1 Aciya khyang juː ha na khy Nuatpaw khyaukhaw ym dynnei khyang Judah pe ja myitih ceepaw ha la jummeitih ha na ym jyak. 2 Yn khiannyng Pitar ce Jerusalem luh lyamma y zet hnguva, ynih eyng vuːnnmonghleih khyammeitih jummeitih ha na, 3 "Nyang ce vuːnmonghleih tih kaw khyang ha imm dukka zet tila yn ha dy ny eiou hah," ym tinyak. 4 Yn hnguva Pitar na yn bawng tomti yn ha eyng acuːk kyng kuːhthuh saih khyang cee,

5 "Kei Joppa luh a hngihminnei theila ky myi hnguva, jyjo nyak myi theila lunghnguːn pahuat ky hnguh. Huankhu kuːh giv pahli jyng muan theila hiah lian bawva myitih kei myi nawva kikhiang nga a hawnlu. 6 Kei na dukka ky do hnguva somdek huanna kutkhu pahli mawh hiyangsei tih, a saw eitih hyangsei haa, zetjoktih hiyangsei ha la hngaw ming kuːm ky hnguh. 7 Yn pynnyng thaii pahuat ky jyak bua thuːh, ‘Pitar, thoo, tu tila ei,’ y tii. 8 Ynbawlakhy kei na, ‘Mawhpaw vo, thawn nyn jo! Kei ce butih la cimtih kaw ha ihngukhy ei jonga,’ y tinyak. 9 Ynbawlaakhy huankhu kuːh a hngih nyak thaii ce, ‘Nuatpaw na cim shyak khyang buːtih tila hyau kaw,’ y tii. 10 Yn bawva mok thum thawn pynnyng, yn ha tomti ce huankhu lyamma y zehei bua. 11 Yn hnguva Caesarea luh kuːh kei cenga tuhlu khyang, khyang pathum kei myih* nyak imm ma ym phawlu pyn. 12 Yn pynnyng Muikhaw na kei jyng sunshyang kawva yn ha dy lykkei jy y hyau. Yn benau shawk khy ce kei dy zet hah theila, yn khyang imm ma kym voang. 13 Yn hnguva Cornelius na huankhu ceepaw ce yn imm dukka ibawva polu khyang, ‘Joppa luh a khyang pahuat tuh theila Pitar tinyak khyang Simon pannei byih. 14 Yn ce nyang la nyang immlawng lilovei khyammei jy khyang tala khyaukhaw y lu vy,’ tinyak khyang keimi jyng y hyau bya. 15 Kei na khyau ky phun hnguva, Muikhaw Cim ce acuːk hnguva keimi huanna komlu bawva, yn ha huanna khy komlu. 16 ✝Yn pynnyng Mawhpaw na hyau hnguːt khyang ce ‘Jawhan na tuii jyng baptisma bei lakhy, nyangmi ce Muikhaw Cim myng baptisma nym khyammei jy,’ tinyak khyang khyaukhaw ky khindyang lubya. 17 Yn khiannyng Mawhpaw Jesuh Khrit mymi na my jum hnguva Nuatpaw na mymi jyng bei jy khyang kutpuan ce, yn ha eyng khy y bei khiannyng kei ce u tijyng Nuatpaw ky kawkat nynny ma?" tila y hyau.

18 Yn bawng ha yn ha na ym jyak hnguva jadyam theila, "Ni bawva hyau hngucee, Nuatpaw na khyang juː ciya ha eyng hnguːnom syak hiyang ngy tawk jubaijei nyak y bei pyn," tila Nuatpaw ym khuːhbia.

19 ✝Stephen ym tuk pynnyng thawnlu tih phehphaei khiannyng kalaktih ha ce Phoenicia pee, Cyprus pe la Antiawk luh cyp phaw jok theila Judah khyang ha eyng sityang ym saih jok. 20 Yn ha dukkuːh aciya ha ce Cyprus phai la Cyrene luh khyangjuː ciya* pui awla Antiawk luh lyaamma zet awla Griik be hyautih khyang ha eyng Mawhpaw Jesuh sityang poai bawng ym susaih. 21 Mawhpaw phungan ce yn ha dy myi hah khiannyng khyang panukung ce jummei lu awla Mawhpaw cenga ym hleijei lu.

22 Jerusalem ma myitih jummeitihpuːpaw ha na yn sityang jaw theila, Antiawk ka Barnabas ym tuh. 23 Barnabas ce phawlu theila Nuatpaw khunkhyi y hnguh hnguva, jyjo awla yn ha tomti ciatmuat nyak lungbawng ngyng Mawhpaw ym uːmnyak kyng myi shoijy tawk thabei hnguːt. 24 Barnabas ce khyang poai y si, yn cee Muikhaw Cim la jummeinyak kyng kuːmtih y si. Yn khiannyng khyang panukung ce Mawhpaw lyamma ym hleijei lu.

25 Yn pynnyng Barnabas ce Sawluh suijei haija Tarsus lyamma zet 26 theila, yn y hnguh hnguva, Antiawk luh a y lupui nyak. Yn luh a Barnabas la Sawluh ce jummeitihpuːpaw ha dy kommei theila khyang panukung y cawkhyau. Jummeitih ha ce Antiawk luh a Khritjan tijyang cuːkka ming sui ym khyammei lawh.

27 Yn cuːn na aciya hngawpaw ha ce Jerusalem luh kuːh Antiawk luh a ym komlu. 28 ✝Yn ha duk kuːh pahuat Agapus mingnawtih thoo theila, somdek tomti ja khujua khyang thawn ny tila Muikhaw duan nyak kyng y saih. (Yn ce Claudius syamphalyang up hnguva athawn.) 29 Yn khiannyng jummeitih ha na ym tuat nyn zaw bawva, Judah pe ja myitih jummeitih ha phui nyak ym san ny ym cijang. 30 Jummeitih ha na Barnabas la Sawluh lawng nga jummeitihpuːpaw lianzang ha eyng kuːtpuan ym shan.