1 Hnguːp huat ta, khusun cuːn pathum hngihminnei cuːn nyng Pitar la Jawhan biatimm ma y hngih zet. 2 Yn hnguva hngynnu duk kuːhthuh khucek tih khyang pahuat ce ym khynnlu, yn ce biatimm ma voangtih ha cenga y hngiei jy tawk, khyang ha na yn poaijei tih tijyng ym hyau khyang biatimm kyttung cenga hnguːp tyng ym tyak. 3 Pitar la Jawhan biatimm ma voang ngy khyang y hnguh hnguva, yn hyih jyng tyangkaw y hngiei. 4 Pitar la Jawhan na y hngih to sih. Pitar na, "Kei hngih to," y tinyak. 5 Yn khiannyng yn hyih cengkuːh juːhuat huat y lawh ey tijyng uːtnaw theila yn hyih y to sih. 6 Pitar na, "Kei cengnga hngaa, hyaan myi jo, ynbawlakhy nyang nyng ky bei jy khyang ce ni jyng ky tyakei. Yn ce Nazareth luh zaw Jesuh Khrit ming ngyng thoo tila zet," y tinyak. 7 Yn pynnyng kheplyam kut tyng ynih thooh theila y khu la khumik khy caang bya hlyi. 8 Yn hnguva yn ce tung theila y donglyam theila zet ty y phun. Yn pynnyng yn ce biatimm ma Nuatpaw khuːhbia vy tawk yn ha dy huattyng y zet. 9 Khyang ha na zet theila Nuatpaw khuːhbia khyang ynih ym hnguh hnguva, 10 yn ce biatimm poaijei tih kytung nga ngoa theila hngiei tih khyang tinyak khyang yn ha na ym hnguat, pynnyng yn ha na ynih eyng ibaw thawn ma tinyak khyang muːnnaw awla tha ym lawhei.

11 Yn ha na Pitar la Jawhan pyang theila myijei hnguva, khyang panu na muːnnaw awla Solomon immtyng ha tijyng ym hyau khyang duːn na zun lu awla ym dynei. 12 Pitar na yn hnguh hnguva, yn ha eyng y hyau, "Isreal khyang juː ha vo, Ithawnnyng nym muːnnyak ma. Ithawnnyng keimi nym to vei ma? Ni kym cai khyang kym phungan hngaw tijyng nym uːtnyakei sikawvyngcee ni khyang khyngnyak kyng kym zet shyak tila nym tawvei? 13 Abraham Nuatpaw, Isaac Nuatpaw, la Jakob Nuatpaw, mymi shyakai Nuatpaw na y maapaw Jesuh ce phunggan nyng y lian shyak pyn. Ynih tuk ky tijyng nym yap, pynnyngcee nyangmi na ynih muan theila hluːh ey tijyng cijang tih Pilat hngoaimaw va ynih dyn jozawaw. 14 ✝Nyangmi na Cim theila Puːnpok tih dynnei kawva khyang tu tih pahuat hluːh ey jyng nym bih. 15 Nyangmi na shyak mawhpaw nym tuk, ynbawlakhy Nuatpaw na bytnyak kuːh ynih thooh bua. Keimi ce yn tawk saksi ha khyam si. 16 Jesuh ming ngyng y jummei khiannyng, myn khyang kaang bya khyang nym hnguh. Ni ce Jesuh ming la y jummeinyak na ynih eyng kangsanyak bei tijyng yn nyangmi tomti na nym hnguh.

17 "Tuh a, benau tih ha aw, nyangmi khyanglian ha bawva, nym jyakcawk kaw khiannyng nym cai khyang ky hnguat. 18 Ynbawlakhy Khrit sanglai cyhei khyam lawh ey tinyak khyang, hngawpaw ha tomti jyng Nuatpaw na hyau hnguːt khyang nibawva kuːm lu. 19 Yn khiannyng Nuatpaw na nyangmi pet hluːh ey tawk jubaijei theila yn cengnga lu vyt, yn hngucee Mawhpawe cengkuːh Muikhaw jungtha lu vy khiannyng, 20 nyangmi tawkka tyakjyei khyang Mawhpaw Jesuh Khrit y tuːhlu. 21 Ahym ma kuːhthuh somdek huanna ynih hngawpaw cim ha eyng Nuatpaw setzaw hnguːt baw tynga, a kuːmkuːt atha hleijei jy cuːn cyp yn Mawhpaw ce huankhu va y myi jy. 22 Mosee na khy, ‘Nyang Mawhpaw Nuatpaw na nyangmi benau duk kuːh kei baw myitih* nyangmi tawk hngawpaw pahuat podyang shyak ky. Ynih hyau khyang tomti nyangmi na nym lyklyam lawh ey. 23 Yn hngawpaw khyau ngei tih kaw ukhy siseh Nuatpawaw khyang juː duk kuːh ark theila simpak y khyam lawh ey.’ 24 Yn khiannyng hngawpaw Samuel kuːhthuh, susaih tih hngawpaw ha na myn khuhnguːp ym saih hnguːt. 25 Nyangmi shyakai ha dy Nuatpaw tyamthi tyak hnguːt khyang hngawpaw zawenau ha nym si. Abraham cenga y hyau hnguːt, ‘Nyang juːjawng khiannyng somdek kyng myi tih khyang ha tomti khunkhyi ym lawh ey.’ 26 Nuatpaw na nyangmi pahuat cuːm saitnyak dyyi theila nyangmi khunkhyi bei jy tawk ynih maapaw podyang shyak theila yn nyangmi cenga acuːkka y tuːhlu," tila y hyau.