1 Yesu panaa aleawokhaa ne vahemba vakwe Kapelanaumu, alowokha nkelo ya lweje Yolodani vapetaa kho nse ya Yudea. Okhoo madale minki ga vantu alegikhongan'yaa khanke paolongolo wakwe, nanoyo avaligaa kete venaa angile kete venaa alekhanogaja.

2 Apenee Mafalisayo alevamopetela no khomogema, vamowolya, "Mbi, njaanga ja Musa kegombaa mogwisha khomolekha molijakwe?" 3 Yesu avawelaa, "Mbi, njaanga ya Musa alekepalaa mbi pachanya ya eloo?"

4 Nanevo vamowelaa, "Musa aleagombaa mogwisha khomwandekela talatasi molijakwe ya khwilekha."

5 Yesu avawelaa, "Musa aleavandekela njaanga eyoo kho nguno ya okhaku wa meoyo jenyu. 6 Ila mpuma khowombwa kho liwelelo, ‘Matuunda aleamowomba mogwisha palomwi no mokhiima.’ 7 Gechoo mogwisha alamoleka daada yakwe no maye wakwe, nanoyo alaawa palomwi no molijakwe, 8 ne ewa vawele valaawa mowele gomwii. Gechoo, ewa valaawa nkha vawele khanke, ila muntu yomwii. 9 Gechoo, kenaa alechasanjwa no Matuunda, khotopo muntu khokelegonkhan'yaa."

10 Panaa alevingela khanke mo nyuumba, vahemba vakhwe alevamowolyaa Yesu pachanya ya mpola eyoo. 11 Yesu avawelaa, "Yunaa khomolekha molijakwe no khotoola yoonge, khaawa khonojaa osencha khwa khotolekha khapanga kwa molijakwe. 12 No mokhiima yunaa khomolekhaa mogwisha no khotoolwa no yoonge, nanoyo khaawa khonojaa osencha."

13 Vantu angile vakhomoletela Yesu vana vado avatolelee mikhono ili Matuunda avanojele masoga, ila vahemba vakwe alevawakhakela vantu evoo. 14 Yesu panaa aleawona gechoo, aleasimbaa no khovawelaa, "Valekhagi vana vado viije khwaane ne mokhavagilyee, kho nguno wami wa Matuunda olepwale kho nguno ya vantu vanaa vapwale kete vana ewa. 15 Khapanga nkhovawela, muntu yeyensi yunaa akhakhopokela wami wa Matuunda kete mwana modo, khotopo iije ingele omoo." 16 Apenee Yesu aleavasola vana no khovawawola avatolela mekhono yakwe pachanya ya mitwe jawe, ili Matuunda avanojele masoga.

17 Yesu panaa alekhowokhaa, muntu yomwi aleamokembela lowelo, amotungamela, amowolya, "Molaangi mosoga, nojee mbi ili nane nkhowole khopokela opanga wa nsiko jensi?"

18 Yesu amowela, "Mbi nkonyeeta mosoga?" Khotopo yunaa mosoga, ila topo Matuunda alemwii. 19 Aleendelela khomoweela, ojemanjile njaanga ja Matuunda, "Okhawolage, okhanoje osencha, okhiiwe, okhapale opepi, okhapepe, vatogagwe daada yakhoo no maye wakhoo."

20 Muntu oyoo amowela Yesu, "Molaangi, njaanga jensi najevambaga mpuma olomyana waane." 21 Yesu aleamokunaa no khomotogwaa, ila amowelaa, "Wapongokelagwa ne kento kemwi topo. Petaa ogolyee vento vyensi venaa otite ne mpia ejoo ovapelee vapeena, nagwe amba witolelaja pachanya pa Matuunda, epoo apenee wiije ondonde." 22 Muntu oyoo panaa aleategela egoo, aleasayaa, awokhaa oko khosayaa, kho nguno aleatite nsawo nyinki. 23 Yesu aleakunaa kho lwande jensi, avawela vahemba vakwe, "Amba vikhamu modugo vanaa vatite nsawo khwingela kho wami wa Matuunda!" 24 Vahemba vakwe alevakhumya modugo kho mpola jakwe, ila Yesu aleavawela khanke, "Vanaane, kunaa venaa vikhamu kho vanaa vatite nsawo khwingela mo wami wa Matuunda! 25 A vipelu kho ndimwana yunaa khwetwaa ngamia khokelela mwidoli la shindano, khokela muntu yunaa atite nsawo khwingela mo wami wa Matuunda." 26 Vahemba vakwe alevakhumya modugo no khwandya khwiwolya venee kho venee, "Gechoo, ananuu yunaa alanokolwa?"

