1 Yesu aleandyaa kholiga khanke pampelo ya ilambo la Galilaya. Idale ikolo la vantu alelamopilima ninga alomaa ingele mwipogo no khwikhala. Vantu vensi alevikhalaga pa nse nkhaku, mompelo ya ilambo. 2 Aleavaligaa mpola nyinki khwa khotomela mefwano, no kho malaangi gakwe, aleavawela.

3 "Tegelelaji! Aleapwale momiinji yomwi yunaa aleapetaa khomiinja mbeyo kho mogonda gwakwe. 4 Panaa alekhominjaa mbeyo, jiinge alejagweela monjela, nyonyi jiija jalyaa. 5 Jiinge alejagweela mo mogaamba khonaa alekhotopo olongo mwinki, mbeyo ejoo alejaleemba nyango kho nguno angile khotopo olongo mwinki pachanya ya mogaamba. 6 Ila panaa lyonse angile ikhakha, mimelo aleyandyaa khonyaala no khokhala, kho nguno milii yakwe angile ele pachanya chanya topo. 7 Mbeyo jiinge alejagwela mo miyaa, miyaa panaa alejakola, aleyaebanaanga mimelo eyoo jilwaa kholela. 8 Jiinge alejagweela mo olongo mosoga, jaleemba, jakola no kholela, yemwii yalela makomi gatato, yeenge makomi sita ne yeenge igana."

9 Apenee Yesu aleapalaa, "Muntu yunaa atite matwi ga khotegeela, ategeele!"

10 Yesu panaa aleasigaa alemwii, vantu vamoonga vanaa alevakhomotegelelya palomwi ne vahemba ikomi ne vawele, alevamopetela no khomowolya nguno ya kholiga khwa mefwano achanuu.? 11 Yesu avawelaa, "Onywenywe mwapelwagaa masala ga khomanya mpola jenaa jiswekile kho Wami wa Matuunda, ila vantu vanaa vapwale panji, valawelwa kela kento kho mefwano, 12 kho nguno,

‘Mbe valawona, vawone ila vakhatemboole,

mbe valategela, vategeele ila vakhamanye,

vakhiije vamotuwele Matuunda ili avawochele mabe gawe.’ "

13 Apenee Yesu aleavawolya, "Mbi, onywenywe mokhamanya mofwano ogo? Molakhowola mbi khomanya mefwano jiinge? 14 Mbeyo jenaa alejekhomiinjwa no momiinji a Mpola ya Matuunda. 15 Vantu vaange vakhwipyanekeliwaa no oloongo wa monjela, panaa vakhotegeela Mpola ya Matuunda topo, Khatawe khwiijaa no kholewochaa momeoyo jawe. 16 Vantu vaange vakhwipyanekeliwaa no olongo wa mogaamba. Panaa vakhotegeela Mpola ya Matuunda, vakhopokeela nyango khwa nsekho, 17 ila vakhavakhotuula momeoyo jawe, kho nguno vapwale kete memelo yenaa itokhola milii, evenee vakhowamba Mpola ya Matuunda khwi ituungo ikupe topo, panaa etaabu ne magayo panaa vekhovapikela, evenee vakholekha khogoomba nyango. 18 Ila vaange vapwale kete olongo wonaa opwale mo miyaa, vakholetegeela no khopokeela Mpola ya Matuunda, 19 ila wowa wa wome ne nsawo nyinki ja wiwi no khotamanela vento viinge ne gechoo vakhokonya kholela viligi. 20 Ila vaange vapwale kete oloongo wonaa otite lutuba. Evenee vakholiteegela mpola no kholepokeela no kholela, yemwi khelelaa makomi gatato, ne yeenge makomi sita ne yeenge igana."

21 Apenee Yesu aleavawolya khanke, "Mbi, vantu vakhovachaa etala no khojekenkha mokhate no khoikhundekela ne idebe ao khoetuula mo oluungu? Nkha gechoo etala ketolwaa khochanya ya vinsundaa. 22 Gechoo chechensi kenaa chaswekilwee kelaumbolwa ne chechensi kenaa alechakundekelwa, kelakundokolwa. 23 Muntu yunaa atite matwi ga khotegeela, ategeele."

24 Yesu aleavawelaa khanke, "Tegeleli visoga kenaa mokhotegela! Njaanga eyoo yenaa mokhotomela khovatengemekela vaange, Matuunda alatomela ayeyoo khovatengemekela nanywi, khanke alakelelya. 25 Kho nguno kela yunaa atite chechensi alaongelelwa, ila muntu yunaa atokhola kento, ninga echoo kedo kenaa atite, alasukwa."

26 Yesu aleendelelaa khopaala, "Wami wa Matuunda wokhwipyaana no muntu yunaa khovyalaa mbeyo momogonda. 27 Panaa khowaa avyalagaa, otikho khowaa agonile, pa lyonse khowaa miso, ituungo aleloo mbeyo jekholeemba no khokola patokhola omwene khomanya. 28 Olongo awenee okhojenoja mbeyo jelembe no khokola no kholela endya, mbeyo jekhwandya khopumya matiti makeke, apenee nyangalawe, apenee jekhwija khopumya endya mo nyangalawe. 29 Endya panaa amba yakhamagaa, molemi khwingelaa momogonda ne nyeengo yakhwembolela endya kho nguno jakhamaga."

30 Yesu aleapalaa khanke, "Khoopyane Wami wa Matuunda ne kee? Khoopalele khwa mefwano kee? 31 Wami wa Matuunda ole kete mbeyo ya haladali, yenaa a nndo khokela mbeyo jensi jenaa jekhovyaalwa ne vantu va paliwelo. 32 Ila panaa kevyalwaa, ikokola no khowaa ipeke ikolo khokela memelo jensi jenaa jekhovyaalwa khomogonda. Matambe gakwe gakhowa makolo ninga nyonyi jekhwija no khonogelelya vetyoo vyawe omoo." 33 Yesu aleatomela mefwano minki panaa angile khovatengelaa vantu okhombe wakwe, aleapalaa nanevo venaa alevakhowola khomanya. 34 Aleakhapala nanevo chechensi patokhola khotomela mefwano, ila panaa angile khosigaa aleemwi ne vahemba vakwe, alekhovapalelaa kela kento mwalyaa.

35 Mesee ya nsiko ayeyoo, Yesu aleavawela vahemba vakwe, "Kholowoke, khopete kho nkelo ya ilambo." 36 Apenee alevalelekha idale lya vantu, vahemba vakwe aleviingela mwipogo monaa angile apwale Yesu, avivyoo ne mapogo gaange alegalondana nanoyo. 37 Tiimpu, iputa ikhakha mudugo alelandyaa khoputa, magelekha makolo ga meje alegaesunkha ipogo eyoo ninga khoekenkelelya khwijola meje. 38 Yesu angile agonilee ndoolo pa mpilimo ya ipogo oko atolagaa motwe gwakwe pa mosago. Apenee vahemba vakwe alevandyaa khomolawelya no khomoweela, "Molaangi, okhamanya kete khokhofwaa?"

39 Apenee, alealawela, andyaa kholegilyaa iputa eloo, no khogaloma magelekha makholo ga meje, "Pombolaa! Myaa!" Apenee iputa lapola paawa visoga. 40 Apenee Yesu aleavawolya vahemba vakwe, "Kho kee mole no wowa? Mbi, mokhale mokhamokhongoomba?" 41 Epoo alevogopa modugo, vaawa vakhwiwolya, "Mbi oyo a ananuu, yunaa iputa ne magelekha makolo ga meje, vekhomotegelelya?"