1 Nsiko ya Khosuupa panaa yaleyakela, igolo lakwe makingilima nsiko ya mwandyo wa juma, Malia wa kho Magidala palomwi no Malia oyoo yoonge, valevapeta khokuuna khabuli eloo. 2 Apaponye, lalelapumeela ilindimya ikolo, kho nguno motomami wa khochanya khwa Matuunda aleatelemokhaa khopuma khochanya, akatelela pepi ne khabuli, abilingityaa ibwee eloo pampelo, no kholekhalela. 3 Motomami oyoo wa khochanya khwa Matuunda angile akhong'alala kete lopwiito, ne myenda jakwe angile myelo pee. 4 Masinjala vanaa angile vakholindelelya khabuli eloo, valevatungumala modugo, viigela kete vafwaaga.

5 Motomami oyoo wa khochanya khwa Matuunda akavaweela vakhiima evoo, "Mokhatungumale, kho nguno manyile kete mokhomopooga Yesu yunaa aleananamolagwa pamosalaba. 6 Omwenee atapoya epa, afufokhagaa, kete venaa aleapaalaa. Mwiije mokuune panaa movimba alegopwale. 7 Gechoo, petagi nyango movawele vahemba vakwe kete, ‘Yesu afufokhagaa, ne seji akhovalongola khopeta Galilaya. Okhoo akhwenee molamopikha.’ Echoo achenee kenaa nijaga khovaweela."

8 Papenee vakhiima evoo vawookha nyango epoo pikhabuli, oko vatungumile palomwi no otogwi mokolo. Vakembela lowelo khopeta khovaweela vahemba va Yesu ganaa motomami wa khochanya khwa Matuunda avawelagaa. 9 Panaa angile vapetile lowelo khovaweela vahemba vakwe, apaponye Yesu itangaa nanevo, avalamochaa, "Molevapanga." Vakhiima evoo vakamotelela, vamotungamela no khowaamba megolo jakwe no khomokumbekha. 10 Apenee Yesu akavaweela, "Mokhatungumale, petagi movawele vadogwane vapete Galilaya, okhoo akhwenee valanipikha."

11 Vakhiima evoo panaa angile vapetile, valindeleli vamoonga va khabuli eloo, valevapeta kho ihala khovaweela valaala va vapumya matambekho mpola jensi jenaa angile japumelaga. 12 Apenee valaala va vapumya matambekho evoo valevitaanga palomwi ne valaala va Vayahudi, vapalana no kholamola venaa valanoja. Vavapeela masinjala evoo mpia nyinki, 13 no khovaweela, "Mbe muntu yeyensi alavawolya khwa ganaa gapumelaga, mowelagi geeeke, otiko panaa angile khogonile ndoolo, vahemba vakwe valeviija no khwiwa movimba gwakwe. 14 Ne mbe Pilato alategela mpola eye, osweswe kholapala nanoyo ili onywenywe mokhiije motengemekwe."

15 Papenee masinjala vasola mpia ejoo no khonoja kete venaa valevaweelwa ne valaala va Vayahudi. Mpola jawe ja opepi jasambaala khwa Vayahudi vensi mpakha leelo.

16 Vahemba evoo ikomi no yomwii va Yesu, valevapeta Galilaya kho ketonda kenaa Yesu aleavalagelelya. 17 Panaa valevamowona Yesu, vakamokumbekha, ila vamoonga va vahemba evoo valevakhagomba kete a Yesu. 18 Apenee Yesu akavatelela no khovaweela, "Matuunda anipelagaa olaala wensi wa khochanya khwa Matuunda ne wa liwelelo. 19 Gechoo, petagi kho nse jensi movanoje vantu vawee vahemba vaane. Mopete monojee gechoo khwa khovabatijaa khwa lina la Daada, ne la Mwana, ne la Moye wa Matuunda, 20 no khovaliga khogaloonda malagelelyo gensi ganaa nalenavalagelelajaa onywenywe. Manyagi kete, nane ndaawa palomwi nanyu nsiko jensi, mpakha kho odugo wa liwelelo."