1 Yn ym tuk hnguva Sawluh khy luː nawva y pui.

Yn hnguːp pyng Jerusalem ma myitih jummeitihpuːpaw ha phephaei lian khyam khiannyng ceepaw ha thua jummeitih ha khy Judah pe la Samaria pe tomti jyng ym zen jok giah.

2 Nuatpaw kyhtih khyang ha na Stephen khuːhei awla yn tawk a hlyija ym khangei.

3 ✝Ynbawlakhy Sawluh na jummeitihpuːpaw ha shimphah ey y phun. Imm tyng imm ma kha jok theila putawe la hngutaw tomti muan theila yn ha phehimm myng y tyak.

4 Ynbawva kajang tih ha na ym phaw nyak duːn na zet jok awla sityang poai ym susaih jok. 5 Philip ce Samaria pe ja myitih luh* a zet theila Khrist bawng yn ha eyng y susaih. 6 Khyangpuː na Philip susaih khyang ym jyak hnguva, yn duan khyang mikhnguh nyak ha ym hnguh hnguva, i y hyau ma tijyng y lawija lu awla poaija ym ngei. 7 Yn hnguva muikhaw see puhei khyang, khyang ha dukkuːh muikhaw see panukung tha eyng pang awla ym lyt. Kutkhu byttih la khuzektih ha khy ym kaangsa bya. 8 Yn khiannyng yn luh a hlyija lungjy nyak myi.

9 Yn luh a Simon mingnawtih khyang pahuat ce mikphie summei theila Samaria pe ja myitih khyang tomti na ym muːnnyak. Y pumhngaw la pumhngaw liantih pahuat tila caam, 10 theila bawi la sanglai khyang tomti na ynih poaija ngei awla, "Myn khyang ce aliantih tinyak khyang Nuatpaw cengkuːh phungan jyng a si," ym tii. 11 Yn ha na ynih ym lawnglyk ibawthawnnyngma tijyngcee yn na mikphie eyng yn ha acuːn byangveih kung muːnnyak khyang duan hnguːt khiannyng a si. 12 Ynbawlakhy Philip na susaih khyang Nuatpaw teengpe la Jesuh Khrist sityang poai ym ngei khiannyng jummei lutih putaw la hngutaw ha baptisma ym khyammei. 13 Simon pumhngaw na khy jum theila baptisma y khyammei. Philip zeh naw tomti ja y lyk jok, mikhnguh nyak la muːnnawseetih y hngu hnguva y muːnnyak.

14 Jerusalem luh a myitih ceepaw ha ce Samaria pe kuːh ha na Nuatpaw khyaukhaw ym dyynei khyang jyak hnguva, Pitar la Jawhan Samaria a ym tuh. 15 Yn ha ym phawlu hnguva, jummei thaatih ha na Muikhaw Cim dynnei jy tawk ym hngihminnei piat. 16 Ibawthawnnyngma tijyngcee yn ha ce Mawhpaw Jesuh ming ngyng baptisma khyammei pyntih a ym thawn; Muikhaw Cim ce u huanna khy phawlu hngyam kaw vyng si. 17 Yn pynnyng Pitar la Jawhan na yn ha huanna ym kut tyang hnguva, yn ha na Muikhaw Cim ym lawhei.

18 Ceepaw ha kut tyang pyttyng Muikhaw ym lawhei khyang Simon na hnguh hnguva, yn ceepaw hyih jyng tyangkaw bei 19 theila, "Myn cainyak nyn khyang kei jyng khy bei zawla kut ky tyang nyak tomti na Muikhaw Cim lawhei seh awh," y tinyak.

