1 Yesu aleendelelaa khovaweela, "Khapanga nkovaweela, khole vantu vaange apapanye vanaa valalekha khocha panaa valaawa vakhale khowona wami wa Matuunda panaa olaawa wijile khwa ngulu."

2 Nsiko sita panaa alejakela, Yesu aleavasolaa Petulo no Yakhobo no Yohana apetaa nanevo mpakha kho ketonda ketale khonaa alevaleemwi topo. Okhoo, wigelo wakwe Yesu alewagalokha, 3 myenda jakwe alejang'alala jawa myelo modugo, ninga mokhanji yeyensi angile khotopo akhowole khojenoja jeng'alale gechoo. 4 Apenee vahemba vatato alevamowona Eliya no Musa vakhopaala no Yesu. 5 Petulo amowelaa Yesu, "Molaangi, amba visoga mbe osweswee khwikhale epa. Khogombelee khojeenge vidindiga vetato, kemwii amba chakhoo, kemwii cha Musa ne keenge amba cha Eliya." 6 Petulo aleapalaa gechoo, kho nguno omwene ne vahemba vayakwe alevingelwa no wowa kho nguno alevakhamanya la khopaala. 7 Apenee alelapumeela ilunde lavagubekha ne lolii lwategelekha khopuma mwilunde aleloo ekhopalaa, "Oyo amwene Mwanane yunaa mbotogilwe, motegelelaji!" 8 Apaponye vahemba evoo alevakuuna kho lwande jensi, ila alevakhamowona muntu yuunge yunaa alepalomwi nanevo, ila Yesu aleemwi.

9 Panaa alevakhotelemokha pa ketonda, Yesu aleavagilyaa vakhiije vamowele muntu yeyensi mpola jenaa alevajiwona, mpakha panaa Mwana wa Muntu alafufokha khopuma khwa vachi.

10 Vahemba evoo alevakhamowela muntu yeyensi kenaa alechanojekha kho ketonda, ila evenee alevakhopalana venee kho venee, Yesu aleatite emaana kee panaa alekhopalelaa khofwa no khofufokha khopuma khwa vachi. 11 Apenee vahemba evoo alevamowolyaa Yesu, "Kho kee valaangi va njaanga ja Musa vakhopaala Eliya mukuuni wa Matuunda khopogiwa iije taali?"

12 Yesu avawelaa, avyenee, "Eliya molooti wa Matuunda akhopogiwa iije taali, nanoyo amwenee alatula visoga mpola jensi. Ila kho kee seji, yandekhagwa kho Maandekho ga Matuunda, gakhopaala, Mwana wa Muntu alagaya vikhamu no khositwaa? 13 Ila nkovaweela, Eliya mokuuni wa Matuunda ijagaa, nanevo alevamonojelaa venaa alevakhopooga, kete venaa mandekho ga Matuunda venaa gakhopaala khomougela mwenee."

14 Panaa alevawapikhela vahemba evoo vaange, alevalewona idale ikolo la vantu epoo lavapilimaga. Valaangi vamoonga va njaanga ja Musa alevakhwiwolya nanevo. 15 Apaponye vantu evoo panaa alevamowona Yesu, alevakhumya modugo. Apenee alevamokembelela no khomolamochaa. 16 Yesu avawolyaa, "Alemokhwiwolya kee nanevo?"

17 Muntu yomwi pi idale eloo la vantu aleamowelaa, "Molaangi, namoletaga mwanane kwakhoo, atite idemi lenaa alelamonoja awee ne kameme. 18 Idemi eloo panaa lekhomwingela, lekhomogwishaa panse no khomonoja andye khopumwa ne ipulo momolomo no khoshaa mino no mowele gwakwe gokhokhala. Alenavalomba vahemba vakhoo vamopumyee idemi eloo, ila alevakhonya."

19 Yesu avawelaa, "Onywee olele wonaa mokhogoomba! Anikhala nanywi mpakha nalee? Ambankunelelya mpakha nalee? Moleeti molomyana oyoo khwaane." 20 Apenee alevamokenkha molomyana oyoo pa Yesu.

Idemi eloo panaa alelamowona Yesu, apaponye molomyana oyoo aleandya khotetema mudugo, gechoo aleagwaa panse no khwandya khobilingita no khopumwa ne ipulo momolomo. 21 Yesu amowolya daada yakwe no mwana oyoo, "Magayo ega gamwandajaa mpuma nale?"

Nanoyo amowelaa, "Aleandyaa geeke mpuma okeke wakwe. 22 Kho ituungo itale idemi alelekhomogwishela momoto no momeje, ili lemowolage. Gechoo, mbe nokhowolaa, khonoja kento khowonele losongo no khotwalya!"

23 Yesu amowela, "Kho kee khopaala, mbe nokhowolaa? Mpola jensi jekhowolekha khwa muntu yunaa khogombaa." 24 Daada yakwe no molomyana oyoo aleajomaa no khopaala, "Nkhogoomba! Ila khogoomba khwane khokhakwela, nkholoomba onyalye."

