1 Yesu aleawokhaa Kapelanaumu no khopeta kho ihala la Nazaleti khonaa aleakolelaa, alevilongolya palomwi ne vahemba vakwe. 2 Nsiko ya Khosuupa panaa aleyapikha, aleandya kholiga kho nyoomba ya khwitangela Vayahudi. Vantu vinki vanaa alevamotegeela venaa kholigaa, alevakhumyaa, vapaala, "Mbi, apataga khwenii mpola eje? Akhowolaa mbi khomanya no khonoja mpola ntembu kete eje? Ninga khonojaa mpola ja khokumya kete eje? 3 Mbi, oyo nkha amwene moponji, mwana wa Malia, ne valuna vakwe a Yakhobo no Yosefu no Yuda no Simoni? Mbi, ne valombo vakhwe nkha khokhwikhala nanevo apapanye khwisu?" Epoo, aleavasimbyaa.

4 Yesu avawela, "Mokuuni wa Matuunda khokoliwaa kho vantu vensi, ila topo kho ihala lakwe no khovadogwakwe no khokhayaawe."

5 Kho gechoo, Yesu aleakhanoja ituntumu lelensi okhoo, ila alekhovatolelaa mekhono valwile vatiiti no khovapon'ya. 6 Yesu aleakhumya kho nguno vantu alevakhavakhomogoomba.

Kho gechoo Yesu aleapetaa kho khaye jenaa angile jele pepi kho nguno ya khovaliga vantu. 7 Apenee avakhongan'yaa vahemba vakwe ikomi ne vawele, avagawaa vantu vawele vawele. Avatomaa no khovapeela olaala wa khopumelyaa mademi, 8 aleavawelaa, "Kho mosenjo gwenyu mokepolage nkhome ya khogendela topo, ila mokhakepole endya, ntungate ninga khokepola mpia, 9 Mwiije molyalage ntanjee, ila mokhiije mokepolage ikhoti lya akiba." 10 Aleavawela khanke, "Pepeensi panaa molawelwa khaliwo pakhaye, mwiije mwikhalage kho nyoomba eyoo, mpakha panaa molawokha ihala eloo. 11 Pepeensi panaa molapikha mbe vantu valasita khovapela khaliwo no khovategelelya, panaa molawokha epoo, mwiije mokun'guntage lonkhonde lonaa lolaawa lopwale momegolo jenyu, khovalageela kete Matuunda amwenee alavatengemekha."

12 Apenee vawookha, vawatengela vantu vapaale mabe gawe gensi no khogalekha. 13 Alevapumyaa mademi minki kho vantu no khovapakha valwile vinki makhuta ga muzeituni no khovapon'ya.

14 Apenee, mwami Helode aleategelaa egoo kho nguno lina la Yesu alelasambalaga lwande jensi. Vantu vamoonga alevakhopaala, "Yohana Mubatiji afufokhagaa khopuma kho vachi, avyenee ngulu jakwe alejekhotomama melemo mokhate yakwe."

15 Vaange alevakhopaala, "Muntu oyo a Elia."

Ne vaange alevakhopaala, "Oyo a mokuuni wa Matuunda a yomwii wawe wa vakuuni va myakha va Matuunda." 16 Ila Helode panaa aleategelaa mpola eje, aleapalaa, "Oyo amwenee Yohana Mobatiji, yunaa alenamodomula itwe, afufokhagaa." 17 Kho nguno Helode amwenee yunaa alealagelelajaa Yohana Mubatiji agwelwee no khotuungwa mokhandulunge. Helode aleanojaa gechoo kho nguno aleamotolagaa Helodia yunaa angile moliji wa Filipo modogwaakwe Helode. 18 Kho nguno Yohana angile khamowelaga Helode, "Njaanga kegilyaa khotoola moliji wa modogwakhoo."

19 Gechoo, Helodia angile atite ikuwo no Yohana, apogaa ninga khomowolaga, ila aleakhakhowola khomowolaga. 20 Helode alekhomogopaa Yohana, kho nguno aleamomanyile kete angile muntu wa Matuunda yunaa angile khogombwaa paulongolo wa Matuunda, gechoo alekhwangalelaa wome wa Yohana. Helode aleamowonela losongo modugo Yohana no khwitegeela vibe. 21 Apenee mwami Helode alenonojaa weenga wa nsiko ya kholelwaa khwakwe, aleavalalekhaa valaala va wami wakwe vanaa alevalepanse yakwe, valaala va masinjala ne valaala vakolo va Galilaya, apenee Helodia aleapataa njela ya khomowolaga Yohana. 22 Mwalele wakwe Helodia panaa aleingelaa no khwandyaa khwigeeya, amotojwaa modugo Helode palomwi ne vahenja vakwe vanaa alevalalekhagwa pa endya. Mwami aleamowelaa mwalele oyoo, "Ndombee chechensi kenaa khopogaa, nane ankhopelaa." 23 Helode aleamowela khwa kholapa, "Chechensi kenaa khondomba, ndakhopela, nkhankowola ninga khogawa wami waane pakhate no khokhopeela."

24 Apenee mwalele oyoo apetaa khomowolya maye wakwe, "Ndoombe kee?"

Maye wakwe amowelaa, "Petaa oloombe itwe la Yohana Mubatiji."