20 Pitar na yn ngyng, "Nuatpaw na kutpuan tyangkaw vyng hleih jy ny khindyang khiannyng, ny tyangkaw ce nyang dy cimpaknyak myi seh. 21 Ny lungbawng ce Nuatpaw hngoaimaw va hngoan kaw khiannyng nyang ce ni khuːt tyng pui lawh jo. 22 Yn khiannyng ny khyng kaw khyang jubaijei tila Mawhpaw cenga hngihminnei byih. Ynbaw hngucee ny lung seetih khindyang khyang ha hluːh hngu hluːh nyn nyy. 23 Ibawthawnnyngma tijyngcee nyang lung ce hnguːuːt bawva khaw khiannyng khyngtih kaw na kuːn khyang ky hnguh," y tinyak.

24 Simon na, "Nyangmi hyau hnguːt khyang ikhy kei huanna thawn kaw haija Mawhpaw cenga kei tawk hngihminnei piatmawh hngih," y tinyak.

25 Pitar la Jawhan ce Mawhpaw khyaukhaw susaih nyak la saksi y hngih khyam pynnyng, Jerusalem luh a zet bua awla Samaria naam ha a sityang poai y hngih saih jok.

26 Mawhpaw huankhu ceepaw na Philip pyng y hyau, "Zet, Jerusalem ma kuːhthuh Gaza luh lyamma kom nyak tyng a pyang* lyamma kom y tinyak." (Yn lyam ce khongkhuca lyam a si.)* 27 Yn khiannyng Philip thoo theila y zet. Ethiopia Syamphalyangnu Kandake khyanglian na thawn theila syamphalyangnu uːtzaw ha jung nga uptih Ethiopia pe shaw pahuat ce, khuːhbia haija Jerusalem luh a y lu. 28 Y imm lyaamma zet bya hnguva saagali dukka ngoa theila hngawpaw Isaiah cawuk y phuattei. 29 Yn hnguva Muikhaw na Philip pyng, "Yn saagali jyng lawijeitih a tymmeih," y tinyak. 30 Philip ce zet theila yn khyang na hngawpaw Isaiah cawuk phuattei khyang y jyak. Yn ngyng, "I ny phuat tinyak khyang ny jyakcawk kei," tila y hngi.

31 Yn na, "Kei jyng saihtih myi kawva ibaw ky jyakcawk ky ma?" y tinyak. Yn khiannyng Philip na y cenga pannei theila ynih ngoah pui nyak. 32 Yn ny phuat khyang cawlik ce:

"Yn ce tuk ky zehei khyang hluzaw bawva zehei khyammei theila,

yn hluzaw ce a hngua vyihtih mawva jaadik zawva a myijei.

Yn ce ynih moung khy gala jo.

33 Yn ce lungniammei nyak y tyakkei hnguva, ynih talatih a cijang joaw.

Ynih syak ce somdek kyng syt khyam lawh khiannyng,

u na ynih juːjawng hyau nyn ny ma?"

34 Yn khyanglian na Philip pyng, "hngawpaw Isaiah na i bawng y hyau ma? Y pumhngaw bawng ngei? Yciya pahuat pahuat bawng ngei?" tila y hngi. 35 Yn hnguva Philip na yn cawlik duk kuːh Jesuh sityang poai ynih eyng saih jy y phun. 36 Yn bawva lyam myng zeh hnguva, tuii myi nyak duːn phaw hngucee khyang lianzaw na, "Do, mynija tuii myi. Kei baptisma lovei jy kawkattih bawng i myi ma?" tila y hngi. 37 *

38 Yn hnguva yn na saagali duːm haija y hyau. Yn pynnyng yn khyanglian dy tuii dukka kom theila Philip na baptisma y bei. 39 Tuii jyng kuːh lyt lu bua hnguva, Philip ce Mawhpaw muikhaw na zehei theila, khyang lianzaw na ynih hngu ti jo. Ynbawlaakhy yn ce jyjo nyak kyng lyam y zet. 40 Philip ce, Azotus luh a lyttei theila yn luh eyng kuːhthuh Caesarea luh cyp luh tomti voang theila sityang poai y susaih.