1 Pitar la Jawhan khyang ha cenga susaih hnguva, biatimm zongtih lianzaw, Jahhenpaw* ha la Saddusee ha ce yn hyih cenga ym lu. 2 Ceepaw hyih na Jesuh byt nyak kuːh thoo bya khyang, khyang ha eyng y susaih khiannyng, yn ha ce ym lungtyn pah. 3 Yn ha na Pitar la Jawhan ym muan, yn ce muː lyaamma thawn khiannyng atha hnguːp cyp yn hyih thong dukka ym tyak. 4 Ynbawlaakhy yn khyaukhaw jaw tih ha jummei lu awla putaw pyt thawng pahngaw byang ym pung lu.

5 Uptih ha ce atha hnguːp pyng, Jerusalem luh a tala cawkhyautih la lianzang tih ha dy ym dynneilu. 6 Jahhenpaw Lian Annas khy ynija y myi, ynpynnyng Caiaphas, Jawhan, Alexander la Jahhenpaw Lian immlawng ha khy ym myi. 7 Yn ha na Pitar la Jawhan yn ha cenga lu theiawla yn ha na, "Ibyang phungan sikawvyngcee ibyang ming ngyng myn nym cai hnguːt ma?" tila ym hngi.

8 Yn hnguva Pitar ce Muikhaw Cim myng luih khiannyng yn ce, "Uptih la khyang lianzang ha eyng, 9 Khuzek tih khyang pahuat kaangsa shyak khyang, yn khyang ngyng ibawva khyng tih kungnga thawn ma tila, tuhhnguːp keimi hnginyak khyammei jyngcee, 10 Nazareth luh zaw Jesuh Khrit ming ngyng tila nyangmi tomti la Isreal khyang tomti na hnguat byih jyt. Yn Jesuh ce nyangmi na tangtyng huanna tu lakhy byt nyak kuːh Nuatpaw na thoo shyak bya khyang y si. 11 Jesuh ce

" ‘Immshaw tih ha na summei hluː kaw khyang lung ce

luːei duːtih luung nga thawnlu.’

12 Yn khiannyng liloovei nyak ce u vyngkhy myi jo, yn Mawhpaw ming tua huankhu dyanga khyang zaw vyng lilovei nyak myi jo," y tinyak.

13 Pitar la Jawhan na kyh kawva thaabei khyang ym hnguh hnguva cawtuat tih hyih si jo, khyang lala jyng thawn theila, yn hyih puhcai khyang ym hnguh hnguva ym muːnnyak. Ni khyang hyih ce Jesuh bawngpui jyng tila ym hnguattei. 14 Ynbawlakhy yn khyang kaangsa byatih ce Pitar la Jawhan dy tung hah khyang ym hnguh hnguva kuːhthuh, yn ha na ikhy hyau nyn joaw. 15 Yn khiannyng yn ha na yn hyih kongci kuːh syt awla pahuat la pahuat ym lutlaijei. 16 "Myn khyang hyih ibawva my cai jy ma? tila ym hngi. Myn hyih Jerusalem ma myi tih ha eyng muːnnawseetih ha ym duan, yn ce mymi na zah nyn jo paw. 17 Ynbawlakhy khyang ha cenga pungpau jok kaw haija, mymi na yn ming u vyng khy saih kaw haija yn hyih jyng sathih my bei lawh ey," ym tii.

18 Yn khiannyng atha yn hyih pannei awla Jesuh ming ngyng hyau vy la cawk khy kaw khyang cai lawh tilang jozaw tila ym kawkat. 19 Ynbawlakhy Pitar la Jawhan na, "Nuatpaw khyaukhaw ngei kawva nyangmi khyaukhaw ngei khyang ce Nuatpaw hngoaimawva hngoan nei, hngoan jo vei tinyak khyang nyangmi na khuːnkhawh byih jyt. 20 Kei hngih hnguh hnguːt la jyak hnguːt khyang kei hngih na hyau kawva myi nyn joaw nga," y hngih tiinyak. 21 Yn ha na atha sathih bei theila yn hyih ym zet shyak. Ibawthawnnyngma tijyngcee Khyang tomti na thawn hnguːt tih tawk Nuatpaw ym khuːhbia khiannyng, yn ha na ibawva pet bei jy khyang khuːnkawh nyn joaw. 22 Yn muːnnawseetih khiannyng kangsanyak lawh byatih ce y khukum phikip tua myi hngyh.

23 Pitar la Jawhan ym hluː bya pynnyng ym khyang ha cenga lu bya theila, jahenpaw lian la khyanglian ha na yn hyih jyng ym hyau khyang ha ym saih bya. 24 Yn ym jyak hnguva, Nuatpaw cenga huattyng hngihminnei nyak thaii ym hluːh, "Mawhpaw aw," nyang ce huankhu, somdek la panglai kuːhthuh, ynnija myih a kuːmkuːt comtih ny si. 25 Kym paw David maapaw mong summei tila Muikhaw Cim myng ny hyau hnguːt khyang ce,

" ‘Ibawthawnnyng Khyang juː cya ha ym lungtyn ma;

ibawthawnnyng khyang ha na igiahtihkaw ym tintaw ma?

26 Somdek syamphalyang ha la uptih ha huattyng thoo theila

Mawhpaw la

Khrist ym sunnei pui nyak,’ tila y hyau hnguːt.

27 ✝Yn khiannyng myn luh a Herod la Pontius Pilat huattyng khawmmei theila Khyangjuː cya la Isreal khyang juː na ny hngyahei khyang la cimcaih khyang ny maapaw Jesuh huattyng dynnei awla ahngoan kawva ym sunnei puinyak hnguːt. 28 Yn ha na nyang phungan la khuːnkawh hnguːt bawva thawnlu haija yn bawva ym cai hnguːt. 29 Yn khiannyng Mawhpaw aw, yn ha kyhei khyang la nyang khyaukhaw hyau vom nyak ny ma ha eyng bei piatmawh. 30 Kaangsa ey tawk ny kut tau hnguva cimcaihtih ny maapaw Jesuh ming ngyng muːnnyak khyang ha la mikhnguh nyak ha khy duan piatmawh byih," tila ym hngihminnei.

31 Ym hngihminnei pynnyng, ym khawmmei hnguːt nyak duːn ce luːluːk theila, yn ha tomti Muikhaw Cim myng kum giah theila Nuatpaw khyaukhaw kyh kawva ym susaih.

32 ✝Jummeitih tomti ce lung huat la ku huattyng ym myi. Ym tyakkei khyang uːtzaw ha u na khy ym kuːhngaw tii kawva, ym tyakkei khyang tomti ym summei hah. 33 Mawhpaw Jesuh thoo bya khyang ceepaw ha na phungan lian nyng saksi khyammei awla Nuatpaw khunkhyi lian ha khy yn ha huanna kumlu. 34 Yn ha dukka sanglai tih pahuat khy myi jo. Ibawthawnnyngma tijyngcee ym imm, loo tawvei tih ha na ym tyakkei khyang tomti jy awla ym lawh khyang tyangkaw lu theila, 35 ceepaw ha cenga ym tyak, ynpynnyng yn ha na luːei tih u vyng khy si seh ym phyih giah.

36 Yn hnguva yn ha dukka Josep mingnaw tih pahuat y myi. Yn ce ceepaw ha na Barnabas tila ym hyau. Yn ming ce, "buipem tih" zawpaw tihyau. Yn ce Levi juː pahuat y si theila Cyprus khongphai zaw khy y si. 37 Barnabas na y tyakkei khyang deklai jy theila y lawh khyang tyangkaw lu theila ceepaw ha kuːt tyng y yap.