1 Owo awenee mwandyo wa Mpola Nsoga ya Yesu Kilisto, Mwana wa Matuunda. 2 Yandilyee kete venaa aleyandekhwa kho ketabu cha Isaya molagoli wa Matuunda,

"Matuunda aleapalaa, ‘Ambotoma mokhombe waane akholongole,

nanoyo khakhonogelelya njela yakhoo.’

3 Lolii lwa muntu kheetaa pitenengwa, kepalaa,

‘Momonogelelye Odaada njela yakwe,

golooli vejela visoga monaa alakela!’ "

4 Yohana Mobatiji aleijaa pitenengwa, avatengela vantu vapaale mabe gawe no khogalekha, apenee voojwe ili Matuunda avasamehi mabe gawe. 5 Vantu vinki khopuma kho nse ya Yudea no khopuma khwiihala Yelusalemu, alevapeta khwakwe, vagoomba kete vatite mabe, apenee avojaa kho lweje Yolodani.

6 Yohana angile kholyalaa mwenda gonaa alegwanogelelwa kho wage wa ngamia, no khwituunga mokhanki gwa ntila pa kewino chakwe, ne endya yakwe angile mpandi no woke gwa mwipolu. 7 Yohana alekhotengaa khwa khopaala, "Nkha ituungo itale, aliija muntu yunaa atite ngulu khokela onene, yunaa nkhalomwa khosunama no khotungola ngosa ja ntanjee jakwe. 8 Onene nkhovoja kho meje, ila omwene alavoja kho Moye wa Matuunda."

9 Kho nsiko ejoo, Yesu aleapuma kho ihala la Nazaleti wonaa opwale kho nse ya Galilaya, nanoyo abatijwaa no Yohana Mobatiji kho lweje Yolodani. 10 Yesu panaa aleagungumukhaa mo meje, aleawonaa khochanya khwa Matuunda khokhodigokha no Moye wa Matuunda khomotelemokelaa pachanya yakwe kete njewa. 11 Lolii khopuma khochanya khwa Matuunda aleyategelekha, yenaa kepalaa, "Ogwegwe amwene Mwanaane mosoga, yunaa natogajwaa nagwe."

12 Timpu Moye wa Matuunda amolongolaa Yesu no khomokenkha pitenengwa, 13 aleikhalaa okhoo khwi ituungo la nsiko alobaini, alekhogemwaa no Khatawe. Nanoyo angile palomwi ne ndimwana ja mwipolu, ne vatomami va pachanya va Matuunda aleviija khomotomekela.

14 Panaa nsiko nyinki alejekela, Yohana aleatungagwaa mo khandulunge, khwi ituungo eloo Yesu aleapetaa kho nse ya Galilaya khoteenga Mpola Nsoga ya Matuunda, apalaa, 15 "Nsiko japikhaga, wami wa Matuunda watelelaga. Palagi mabe genyu no khogalekha, moegombe Mpola Nsoga ya Matuunda!"

16 Yesu Panaa alekhokelaa mompelo ya ikhwa la Galilaya, aleavawonaa valui vawele, Simoni no Andelea modogwakwe vakholuwa nshe khwa migonyo. 17 Yesu avawelaa, "Ndondi, nane ambanoja khovaleeta vantu khwaane, kete valui venaa vakholeeta nshe." 18 Apaponye alevalekha migonyo yawe, vamoloonda Yesu.

19 Yesu panaa aleatelelaa paulongolo kedo, aleavawonaa vadogwakwe, Yakhobo no Yohana, vanaa angile vana va zebedayo, vapwale mwipogo yawe vakhwandaa migonyo jawe. 20 Apaponye Yesu aleavetaa, nanevo alevamolekha daada yawe Zebedayo mwipogo palomwi ne vatomami vakwe, vamoloonda Yesu.

21 Yesu ne vahemba vakwe alevapikha kho ihala ya Kapelanaumu, panaa aleyapikhaa Nsiko ya Khosuupa, Yesu aleingelaa mo nyoomba yenaa alevakhwitangela Vayahudi andyaa kholaanga. 22 Vantu vensi alevakhumya venaa angile kholangaa, kho nguno angile akhakholigaa kete valaangi va njaanga ja Musa, ila angile kholangaa kete muntu yunaa atite olaala.

