1 Yn cuːn nyng syamphalyang Herod* na aciya jummeitihpuːpaw kuːh khyang ciya ha muan theila phephaei jy y cijang. 2 Yn na Jawhan be James, cicom myng y tuk. 3 Yn ce Judah khyang ha dukka thalawhei khyang y hnguh hnguva, yn na Pitar khycee muanny y cai. Yn ce heenpui kawtih phe pyi cuːn nyng a si. 4 Ynih muan pynnyng phehimm dukka khaw theila, to haija jaabawng pahli jyng bawng ngeitih bawng pahli cenga y yap. Pahtyak pyi cyng pynnyng Pitar cee khyang ha hngoaimawva lu theila hngica ey tawk Herod na y cijang. 5 Pitar ce phehimm dukka khaw hnguva, jummeitihpuːpaw cee ynih tawk Nuatpaw cenga tha eyng ym hngihminnei piat.

6 Herod na Pitar pumthua a hluːh bua hnguːp phawlu hluan na amuː a, Pitar ce jaapuː hyih kikawvyng y ip, thijooi pahngih eyng ym khawn, yn pynnyng zongtih ha khy phehimm kyt tyng ym zong. 7 Cacatnawva Mawhpaw huankhu ceepaw ce polu theila phehim dukka ava anglu. Y pa paa theila, "A jyanga thoo," y tinyak. Yn hnguva thijoii ha ce Pitar kut tyng kuːh galak giah. 8 Ynpynnyng huankhu ceepaw na, "Ny khuphawtyap la phangshau ha vuveih tinaw theila Pitar na hyau bawva y cai." Ynpynnyng huankhu ceepaw na Pitar eyng, "Ny phang shau vuveih tila kei lawnglykluh," y tinyak. 9 Pitar ce phehimm duk kuːh lyt theila hngulawng y lykkei. Ynbawlaakhy huankhu ceepaw cai khyang ahngoan na thawnlu muː tinyak khyang, hnguat kawva lunghnguːn jyang ky hnguh lawh tila y uːtnyak. 10 Yn ha na pahuat nyak la pahngih nyak zongtih hngyih pahtyak pynnyng luh kyt cenga ym phawlu. Yn shawt ce yn ha tawk a luː bawva hngawng ngei theila, yn ha khy cee pumtua ym lyt. Yn ha laam pahuat tyng ym zet hnguva, cacatnawva huankhu ceepaw na ynih zehtyak.

11 Yn hnguva Pitar ce y pumhngaw sathih lawh theila, "Mawhpaw na y huankhu ceepaw tuhlu theila Herod kut tyng kuːh la Judah khyang ha tintaw khyang ngyng si seh kei y lyt shyak pyn tinyak khyang tuh a kei na ahngoan na ky hnguat pyn," y tii.

12 Ynih na yn y hnguat la hnguat Jawhan Marka nu Marih imm ma y zet. Ynija khyang panukung dynnei awla hngihminnei nyak ym cai. 13 Pitar na shawt y kok hnguva, Rhoda mingnaw tih maanu pahuat ce shawt hngawng haija y lu. 14 Yn na Pitar thai jyak hnguva y hnguat. Yn khiannyng jyjo theila shawt hngawng kawva a dukka zon theila shawt hngoaimawva, "Pitar tungei," y tinyak. 15 Yn ha na yn nyng, "Ny ngungawk," ym tinyak. Yn hngutaw na si tengteng tijyang y hyau, yn ha na, "Yn ce Pitar huankhu ceepaw jyang thawn ny," ym tinyak.

16 Ynbawlakhy Pitar na shawt y kok shoi khiannyng yn ha na shawt ym hngawn hnguva ynih ym hnguh hngucee ym muːnnyak. 17 Pitar na yn ha eyng lingso kawva myi haija kut duan theila Mawhpaw na yn phehimm duk kuːh ibawva lyt nyak bei tinyak khyang yn ha eyng y saih. Ynpynnyng yn na, "James la aciya benau la cinau ha eyng yn bawng hyau bua yt," tinaw theila aciya duːn na y zehtyak.

18 Khuthuai hnguva Pitar ibawva thawn hnguːt khyang jaapuː ha kikawvyng ym sawsolelet giah. 19 Herod na Pitar sui lakhy hnguh kaw hnguva, zongtih ha hngi theila byt lawh ey tijyng uːtyang y bei.

Yn pynnyng Herod ce Judah pe ja kuːhthuh Caesarea pe cyp zet theila yn luh a y myijei.

20 Yn hnguva Herod Agrippa ce Tyre luh shaw ha la Sidon luh shaw ha eyng y lungtyn. Yn khiannyng yn ha ce huattyng kawhei awla Blastus mingnawtih myang khutbitih dyn theila, jadyam nyak ym bih. Ibawthawnnyngma tijyngcee yn ha pe ce eiawk ky tawk syamphalyang pe ym uːmnyak khiannyng a si.

21 Herod na y hnguːn hnguːp pyng, myang suishyak vuvei theila, y nuanimm duːn nyng ngoa theila khyang ha eyng khyau y hyau. 22 Khyang ha na, "Ni ce khyang thai si jo, nuatpaw pahuat thai jyng!" tila ym pang. 23 Yn hnguva Herod na Nuatpaw phunggan tyihvei kaw khiannyng, Mawhpaw huankhu ceepaw na saisikung pet bei theila, yn ce kyat ei theila y byt.

24 Ynbawlakhy Nuatpaw tala khyaukhaw ce pungpau jok theila jummeitih ha ym konglu.

25 Barnabas la Sawluh na y hngih khuːtbi khyang ha cyng pynnyng Jawhan Marka ce yn ha dy lupui naw theila, Jerusalem luh kuːh* ym lu bya.