja nym lungeijei khyang kei na ky hnguh. 23 Ikhiannyngma tijyngcee kei ce luh ka a ky zet hnguva nyangmi khuːhbia khyang nuat ha poai poai ky to hnguva, ‘y ming hnguat kaw khyang Nuatpaw tawk,’ tila jokkei tih nuat pyhimm pahuat ky hnguh lawh. Yn bawva nyangmi na nym hnguh hnguat kawva nym khuːhbia khyang yn nuat ha bawng tuh a kei na ky susaih. 24 ✝Nuatpaw na somdek la somdek huanna myitih tomti comoa theila huankhu la somdek Mawhpaw va y thawn khiannyng, khyang kut tyng shyak khyang biatimm ha eyng myi jo. 25 Yn bawva Nuatpaw ce ibyang khy y luːei kaw khiannyng, khyang kut tyng cawhcan khycee dynnei tih si jo. Yn Mawhpaw ce khyang tomti jyng syak hiyannyak la hianyak tomti khy bei nyn tih Nuatpaw y si. 26 Nuatpaw na khyang pahuat comoa theila yn khyang ngyng kuːhthuh khyang juː pungpau shyak theila somdek tomti jyng y phuaei shyak. Yn ha myih nyak acuːn ha la khujy ha khycee y hnguːtcap hnguːt. 27 Yn bawva y puhcai khyang ce khyang ha na Nuatpaw hngupi hngubah cyamhlyam suilei nyak khy tawk thawn. Ynbawlaakhy Nuatpaw ce mymi pahuat cim dy pannei tih si jo. 28 Mymi ce Nuatpaw khiannyng,

" ‘Shyak hiyang luːluk tih a my thawn,’

Nyangmi duk kuːh boihjei tuattih aciya ha na khy,

‘Keimi ha ce Nuatpaw zawnau ha kym si tila ym boihjei nyak.’

29 Yn bawva keimi ha ce Nuatpaw zawnau ha kym si khiannyng, Nuatpaw ce khyang tuat khyang ngyng lup com khyang hngaa sikawvyngcee hyaan, tangkaw, lung lyksah ha cyppei tijyang khindyang tuan jo paw. 30 Yn bawva pyih hnguːt tih acuːn nyng khyang ha na ym hnguh hnguat nyn kaw khyang Nuatpaw hnguat hnguːt kaw lakhy, tuh a cee aduːn tyng ngyng myitih tomti jyang jubaijei nyak lawh haija hnguishin hnguːt. 31 Ibawma tijyngcee Nuatpaw ce y pumhngaw na y yap hnguːt nyak khyang, khyang ngyng somdek ahngoan na cijang ngy tawk khuhnguːp hnguːp huat y hnguːtcap hnguːt. Yn mawhpaw khy byt nyak kyng kuːh ynih thoo bya shyak theila yn bawva thawnlu haija khyang tomti jyng saksi y shuduan pyn," tila y hyau.

32 Byt nyak kuːh thoo bya khyang bawng ym jyak hnguva, aciya ha na ce ym nuihiat jei, ynbawlakhy yciya ha na, "Yn bawng atha mokhuat nyang cengkuːh kym jyak hluː bya hyam," tila ym hyau. 33 Yn hnguva, Pawluh ce yn ha cengkuːh y zet bua. 34 Ycya khyang ha ce Pawluh lawnglyktih a thawn lu theila jummeitih a ym thawnlu. Yn ha duk kuːh Areopagus jung bawng Dionysius la Damaris mingnaw tih hngutaw vyng kuːhthuh ycya khyang ha khy ym pui.