23 Ituungo alelonye, kho nyoomba yakhwitangela Vayahudi aleapwale muntu yomwii yunaa angile asalenkanagwaa ne idemi, alekhokowa madoolo. 24 Aleapalaa, ogwegwe Yesu wa Nazaleti, "Okhopooga chanuu khwisu, mbi wijaga okhowolage? Khomanyile kete ogwegwe ananuu, ogwegwe amwenee yunaa otomilwe no Matuunda!"

25 Ila Yesu alealekhakela idemi eloo, no kholewela, "Pombolaa myaa! Upume khwa muntu oyo!"

26 Apenee idemi eloo alelandyaa khomogayanja muntu oyoo, akhotaa kho lolii ikolo apenee idemi lamopuma. 27 Vantu vensi alevakhumyaa no khwiwolya, "Mpola kee eje? Ega a malaangi mapyaa ganaa gatite olaala! Khogaloma ninga mademi khopuma nanego gakhopuma!"

28 Mpola ja Yesu alejasambala nyango kho lwande jensi ja ihala la Galilaya.

29 Apaponye alevapuma kho nyoomba yakhwitangela Vayahudi, angile valepalomwi no Yakhobo no Yohana, vapeta kho khaye khwa Simoni no Andelea. 30 Okhoo mokhoyakwe no Simoni angile agonagaa pa ketanda oko alwalagaa homa nkhaka, vamoweela Yesu mpola eyoo, ituungo aleloo. 31 Yesu aleamopetela maye oyoo, amowambaa mokhono no khomonyanyola, ne apaponye aleaponaa no khwandya khovatomekela.

32 Misee, panaa lyonse angile lagwilaga, Yesu angile aletelwaa valwile vensi ne vantu vanaa alevasalenkenaga ne mademi. 33 Vantu vinki va nse eyoo, alevikhongan'ya panji ya molyango wa nyoomba ya Simoni no Andelea. 34 Nanoyo Yesu aleavapon'yaa vantu vinki malwile gawe gensi, aleagadaga ne mademi, ila aleakhaloma vapaale kento chechensi kho nguno alevamomanyile omwene ananuu.

35 Igolo lakwe makingilima, Yesu alealawelaa no khowookha khopeta kholoomba khonaa alepatokhola vantu. 36 Simoni ne vayakwe alevapeta khomopooga. 37 Panaa alevamowona, vamowelaa, "Kela muntu khokhopogaa."

38 Yesu avawelaa, "Khopetage kho mahala gaange ga pepi nojee malaangi no khwene, kho nguno nijaga kho molemo ogoo."

39 Apenee apetaa kho lwande jensi ja nse ya Galilaya, andyaa khoteenga kho nyoomba jawe ja khwitangela Vayahudi no khopumya mademi.

40 Molwile yomwii wa malimwa aleamopetela Yesu amotungamela no khomoloomba, "Mbe khotogwa, nkholoomba onoje ngombwe khomokumbekha Matuunda."

41 Yesu amowonela losongo muntu oyoo, agololaa mokhono gwakwe, amopalyaa no khomoweela, "Nkhopooga! Ogoombwe khomokumbekha Matuunda!" 42 Apaponye aleaponaa egoo malimwa, agombiwa khomokumbekha Matuunda. 43 Yesu amokhakela vikhamu, apenee amowelaa awooke, 44 aleamowelaa, okhamowele muntu yeyensi mpola eje, petagaa wilagele kho mopumya matambekho molaala no khopumya sadakha khwa khogoombwa khwakhoo khomokumbekha Matuunda, kete venaa Musa alealagelelya ili vanto vensi vawone.

45 Ila muntu oyoo aleapetaa, andyaa khosambalya mpola ejo kho lwande jensi no khopaala mpola nyinki ja Yesu, gechoo Yesu aleakhonya khwingela khaye yeyensi pa welo, alomaa khwikhala khotale khonaa angile khotokhola vantu. Ninga gechoo, vantu alevamopetela khopuma kho lwande nyinki.