25 Mwalele oyoo aleatuwa nyango no khomowela mwami Helode, "Nkhopooga onepele itwe la Yohana Mubatiji, mo losela ituungo aleele." 26 Mwami aleasaya mudugo, ila kho nguno alemwapelagaa, kho nguno ya vahenja vakwe, aleakhapooga khomositela. 27 Apaponye mwami aleavalagelelyaa masinjala vapete vadomule itwe la Yohana no khokeleeta. Sinjala yomwii apetaa khodomola itwe la Yohana mokhandulunge, 28 apenee akeletaa molosela amopelaa mwalele, no mwalele oyoo amopelaa maye wakwe. 29 Vahemba va Yohana Mubatiji panaa alevapata mpola ejoo, alevapeta khosola mowele gwakwe no khowotuula mokhabuli.

30 Vatomwi alevatuuwa no khwikhongan'yaa paulongolo wa Yesu, vamowela gensi ganaa alevaganogaja no kholiga. 31 Kho nguno vantu vinki alevakhwija no khowookha, ninga vaawa vatokhola nyafasi ya kholyaa, epoo papene Yesu aleavawela vahemba vakwe, "Khopetagi kholeemwi khonaa patokhola vantu, mopete mosuupe." 32 Apenee, alevawookha valeemwi khwipogo, vapeta khonaa alekhotokhola vantu. 33 Ila vantu vinki alevawona panaa alevapetile no khovamanya. Gechoo, vantu va khopuma nse nyinki, alevakembela no kholongola khopikha khonaa Yesu ne vahemba vakwe angile vapetile. 34 Yesu panaa aleapikhaa nse nkhaku no kholewona idale la vantu, aleawaonela losongo, kho nguno angile vapwale kete nkholo jenaa jetokhola mosongi. Apenee aleandyaa khovaliga mpola nyinki. 35 Lyonse panaa angile lekhopooga khogweela. Vahemba alevamopetela Yesu, vamoweela, "Epa khole khotale ne khaye ja vantu, ne seji a mesee. 36 Vawelee vantu vapete kho mahala ne lwande ja pepi ili vigolele endya."

37 Ila Yesu avawelaa, "Vapelagi nywenywee endya." Nanevo vamowolya.

"Mbi, khopete khogole mikate ja magana gawele ga madini ga mpia? Mpia ejoo amba nyinki khogolela endya vantu vensi ewa."

38 Yesu avawolyaa, "Motite mikate jiinga? Petagi mokuune."

Ne panaa alevakuuna, vatuuwa no khomowela, "Jepwale mekhate jetano ne nshe jewele."

39 Apenee, Yesu avalagelelyaa vahemba vawawele vantu vensi vikhale mo malondo londo pa masanje masapu. 40 Nanevo alevikhala kho malondo ga vantu igana ne vaange alevikhala vantu makomi gataano. 41 Yesu aleasolaa eyoo mikate jetaano ne nshe jewele, akunaa khochanya, amosongela Matuunda no khwandya khoemeganyaa mikate no khovapela vahemba vakhwe ili vawapele vantu vensi ne nshe ejoo jewele aleajemeganyaa no khovagawela jensi. 42 Vantu vensi alevalyaa no kwikota. 43 Vahemba vakwe alevakongan'yaa nshe ne mikate jenaa alejasigaga no khovijolyaa vekhapu ikomi ne vewele. 44 Vagwisha vanaa alevalya endya angile elufu jetaano.

45 Apaponye Yesu aleavawela vahemba vakwe vataante mwipogo valongole khopeta Betisaida nkelo ya ilambo, panaa omwenee angile khodayaa idale ikolo la vantu. 46 Panaa aleamalyaa khovadayaa vantu evoo, aleapetaa kho ketonda kholoomba. 47 Panaa aleyapikhaa mesee, ipogo eyoo aleyapikhaga pakhate pi ilambo, Yesu aleasigagaa aleemwi kho nse nkaku. 48 Yesu avawonaa vahemba vakwe venaa angile vakhogayaa khokowa mentinkho khoelongolya ipogo, kho nguno iputa angile lekhovagilya khopeta paulongolo. Pepi ne makingilima, epoo papenee Yesu avapetela vahemba vakwe, oko khogendaa pachanya ya meje. Angile pepi avakele. 49 Ila panaa alevamowona khogendaa pachanya ya meje, alevasiima hamo isambwaa, vandyaa khohuuma. 50 Kho nguno vensi alevamowona, alevogopa mudugo. Apaponye Yesu apalaa nanevo, "Mokhagaye, nenee, mokhanyogope!" 51 Apenee aleingela mwipogo yenaa alevapwale ne iputa lyapola. Nanevo alevakumyaa modugo, 52 kho nguno alevakhale vamanye venaa Yesu aleanogelelaja mikate eyoo, alevakhakhowola khoemanya mpola eyoo.

53 Panaa alevalowokha ilambo, alevapikha nse ya Genesaleti, veemya ipogo yawe. 54 Panaa alevakhotelemokha khopuma mwipogo yawe, apaponye vantu alevamomanya Yesu. 55 Apenee vantu evoo vandyaa khopilima lwande ja nse yensi no khovakepola valwile mo vegonelo vyawe, vawakenkha lwande jensi jenaa Yesu aleapwale. 56 Lwande jensi jenaa Yesu angile apetaa, kho mahala ne khaye no kho megoonda, vantu alevawakenkha valwile kho lwande yenaa vantu angile vakhogola no khogolya vento no khwandyaa khomoloomba Yesu avawele valwile vamopalye ninga ipeembo la mwenda gwakwe. Vantu vensi vanaa alevamopalya alevapona.