1 Yesu ne vahemba vakhwe alevapikha kho nse ya Vagelasi, nkelo ya ilambo la Galilaya. 2 Yesu panaa alekhotelemokha mwipogo, aleitanga muntu yomwi yunaa angile asalenkanaga ne idemi angile apumaga kho makhabuli. 3 Muntu oyoo alekhwikhala khomakhabuli, khotopo ninga muntu yunaa aleakhowola khomotunga menyololo. 4 Kho nguno alevakhomotunga empingo ne menyololo, ila kela ituungo alekhojedomola menyololo ne emupingo ejoo, gechoo alekhotopo muntu yeyensi yunaa aleakhowolaa khomogilya. 5 Lyonse no otikho alekhikhalaga khomakhabuli no khovetonda, okhoo khokowaa madolo no khwidomolanga ne mabwee. 6 Panaa aleamowonaa Yesu khotale, aleamokembelela no khomotungamela paulongolo wakhwe, 7 apalaa kho lolii nkolo, "Okhopooga onojeee kee nane ogwegwe Yesu, Mwana wa Matuunda yunaa apwale Khochanya Mudugo? Olape kho lina la Matuunda, nkhokholoomba okhandemeke!" 8 Aleapalaa gechoo kho nguno Yesu aleamowelaga, "Ogwegwe idemi mopumee muntu oyo." 9 Apenee Yesu aleamowolya, "Lina lyakhoo ananuu?" "Nanuyo amowelaa lina lyane a ‘Idale,’ kho nguno khole vinki" 10 Apenee aleamolombaa mudugo Yesu akhavadage kho nse eye.

11 Pepi ne epoo angile khole idale ikolo la magolowe, vakhosoonga kho mosulumokho wa ketonda. 12 Apenee mademi alegamoloomba, "Okholeke khwingele kho magolowe egoo." 13 Apenee Yesu aleavagombela, papene mademi alegapuma no khwingela kho ngolowe ejoo. Idale lensi la ngolowe jenaa angile kete elufu jewele, latelemokha kho mosulumokho wa ilambo no khotwiina. 14 Vasoongi va ngolowe ejoo alevakembela, vapeta khovaweela mpola eyoo khwihala no khomengonda. Ne vantu alevapeta khokunaa kenaa alechapumela, 15 panaa alevapikha khwa Yesu, alevamowona muntu oyoo yunaa aleasalinkanaga ne idale lya mademi ikhalaga panse, alyalagaa myenda ne atite masala masoga, vantu vensi alevogopa. 16 Vantu vanaa viwonile mpola eyoo, alevandyaa khovapalela ne vaange mpola yenaa aleyamopumela muntu oyoo, yunaa aleasalinkanaga ne mademi, ne mpola ja ngolowe ejoo.

17 Apenee vantu vapooga Yesu awookhe kho nse yawe. 18 Yesu panaa alekhotantaa mwipogo, muntu oyoo yunaa aleatite mademi, amolombaa vapete nanoyo. 19 Ila Yesu aleamositelaa. Apenee amowelaa, "Petagaa khokhaye khwa vadogwako ovawele mpola yenaa Odaada akhonojelaga ne venaa akhowonelaga losongo." 20 Apenee muntu oyoo aleapetaa, andyaa khoteenga okhoo Dekapoli, mpola yensi yenaa Yesu aleamonojelaga, vantu vensi alevakhumya. Dekapoli emaana yakwe mahala ikomi.

21 Yesu alealowokhaa khanke nkelo ya owele ya ilambo khwi ipogo. Idale ikolo la vantu alelikhongany'a paulongolo wakwe, nanoyo awaa imelelagaa pampelo ya ilambo. 22 Aleijaa muntu yomwii yunaa khwetwaa Yailo, molaala wa nyoomba ya khwitangela Vayahudi. Aleapikhaa epoo, nanoyo panaa aleamowona Yesu, aletungama pamegolo jakwe, 23 amolombaa no khopaala, "Mwalele waane modo a molwile alepepi achee. Nkhokholoomba khopete, omolombele apate khopona no khwikhala."

