1 Ananias mingnaw tih khyang pahuat ce, ynih pihia Saphira dy uːtzaw a voang y hngih jyh. 2 Y pihia dy saphawthu theila jyh lawh khyang ngyng kuːh tyangkaw avoang pumhngaw tawk y cuːmmei bua, avoang jyng lu theila ceepaw ha kuːt tyng y yap. 3 Pitar na, "Ananias, nyang na ibawthawnnyng khawkhawng ngyng ny lungbawng bei theila, Muikhaw Cim ny hnguhyam naw tila ny dek jyh phu tyangkaw avoang ny pumhngaw tawkka ny cuːmmei jei? 4 Yn dek ce ny jyh kawva myi jyngcee nyang kuːh si jo vei? Yn jyh kawva ny tyak kyng khy nyang kuːh si jo vei? Yn dek ny jyh pynnyng ny lawh khyang tyangkaw ce ny luː bawva ny cai nyn kaw vei? Ynbawlakhy ny lung dukka ni khyngtih kaw ibawthawnnyng ny khindyang ma? Nyang na keimi pyt ny hnguhyam nyak si jo, Nuatpaw ny hnguhyam nyak," y tinyak. 5 Ananias na yn khyaukhaw y jyak hnguva, hngyng kyng theila y byt hlyi. Yn thawntih jaw tih tomti na dekkuːt hnguva ym kyh. 6 Yn hnguva compyang ha lu theiawla, ynih jawk suishyak kyng ym hlom theiawla, ynih kyynnei awla ym kuːhei.

7 Khusun pathum diiev hnguva y pihia y lu, i thawn hnguːt tinyak khyang hnguat kawva y voang lu. 8 Yn hnguva Pitar na, "Kei jyng hyaucam, Ananias la nyang na yn lai ni hawh eyng ny hngih jyh ei," y tinyak hnguva,

"Yih, ni hawh eyng jyng ky hngih jyh hnguːt," y tinyak.

9 Pitar na, "Ibawthawnnyng Mawhpaw Muikhaw hnguhyam nyak khy ny hngih cijang hnguːt ma. Nyang putaw khuːheitih ha khy kyttung cyp ym phawlu pyn, yn ha na nyang khy ym kyynnei jy," y tinyak. 10 Yn pynnyng yn khy ce y khuco va gulau theila y byt. Yn pynnyng compyang khyang ha dukka lu awla y jawk ym hnguh hnguva, kyynnei awla y putaw ka a yn ym kuːh. 11 Yn khiannyng jummeitihpuːpaw ha la ycya tomti na yn thawn tih kawng ym jyak hnguva dekkuːt hnguva ym kyh.

12 Ceepaw ha na khyang ha eyng mikhnguh nyak la muːnnawseetih ym duan. Yn pynnyng jummeitih tomti ha Solomon immtyng nga huattyng ym myi dynneilu giah. 13 Pahuat khy yn ha dy bawngei vom joaw. Ynbawlakhy khyang ha na yn ha ym tyihvei nyak. 14 Ynbawlaakhy Mawhpaw jummeitih hngutaw la putawe panukung ha khy pung tuː la ym pung lu. 15 Khyang ha na nehnyaang myitih ha lyaam ka a lu awla giyam la phawhiih eyng ym hngyn. Yn ce Pitar zet hnguva aciya khyang ha huanna ynih hia na kyaknaw haija a si. 16 Jerusalem luh kika a myih luh ha kuːh khyang puː ha dynnei theila kaangsatih kaw ha la muikhaw see pynnei khyamtih ha lu awla, yn nehnyaang mawh tomti ce ym kaang bya.

17 Yn hnguva Jahhenpaw Lian la ynih bawngpui ja thawntih Saddusee bawng ha ce myangsing lung ym tyakkei. 18 Yn ha na ceepaw ha muan awla thawng dukka ym tyak. 19 Ynbawlakhy ajuan na Mawhpaw huankhu hlizawe ha na thawng shawt hngawng awla yn ha pumtua a y zehpui nyak. 20 Yn pynnyng yn ha eyng, "Zet theila biatimm mawva tung theila khyang tomti jyng hyang nyak khyaukhaw saih byih hngih," y tinyak. 21 Khuthuai lu hnguva ym hyau hnguːt bawtyng nga, yn ha biatimm ma voang awla khyang ha eyng ym cawk.

Jahhenpaw Lian la ynih bawngpoi phawlu hnguva, Isreal khyang zang ha kongci ja huattyng pan theila ceepaw ha phehimm kuːh lawei haija zongtih ha ym tuh.

