1 Yesu ne vahemba vakwe, panaa vakhotelela Yelusalemu alevapikha kho ihala la Betifage ne Betaniya pepi ne ketonda cha Mizeituni. Epoo Yesu aleavatomaa vahemba vakwe vawele vamolongole, 2 avawelaa, "Petagi kho ihala lenaa lepwale paolongolo wenyu. Molamopikha mwana ndogowe, yunaa akhaale khonojaa molemo gwegwensi, atungagwaa. Momotungule no khomoleeta khwaane. 3 Mbe muntu yeyensi khavawolya, ‘Kho kee mokhomotungola?’ Momowele, ‘Odaada khomopogaa ne khomotuvya kho ituungo ikupee lenaa lijile.’ "

4 Apenee, vapetaa, vamopikha mwana ndogowe atungagwa pampelo ya njela pepi ne molyango wa nyoomba. Panaa alevakhomotungola, 5 vantu vamoonga vanaa alevimelelaga epoo vawawolya, "Kho kee mokhomotungola oyoo mwana ndogowe?"

6 Ne evoo vahemba vawaweela kete venaa Yesu aleavawelaa, nanevo alevawagombela vapete no mwana ndogowe. 7 Apenee vahemba evoo, alevamokenkela Yesu mwana ndogowe oyoo, vaala myenda jawe pachanya ya mwana ndogowe no Yesu ikhala pachanya yakwe. 8 Vantu vinki vaala myenda jawe mo njela, vaange Vatandalyaa matambe ga mapekhe ganaa alevagadomolaga momegonda. 9 Vantu vensi vanaa alevalongola ne vanaa angile vapwale khonyuma, alevakhojoma no khopaala, "Akholiwe Matuunda. 10 Onojelwee masoga wami wonaa wijile wa Odaada wisu Daudi. Akholiwee Matuunda yunaa alekhochanya modugo!"

11 Yesu aleingelaa kho nse ya Yelusalemu aleapeta aviyoo mpakha kho nyoomba ya Matuunda, aleakunaa vento vyensi kho wangalelo mosoga. Kho nguno angile mesee, aleapetaa Betania palomwii ne vahemba vakwe ikomi ne vawele.

12 Igolo lakwe panaa alevakhopuma Betania, Yesu aleatite njala. 13 Panaa alewonaa ipeke la mtini khwa otale lenaa angile letite matiti minki. Awopetela ili awokune mbe aleotite viligi vyevyensi. Panaa aleaupekila, awopikilee otite matiti topu otokhola viligi, kho nguno angile nkha ituungo la cha viligi. 14 Yesu angile alewelaa ipeke eloo, "Khwandelya leelo ne nsiko jensi muntu yeyensi akhiije alyee viligi vyakhoo."

Nanevo vahemba vakwe alevamotegeela khopalaa gechoo.

15 Panaa alevapikha Yelusalemu. Yesu aleingelaa kho nyoomba ya Matuunda avadagaa vanaa alevakhogolya no khogola vento epoo. Ajependolaa emeza ja vantu vanaa alevakhogalolya mpia, apendula ne vete vya vantu vanaa angile vakhogolya njewa. 16 Aleakhamoloma muntu yeyensi asole kento khopuma kho lwande ja nyoomba ya Matuunda. 17 Apenee avaligaa vantu, khwa khopaala, "Yandekhagwa kho mandekho ga Matuunda, ‘Nyoomba yaane eleetwa nyoomba ya khonojela maloombi kho nguno ya nse jensi’ Ila onywenywe mwainogaja khowa lwande ya vasuki."

18 Vapumya matambekho valaala va Matuunda ne valaangi va njaanga panaa alevategeela egoo, alevandyaa khopooga njela ya khomowulaga. Ila alevamwogopa kho nguno idale lensi la vantu alevakhumyaa khwa malaangi gakwe masoga. 19 Panaa aleyapikha mesee, Yesu palomwi ne vahemba vakwe alevapuma kho ihala eloo.

20 Igolo lakwe melaawo, panaa alevakhokela alevagowona motini gwakhalaga khopuma kho matambe mpakha kho milii yakwe. 21 Petulo aleakhombolaa mpola ejoo jenaa Yesu aleapalaa kowogela owoo mtini, apenee amowelaa, "Molaangi, kunaa! Ipeke eloo la mtini wonaa alewagolegeta gwakhalaga." 22 Yesu avawela, "Momogombage Matuunda. 23 Khapanga nkhovawela, mbe muntu khakewela ketonda eke, ‘Limbokhaa wisombele mo ikhwa,’ no okhawe no wowa momooyo gwakhoo kho echoo kenaa khopalaa, ila agoombe kete mpola jensi jenaa khopalaa gakhonojekha, khanojelwa mpola eyoo. 24 Kho gechoo nkovaweela, chechensi kenaa mokhopogaa khwa khomoloomba Matuunda, gombagi kete mwapokelaga ne kelaawa chenyu. 25 Panaa amba mokholoomba, movasamehi vensi vanaa alevawanojela mabe, ili Daada yenyu wa pachanya khotopo avasamehi nanywi mabe genyu." 26 Ila mbe amosita khovasamehi vaange, Daada yenyu yunaa apwale pachanya khotopo avasamehi nanywi mabe genyu.

27 Apenee, Yesu ne vahemba alevapikha khanke Yelusalemu. Panaa angile khogendaa kho nyoomba ya Matuunda, vapumya matambekho valaala, valaangi va njaanga ne vakhoombi alevamopetela, 28 vamowolya, "Khonojaa mpola eje kho olaala wa ananuu? Ananuu yunaa aleakhopelaa olaala wa khonojaa mpola eje?"

29 Yesu avawelaa, Ambawolya mpola yemwi, mbe mombwele, nane ambawela nkhonojaa mpola eje kho olaala kee. 30 Mbwelagi, olaala wa Yohana wa khobatija alegapuma khwa Matuunda ao khwa vantu?

31 Apenee, vandya khopalana venee kho venee, vapaala, "Mbe, khopaale, ‘Alegapuma khwa Matuunda’, khatowolya, ‘Kho kee alemokhamogomba Yohana?’ 32 Avivyoo mbe khopaale, ‘Alegapuma khwa vantu.’ " Valevogopa idale la vantu, kho nguno vensi alevakhomogoomba Yohana angile molooti wa Matuunda. 33 Apenee, vamoweela Yesu, "Osweswee khokhamanya." Nanuyo Yesu avawelaa, "Nane khotopo mmbawele nkhonojaa mpola eje kho olaala kee."