1 Yn hnguva Agrippa myang na Pawluh eyng, "Nyang bawng ny pumhngaw na ny hyau nyn," y tinyak. Pawluh na kuːt tau theila hyaubua khyang cee:

2 "Agrippa syamphalyang na, kei jyng Judah ha na a coihngiammei khyang ha eyng cyppei theila nyang cenga tuhhnguːp hyau bya ey khyang ce khunkhyi pahuat tijyng kei na ky uːtnyak. 3 Ibawthawnnyngma tijyngcee nyang ce Judah ha thumcian la cahei thawng khyang ha eyng poaija hnguat tih a ny thawn. Yn khiannyng kei shyakkei bua khyang lungshau duːppei theila ngeishyam piat ty ky khawhei.

4 "Kei ce acuːk kyng ky pumhngaw myi hnguːt nyak kyng khy si seh, yn pynnyng Jerusalem luh a khy si seh, ky dikzaw hnguva kuːhthuh ibawva puhcai myi hnguːt khyang Judah khyang juː tomti na ym hnguat giah. 5 ✝Kei ce keimi jummei nyak kyng lyklyammy khyang ciatmuat tih bawng Pharisee bawng pahuat ta myi hnguːt khyang, yn ha na ym hnguat khyang diev pyn. Yn ha na ym lung nyng luː nyak myi jyngcee saksi ym khyam nyn. 6 Nuatpaw na keimi shyakai ha eyng bei hnguːt khyang setzaw khindyang uːmnyak khiannyng, tuh a kei ce ciceih ky khyammei lawh. 7 Keimi juːjawng khulaihngih cee Nuatpaw hnguːp la juan khuːhbia theila, yn setzaw bawva kuːmcei nyak ky ym zong uːmmei. Agrippa syamphalyang vo, kei ce yn bawva zongei khiannyng Judah ha a coihngiammei khyang ky khyammei lawh. 8 Nuatpaw na byttih ha y thoo shyak pyn hngucee, ibawthawnyng nyangmi na jum nyn kaw khyang tijyng nym uːtnyak ma?

9 ✝"Kei pumhngaw na khy Nazareth luh zawpaw Jesuh ming ngyng tuat nyn hawh phehphaei jy tila ky uːtnyak hnguːt. 10 Yn khiannyng Jerusalem luh eyng khy ynbaw tyng nga ky cai hnguːt. Kei ce jahenpaw lian ha uːtyang ngyng jummeitih ha panukung phehimm kyak ce khawmcyang la yn ha byt ty cijang khyam lawh hngu na ky puijei hnguːt. 11 Khuːhbia nyak sinakok ka khy yn ha diev kawva pet bei theila, Nuatpaw ym siatnyak khyang tha eyng ky cai shyak hnguːt. Yn cee khawm cyang la yn ha huanna dekkhuːt hnguva lungtyn hngudyam theila aciya pe luh ha cyp yn ha tym jok theinga ky phehphaei hnguːt.

12 "Ynbawva kei ce jahenpaw lian uːtyang ha summei theila Damascus luh a ky zet. 13 Agrippa syamphalyang vo, khusun nyng ynbawva lyaam myng ky zet hnguva, huankhu kuːh angtih ava ce kei la ky bawngpui ha kika a anglu khyang ky hnguh. 14 Keimi tomti dek kyng gu giah theila Hebre be ja kei na thai ky jyak, ‘Sawluh, Sawluh, ibawthawnyng kei ny phehphaei maa? a humhat ny shot jyngcee nyang na jyng ny nehei jy,’ tila hyau khyang thai ky jyak. 15 Yn hnguva kei na, ‘Mawhpaw aw, Nyang u ma?’ tila ky hngi. ‘Mawhpaw na, kei ce nyang phehphaei khyang Jesuh ky si. 16 Nyang ce thoo theila ny khu vyng tung. Kei ce nyang hngoaimawva podyang lu khyang ce nyang ce kei* maapaw va thawn haija ky yap pyn. Ynbaw ce ja nyang hnguh hnguːt khyang la nyang ngyng kei suduan ny khyang bawng ha aciya ha eyng saksi ny khyammei lawh ey. 17 Kei na Judah kuːt duk kuːh khy si seh, khyang juː ciya kuːt duk kuːh khy si seh, kei na nyang ky hluːh ey. Ynpynnyng nyang yn ha cenga ky tuh ey. 18 Yn ha ahung ngyng kuːh ava lyaamma khy si seh, khawkhawng phungan duk kuːh Nuatpaw cenga hleijei lu haija nyang ce yn ha mik ha ny hngawn lawh ey. Ynbaw hnguva jyng yn ha ce ym pet ha tawk hluːh nyak khyammei lawh ey. Yn pynnyng ce kei jummei khiannyng Nuatpaw na cimcaih shyak khyang, khyang duːn na ym pui lawh ey,’ tila y hyau.

