1 Kho nsiko ejoo idale lya vantu alelikhongan'ya khanke, ne alevatokhola endya, apenee Yesu aleavetaa vahemba vakwe avawelaa, 2 "Nkhovawonela losongo vantu ewa kho nguno vawaaga nane kho nsiko jetato ne vatokhola ninga endya. 3 Mbe mbaleke vapete khokhaye yawe ne njala valaagwa weesa monjela, kho nguno vamoonga vawe vapumaga khotale mudugo." 4 Kho gechoo vahemba vakwe alevamowolya, "Epa khole khwipolu, mbi, akhopata khwenii mikate ja khovikhotya vantu vensi ewa?"

5 Yesu avawolya, "Motite mikate jiinga?"

Vamowela, "Khotite mikate saba."

6 Apenee avapogaa vantu vikhale panse. Asolaa eyoo mikate saba, amosongelaa Matuunda, amegan'yaa no khovapeela vahemba vakwe vawagawele vantu, nanevo vawagawela vantu. 7 Alevatite ne tonshe todoo todo vatiiti. Yesu amosongela Matuunda kho nguno ya nshe ejoo, avapelaa vahemba vakwe, vawagawele vantu. 8 Vantu alevalyaa no khwikota, apenee alevakhongan'yaa masigelo endya vijolya vikhapu saba. 9 Vantu vanaa alevalyaa angile kete vantu elufu jinee, apenee Yesu avadayaa vapetage, 10 nanoyo aleingela mwipogo palomwi ne vahemba vakwe, valowokha ilambo no khopeta lwande ja Dalimanuta.

11 Okhoo, Mafalisayo vamoonga aleviija khwa Yesu no khwandyaa khomowolyaa Yesu. Ili vamogeme, alevamopooga anojee lomekho khopuma khochanya khwa Matuunda. 12 Yesu aleasayaa momooyo gwakwe no khwayola, apalaa, "Kho kee oleli owo okhopooga lomekho? Khapanga nkhovaweela oleli owo olalekha khopelwaa lomekho yeyensi."

13 Apenee Yesu aleavalekhaa, atantaa khanke mwipogo no khwandya mosenjo gwa khopeta kho nkelo ya ilambo.

14 Vahemba alevewagwaa khokepola mikate ya khokwelaa, alevatite mokate gomwi topo mwipogo. 15 Yesu avakhakelaa no khovaweela, "Mwiyangalelage ne malaangi ga Mafalisayo no Helode kete amila venaa kesasochaa otuu wa mikate."

16 Apenee vahemba vakwe alevandyaa khopalana venee kho venee, "Yesu khopalaa gechoo kho nguno khotokhola mikate ya khokweela."

17 Yesu aleatembolaa ganaa angile vakhopalana, avawolya, "Kho kee mokopalana kete motokhola mikate? Mbi, mokhale mommanye ninga khontembola? Mbi, masala genyu gakhale gadendagwa? 18 Mbi, motite miso ila mokhamokhowona? Motite matwi ila mokhamokhotegeela? Mbi, mokhakombokha? 19 Ituungo lenaa alenamegan'yaa mikate ejoo jitaano no khovapeela vantu elufu jetaano, mbi, masigelo ganaa alemwakhongan'yaa, alemwijolyaa vekhapu viinga?"

Vamoweela, "Alekhwijolyaa vekhapu ikomi ne vewele."

20 "Ne panaa alenaimegan'ya mikate saba no khovapeela vantu elufu jinee, alemwakhongan'yaa vekhapu viinga vya masigelo ga endya?"

Vamoweela, "Alekhwakhongan'yaa vekhapu saba."

21 Apenee avawolya, "Mbi, mokhale momanye kete onene ananuu?"

22 Yesu aleapikhaa Betisaida palomwi ne vahemba vakwe. Okhoo vantu alevamoletela mtulu, vamoloomba Yesu amopalye. 23 Apenee Yesu amowambaa mokhono mtulu oyoo, amopumya panji ya ihala. Yesu aleamotyela matye mo miso no khomotolela mekhono mo miso ga mtulu, amowolyaa, "Mbi, owine kento chechensi?"

24 Mtulu oyoo akunaa, "Apalaa nkhovawona vantu, ila vakhwigela kete mapeke ganaa gakhogeenda."

25 Apenee Yesu aleamotolelaa khanke mikhono mo miso. Apenee miso gakwe gadigokha ne ngulu jakwe ja khowona alejamotuwela, andyaa khowona vento vyensi visoga. 26 Apenee Yesu amodayaa, amowela apete khokhayakwe, apalaa, "Okhiije otuuwe khanke kho ihala!"

27 Apenee Yesu ne vahemba vakwe alevendelela no mosenjo gwa khopeta kho mahala ga pepi ne Kaisalia Filipi. Panaa alevalemonjela, Yesu aleavawolya vahemba vakwe, "Mbi, vantu vakhopaala onene ananuu?"

28 Vamoweela, "Vaange vakhopala ogwegwe a Yohana Mubatiji, vaange vakhopaala Elia mokuuni wa Matuunda ne vaange vakhopaala yomwi wawe wa vakuuni va Matuunda."

29 Nanoyo avawolya, "Mbi, nanyu mokhopaala onene ananuu?" Petulo amowelaa, "Ogwegwe amwene Kilisto yunaa otomilwe no Matuunda."

30 Ila Yesu aleavagilyaa vakhiije vamowele muntu yeyensi mpola jakwe.

31 Apenee Yesu aleandyaa khovaliga vahemba vakwe, "Mwana wa Muntu alakelela magayo minki no khositelwa ne valaala va Vayahudi ne valaala va vapumya matambekho va Matuunda ne valaangi va njaanga ja Musa ne lazima awolagwe, ila panaa nsiko jetato jelakela, alafufokha." 32 Yesu aleavawela mpola ejoo patokhola khovaswekha kento. Apenee Petulo amokhweselaa Yesu pampelo no khwandyaa khomokhakela. 33 Ila Yesu agalokhaa, avakunaa vahemba vakwe. Amokhakela Petulo apalaa, "Petaa khonyuma yaane Khatawe! Kho nguno okha khosiima ga Matuunda ila khosiima ga vantu."

34 Apenee Yesu alyetaa idale lya vantu palomwi ne vahemba vakwe, avawela, "Mbe muntu yeyensi khopogaa awee mohemba waane, khopogiwaa isite mwenee, itweke mosalaba gwakwe, andonde. 35 Kho nguno muntu yunaa khopogaa khopon'ya opanga wakwe mwenee, khaupwelya no muntu yunaa khopwelya opanga wakwe kho nguno yaane no kho nguno ja Mpola Nsoga ja Matuunda, khapony'a opanga gwakwe. 36 Mbi, muntu alapata chanuu, ninga mbe khapata nsawo jensi ja pa liwelelo, ila khawopwelya wome wakwe wa nsiko jensi? 37 Mbi, muntu nokhowolaa khogalolya wome wakwe ne kento kee? 38 Mbe, muntu yeyensi alambonela nsoni onene ne malaangi gaane, kho olelo owo, wonaa wiijolaga wiketuu ne mabe, nanoyo Mwana wa Muntu alamowonela nsoni, panaa alaawa ijilee palomwi ne Vatomami va pachanya pa Matuunda kho mong'alalo wa daada yakwe."