27 Yesu avadololela miso avawela, "Mpola eye khwa vantu ikhakhowolekha, ila khwa Matuunda gensi gakhokhowolekha."

28 Petulo amowelaa, "Kunaa, khwalekhaga vento vyensi khwakholondaga ogwegwe."

29 Yesu apalaa, "Khapanga nkhovawela, muntu yeyensi yunaa khalekha nyuumba ao vadogo va kegwisha ao vadogo va kekhiima ao maye ao daada yakwe ao vana ao megoonda kho nguno yaane no kho nguno ya Mpola Nsoga, 30 alapokela mala igana kho ituungo ele la seji. Alapokela nyoomba ao vadogo va kegwisha ao vadogo va kekhiima ao maye ao vana ao megoonda khanke valagaya no kho ituungo lenaa liijile valapokela wome wa nsiko jensi. 31 Vamwandyo valaawa wa vamodugo ne vamodugo valaawa va mwandyo."

32 Yesu ne vahemba vakwe angile vapwale mo njela khopeta Yelusalehemu. Yesu alekhovalongola vahemba vakwe, vahemba alevakhumya ila vantu vanaa alevakhovaloonda alevogopa. Yesu avasolaa khanke evoo vahemba vakwe ikomi ne vawele avakenkha khompelo, andyaa khovaweela ganaa agamopumela. 33 Yesu avawelaa, "Tegelelii! Khopetile Yelusalemu, no okhoo Mwana wa Muntu alalekhwa kho vapumya matambekho valaala ne valaangi va njaanga ja Musa. Vamositacha no khomokenkha kho vantu vanaa nkha Vayahudi, nanevo valamotengemekha awolagwe, 34 nanewo valamobyeeda Yesu, valamotyela matye, valamofwemba ne menyepo ja ntila, apenee valamowolaga. Ila nsiko ya otato alafufokha."

35 Apenee Yakhobo no Yohana vana va zebedayo, aleviija khwakwe no khomowelaa, "Molaangi, khokhopooga okhonojele kento kenaa akhokholomba."

36 Yesu avawolyaa, "Mokhopooga mbanojele chanuu?"

37 Vamoweela, "Khogombelee khwikhale nagwee, yomwi kho lwande gwakhoo wa mukege no yoonge mo lwande wa molyelo panaa olaikhala pa kegoda chakhoo cha wami wakhoo olaala."

38 Ila Yesu avawelaa, "Onywenywee mokhamanya kento kenaa mokholomba. Mbi, amokhowola khogaya kete venaa ndiija ngaye onene? Mbi amokhowola khowolagwa kete venaa ndiija mbolagwe onene?"

39 Vamowela, "Akhokhowola."

Yesu avawelaa, "Khapanga molakhowola, magayo ganaa ndiija ngaye ne ncha yenaa ndawolagwa ayenee nanyu molawolagwa. 40 Ila onene ntokhola olaala wa khosagola ananuu alikhala pa mokhono gwane gwa molyelo ao gwa mukege. Matuunda mwenee amwenee yunaa amanyile ananuu alikhala kho lwande lwa molyelo ne mukege kho evoo vanaa aleavasagolaga."

41 Evoo vahemba vaange ikomi panaa alevategela egoo, alevandyaa khovakilwaa Yakhobo no Yohana. 42 Gechoo, Yesu avetaa, avawela, "Momanyile kete evoo vanaa vakhohewelwa kete vami va liwelelo vakhovimelela vantu vawe kho ngulu, ne valaala evoo vakhowa pachanya ya vantu vawe. 43 Ila khwenyu ekhawe gechoo, ila omwene yunaa khopogaa awee molalaa pakhate yenyu, kholomwaa awee motomami wenyu. 44 Muntu yeyensi yunaa khopogaa khovalongolya vaange, awee motomami wa vensi. 45 Kho nguno ninga Mwana wa Muntu angile akhiija kho liwelelo ili vantu vamotomekele, ila khovatomekela vantu no khopumya wome wakwe ili khovakhombola vantu."

46 Apenee vapikha Yeliko. Yesu panaa alekhowokhaa ne vahemba vakwe kho nse eyoo palomwii ne idale ikolo la vantu, alevamopikha muntu yomwi mtuluu lina lakwe Batimayo Mwana wa Timayo, aleikhalagaa pampelo ne njela, kholombalombaa. 47 Panaa aleategela kete a Yesu wa kho Nazaleti amwenee alekhokela epoo, Batimayo aleandyaa khopaala kho lolii nkolo, "Yesu Mwana wa Daudi, mbonelee losongo."

48 Vantu vinki alevamokhakela ili apombule. Ila omwenee aleakelelya khopaala kho lolii nkolo, "Mwana wa Daudi mbonele losongo."

49 Yesu aleimelela, apalaa, "Momwete."

Apenee vamweta mtuluu oyoo, vamowela, "Ipelee mooyo, imelelaa, Yesu khokhwetaa."

50 Nanoyo aleajutaa mwenda gwakwe khotale, Batimayo imelelaa nyango, amopetelaa Yesu.

51 Yesu amowolya, "Khopogaa nkhonojele chanuu?"

Mtuluu oyoo amowela, "Molaangi, nkhopooga nkhowole khowona."

52 Yesu amowelaa, "Petaa khokhaye, kho nguno khogoomba khwako khwakhopon'yajaa."

Apaponye mtuluu oyoo, andyaa khowona, amolondaa Yesu monjela.