22 Ynbawlakhy yn ha ce phehimm ma khyanglian phaw hnguva, ynijaa yn ha hngu joaw. Yn khiannyng yn ha zet bua awla ym saihjei bya. 23 Yn hnguva, "Phehimm ce khaaei theila zongtih ha khy kyttung cenga ym tung ngei khyang kym hnguh, ynbawlakhy shawt kym hngawn hnguva a dukka keimi na pahuat khy hngu joaw nga," ym tinyak. 24 Biatimm zongtih la jahenpaw lian ha na yn khyaukhaw ym jyak hnguva ym lucing awla ibaw thawnlu vy ma tila ym muːnnyak. 25 Yn pynnyng khyang pahuat lu theila, "To, phehimm ma ny kyak khyang, khyang hyih na biatimm ma tung theila khyang ha eyng y hngih cawkhyau," y tinyak. 26 Yn khiannyng biatimm zongtih khyang la ynih jaapuː ha na ceepaw ha ym lu. Ynbawlakhy khyang ha na yn ha lung nyng ym khong ngy kyh khiannyng yn ha na uːtyang nyng cai joaw.

27 Ceepaw ha lu theiawla kongci mawva tung shyak awla Jahhenpaw Lian ha na ym hngii, 28 ✝"Keimi na nyangmi jyng yn ming ngyng cawk kaw haija miang miang ym hyau, nyangmi na Jerusalem luh tomti ja nym cawk. Yn khyang thii tawk keimi jyng sengei tijyng nyangmi na pet nym tyang hluː," y tinyak.

29 Pitar la ceepaw ciya ha na, "Khyang khyaukhaw thyakka Nuatpaw khyaukhaw my lyk lawh ey. 30 Mymi shyakai ha Nuatpaw na tangtyng huanna nyangmi tuk hnguːt khyang Jesuh y thoo bya shyak. 31 Isreal khyang ha jubaijei shyak theila yn ha pet hluːh ey tawk Nuatpaw na y lianzaw la Liloveitih a y pumhngaw khep lyaamma y juːhshon pyn. 32 Mymi ha ce yn bawng tawk saksi ha ym si. Yn lyklyam tih ha ce Nuatpaw bei hnguːt khyang Muikhaw Cim khycee saksi ja thawn," ym tinyak.

33 Yn ym jyak hnguva, ym lungtyn theila ceepaw ha ym tukky ym luː. 34 Ynbawlakhy Gamaliel mingnawtih Pharisee pahuat, khyang tomti na kyhkhiat khyang tala cawktih ce kongci dukka tung theila yn khyang ha eyng pumtua lyt y tinyak. 35 Yn pynnyng yn na kongci ja, "Isreal khyang ha aw, ni khyang ha ibaw nym cai lawh ey tinyak khyang sathih tawvei byih jyt. 36 Acuːk hngu khy Theudas polu theila y pumhngaw na pumhngaw liantih pahuat thawn tijyng hyau theila khyang phaw pahli byang na ynih lawng ym lyk. Ynbawlakhy yn tuk khyam lawh pynnyng, y lawnglyk ha khy kajang theila ikhy myi tijo. 37 Ynih pynnyng, khyang ming kuːm nyak kuah hnguva Galilee kuːh Judah ce polu theila y lawnglyk haija khyang ha y hlawiei. Yn khycee tuk khyammei lawh khiannyng, y lawnglyk tomti ha khy ym kajang giah. 38 Ynkhiannyng nyangmi jyng ky hyau hluː khyang ce, ni khyang ha ym pythngaw taw vyt, yn ha zet seh. Khyang hnguːn khyang sikawvyngcee lupcap khyang hngucee yn cimpak ce jy. 39 Ynbawlakhy Nuatpaw cengkuːh hngucee, myn khyang ha nyangmi na kawkat nyn jo, nyangmi ce Nuatpaw luːlyktih bawva pyiuvoih," y tinyak.

Yn ha na ynih hyau khyang ym dynnei. 40 Ceepaw ha pannei awla ym shawh. Jesuh ming ngyng susaih kaw haija kawkat theila yn ha ym tuːh bya. 41 Yn hnguva Jesuh ming ngyng hawhei khyam tuan tih tijyng, Nuatpaw na hnguattei khiannyng jyjo theila kongci kuːh ym zet bya. 42 Yn pynnyng biatimm duk la imm tuː imm ma hnguːp huat khy cawkhyau khyang duːm kawva Jesuh Khrist sityang poai ym susaih.