19 "Yn khiannyng Agrippa syamphalyang na, kei ce huankhu kuːh ky lawh khyang yn lunghnguːn ce lyklyam kawva myi jonga. 20 ✝Acuːk kyng Damascus luh shaw haa, yn pynnyng Jerusalem luh shaw ha, Judah pe shaw ha la khyang juː ciya ha eyng, nyangmi ce jubaijei theila Nuatpaw cenga nym lubya lawh ey. Yn pynnyng jubaijei nyak kyng cyppei tih puhcai khyang nym puhcai lawh ey, tila ky susaih hnguːt. 21 Yn bawva ky susaih khiannyng ycya Judah khyang ha na kei biatimm dukka muan theila kei tukky ym khiangvoi hnguːt. 22 Ynbawlakhy kei ce Nuatpaw puijei nyak ky khyam lawh khiannyng, hnguːp tyng, tungoa theila khyang hluːng la niam ha cenga saksi ky khyammei. Yn bawva ky susaih hnguva, hngawpaw ha la Mosee susaih hnguːt khyang samawlyam ma thawnlu hai ha jyang ky susaih. 23 ✝Yn ky susaih hnguːt bawva Messiah ce phehphaei khyam lawh ey. Yn pynnyng ce byttih ha duk kyng acuːk hiyang theila thoo bya khyang Judah khyang juː ha la khyang ciya juː ha cenga ava tih khyaukhaw jaw shyak theila ky susaih," tila y hyau bya.

24 Yn bawva Pawluh na hyau bya hnguva Festus myang na, "Pawluh ny gungoak pyn, ny cawkshyang ngei khyang caw na nyang a gungoak shyak," tila thai jyau vyng y pang.

25 Yn hnguva, "Pawluh na, a hlyija poaitih Festus myang aw, kei gungoak jonga, hngoan theila tuannei tih khyaukhaw jyang ky hyau. 26 Myn byang bawng ha Agrippa syamphalyang na y hnguat khiannyng, nyang hngoaimawva kei na kyh kawva ky hyau. Yn bawng ha ce jaadik duːn nyng thawn hnguːt tih bawng si kaw khiannyng, nyang na hnguat kawva myi jo tijyng kei na ky uːtnyak. 27 Agrippa syamphalyang aw, hngawpaw ha ny jummei? Nyang na ny jum khyang kei na ky hnguat," tila y hyau.

28 Yn hnguva Agrippa syamphalyang na Pawluh eyng, "Nyang na acuːn toi zawva kei Khritjian pahuat ta thawn haija ny hliang ngei nyn ny tijyng ny tawvei," tila y hyau.

29 Pawluh na, "Acuːn toi sikawvyngcee shau va khy thawn seh, nyang ce khawmcyang la tuhhnguːp kei khyaukhaw ngeitih tomti ce myn thijoii khyammei thua, kei baw ce ja ym thawnlu vy tawk, Nuatpaw cenga ky hngihminnei," tila y shyakkei bya.

30 Yn hnguva Agrippa syamphalyang ce thoo theila, luh uptih la y pihia Barnis pyng kuːhthuh yn ha dy ym ngoa hah tih tomti khy ym thoo giah. 31 Yn ha tomti ym zet bya pynnyng pahuat la pahuat ym hyau vy ym phun, "Myn khyang y byt tuan nyak, sikawvyngcee phehimm kyak khyam tuan khyang ikhy cai hnguːt jo," tila ym hyau. 32 Agrippa myang na, "Myn khyang ce Caesar syamphalyang cenga adyih khyam hnguːt kawvyng ce hluːh nyn tila Festus myang nyng," y hyau.