24 Apenee Yesu awokhaa palomwi nanoyo. Ne idale ikolo la vantu alelamoloonda no khwandya khomobunkhaanga.

25 Kho idale eloo, alekhole no mokhiima yomwii yunaa angile atite mosongelo khwi ituungo la myakha ikomi ne jewele. 26 Mokhiima oyoo aleagayagaa mudugo, khwa khopeta khwa vagaanga vinki no khotomela nsawo yakwe yensi. Ila aleakhapona, no olwile wakwe alegokhongelekha. 27 Mokhiima oyoo aleategelagaa mpola ja Yesu, ne gechoo aleepenyelya mo idale la vantu khopumela khompilimo, no khopalyaa ipeembo la mwenda gwakwe. 28 Aleanoja gechoo, kho nguno alekhwipalelaa momooyo gwakwe, "Mbe, mpalye topo ipeembo la mwenda gwakwe, ndapona."

29 Apaponye panaa aleapalya ipeembo la mwenda gwa Yesu, mosongelo gwakwe alegwalekha, epoo alekhwitegeela momowele gwakwe aponagaa. 30 Apaponye Yesu aleamanya kete ngulu jakwe japumaga. Apenee alealegelokela idale eloo la vantu, no khovawolya, "Ananuu yunaa apalyaa mwenda gwaane?"

31 Vahemba vakwe vamowelaa, "Owine idale la vantu venaa vakhokhosunkhanga, mbi khowolya, ananuu yunaa ampalya?"

32 Ila Yesu aleendelela khokuuna lwande jensi, ili amowone ananuu yunaa aleamopalya. 33 Apenee mokhiima oyoo, oko amanyile kenaa alechamopumelaga, aleapumela oko khotetemaa kho wowa, ijutaa panse paulongolo wa Yesu no khomowela mpola jensi jenaa aleajenogajaa. 34 Yesu amowelaa, "Mwalele waane, khogoomba khwakhoo khwakhoponyajaa, Petaga ne nseko, opone mosongelo gwakhoo gwensi, okhatuwe khanke."

35 Yesu panaa angile akhale khopalaa, vantu alevapikha khopuma khokhaye khwa Yailo yunaa molaala wa nyoomba ya khwitangela Vayahudi vamoweela, "Mwalele wakho achaga, kho kee khwendelela khomogayanjaa Molaangi?"

36 Ninga venaa Yesu aleategelaa ganaa alevakhopalaa, aleamogalokela Yailo, amowela, "Okhogope, ogwegwe gombagaa topo." 37 Ninga gechoo, aleakhaloma muntu yeyensi amolonde, ila topo Petulo no Yakhobo no Yohana modogwakwe Yakhobo. 38 Panaa alevapikha khokhaye khwa Yailo, Yesu aleategelaa madoolo no khowona vantu vakhokhoota no khoombolelya kho lolii nkolo. 39 Aleingelaa mokhate, avawelaa, "Kho kee mokhokhowa madoolo no khokoota? Mwalele wenyu akhafwa, ila agonilee topo."

40 Ila evenee alevamosekha, apenee aleavapumyaa vensi panji, aleavasolaa maye no daada wa mwalele oyoo palomwii ne evoo vahemba vakwe vatato, avenee vanaa alevingela khombele monaa mwalele oyoo aleapwale. 41 Apenee amowambaa mokhono oyoo mwalele yunaa aleafwagaa, amowelaa, "Talita, koum," emaana yakwe, "Mwalele nkhokhoweela lawelaa!" 42 Apaponye mwalele oyoo alealawelaa, andyaa khogeenda, nanoyo aleatite myakha ikomi ne jewele, vantu alevakhumyaa modugo panaa alevawona gechoo. 43 Ila Yesu aleakhaloma vakhamowele muntu yeyensi mpola eyo. Apenee aleavawelaa vamopele mwalele oyoo endya.