25 Yesu panaa aleawona idale la vantu lekhongelekha nyango pa olongolo wakwe, alealekhakela idemi, "Ogwegwe idemi, yunaa wamonoja mwana oyoo akhakhowole khotegeela no khopaala, nkhonkoweela opume khwa mwana oyo ninga okhiije omwingele khanke!"

26 Apenee idemi eloo lakhowa madoolo, lamonoja molomyana oyoo ateteme mudogo, apenee Mwana oyoo aleapuma kete afwaga, ninga vantu vaange alevapaala, "Afwagaa." 27 Ila Yesu amowamba mokhono oyoo molomyana, amwalya khonyenyokha apenee amonyanyola no imelela.

28 Yesu panaa aleingela mo nyoomba, vahemba vakwe alevamowolya panaa alevalemwii, "Kho kee osweswe alekhwakhonya khomopumyaa idemi eloo?"

29 Yesu avawela, "Idemi la geeke khotopo lepume, ila topo khwa kholoomba."

30 Yesu ne vahemba vakwe alevawookha epo, vakelela kho nse ya Galilaya. Ila Yesu aleakhatogwa vantu wamanye khonaa alevapwale, 31 kho nguno alekhovaliga vahemba vakwe. Aleavawela, "Mwana wa Muntu alagwelwa no khokenkwa khwa vantu vanaa valamowolaga, ila nsiko ya otato alafufokha." 32 Ila vahemba alevakhamanya kenaa alekhokunaa, nanevo alevingelwa no wowa khomowolya khowugela ncha yakwe.

33 Panaa egoo alegakela Yesu palomwi ne vahemba vakwe alevapikha Kapelanaumu. Panaa alevingela mokhate ya nyoomba yenaa Yesu alekhwikha, Yesu avawolya, "Alemokhwisitela chanuu mo njela?" 34 Ila vahemba vakwe alevapombula kho nguno alevakhwisitela ananuu yunaa atite olaala khokela vensi. 35 Yesu ikhalaa panse, avakhongan'ya palomwi vahemba ikomi ne vawele, avawelaa, "Mbe muntu khopogaa awee wa olongolo amanyage khaawa panyuma ya vantu motomami wa vensi." 36 Apenee amosolaa mwana modo, amwimelekha pakhate yawe. Apenee amowawola no khovawela, 37 "Muntu yeyensi yunaa khomopokhela mwana kete oyo kho lina lyane, khaawa amopokelaga nenee, yunaa khompokela onenee, akhampokela onenee topo, ila khaawa amopokelagaa yunaa aleantoma."

38 Yohana amowela, "Molaangi, alekhwamowine muntu yomwi khopumya idemi kho lina lakho, naswi khwagema khomogilya kho nguno atapoya palomwi naswi."

39 Ila Yesu apalaa, "Mokhamugilyee kho nguno khotopo muntu yeyensi yunaa khonoja otuntumu kho linaa lyane ne apaponye andye khopaala mabe pachanya yaane. 40 Kho nguno yunaa akhakhotopengelekhaa, apwale palomwi naswi. 41 Muntu yeyensi yunaa khavapela kekhombe cha meje ga khong'weela kho laane, kho nguno onywenywe mole vantu va Kilisto, khapanga alapelwa mfinga."

42 Mbe muntu alamonoja yomwi wa vana evoo vanojee mabe, anga amba visoga mbe muntu oyo anga khatungelwa loala lwa khosheela monkingo yakwe no khojutelwaa mwilambo. 43 Mbe mokhono gwakhoo agokhokenkelya khonojaa mabe, owodomole. Kho nguno amba visoga khwingela no mokhono gomwii mo opanga nsiko jensi, khokela khowaa ne mekhono jewele no khwingela jehanamu mo moto gonaa gokhalimaga. 44 No omoo, magunyo gakhwe gakhafwaga no moto gwakwe gokhalimaga. 45 Mbe, mogolo gwakhoo agokhokenkelya khonojaa mabe, owodomole. Kho nguno amba visoga khwingela no mogolo gomwii mo opanga wa nsiko jensi, khokela khowaa ne megolo jewele no khojutwa jehanamu mo moto gonaa gokhalimaga nsiko jensi. 46 No omoo, magunyo gakwe gakhafwaga no moto gwakwe gokhalimaga. 47 Mbe liso lakho lemwii lekhokenkelye khonojaa mabe, lekumpolee. Kho nguno amba visoga khwingela mo wami wa Matuunda ne liso lemwii topo, khokela khowaa ne miso gawele no khojutwa jehanamu mo moto gonaa gokhalimaga kho nsiko jensi. 48 No omoo, magunyo gakwe gakhafwaga no moto gwakwe gokhalimaga.

49 "Matuunda alamokelelya kela muntu kho magayo ganaa gakhwipyana no moto kete vantu venaa vakhopakha molenge kho nyama panaa vakhowa vakhale khotuula mo moto."

50 Molenge a nsoga, ila mbe ipwelyee ononu wakwe, khotola kee ili etuvyee khanke ononu wakhwe?

"Gechoo, ikhalagi no molenge mo meoyo jenyu no khwikhala visoga nywenywe kho nywenywe."