1 Nsiko sita panaa jalejakela, Yesu aleavasolaa Petulo no Yakobo no Yohana moluna wa Yakobo, akapeta nanevo kho ketonda ketale khonaa valevikhala okhoo valeemwi. 2 Ne panaa angile vapwale okhoo, Yesu aleagalokhaa osho paolongolo yawe. Osho wakwe walewang'ang'ala kete lyonse, ne myenda jakwe jawa myelo pee, kete welo wa lyonse. 3 Timpu, vavawona Musa no Elia vakhopaala no Yesu. 4 Apenee Petulo akamoweela Yesu, "Mwene, mbe olatogwa a visoga osweswe khwikhale epa, ndajenga vedindiga vetato, kemwii amba chakhoo, ne keenge amba cha Musa, ne keenge amba cha Elia."

5 Petulo panaa angile akhale akhopaala, timpu, iluunde lenaa lekhong'alala pee alelavakundekela, no lolii lwategelekha khopuma mo iluunde eloo, yenaa kepalaa, "Oyo amwenee mwanaane yunaa nemotogilwe, yunaa nkhotojwaa nanoyo, gechoo momotegelelaje mwenee."

6 Vahemba vanaa angile vapwale no Yesu, panaa valevategeela lolii oloo, valevatungumala modugo, vagwaa panse khwa khogubama. 7 Yesu akavatelela, akavapaalya no khovaweela, "Imeleli, mokhatungumale." 8 Panaa valevanyenyola miso gawe, vakamowona Yesu asigagaa aleemwi.

9 Yesu ne vahemba evoo, panaa alevakhosulomokha kho ketonda, Yesu akavalagelelya, "Mokhamowele muntu yeyensi ganaa mwagawonaga mpakha panaa Mwana wa Muntu alafufokha."

10 Apenee vahemba evoo vamowolya, Kho kee valaangi va njaanga ja Musa vakhopaala, "Ekhopogiwaa Elia amolongole Kilisto khwija?" 11 Yesu akavaweela, "Avyenee epwale, Elia amwenee alalongola khwija, nanoyo alanogelelya mpola jensi. 12 Ila nkhovaweela, Elia teali ijagaa, nenevo valevakhamomanya, valevamonojela kela kento kenaa angile vakhopooga. Avivyoo valamonojela vibe Mwana wa Muntu."

13 Apenee vahemba vakwe vamanya kete Yesu angile akhovaweela khougela mpola ja Yohana Mobatiji.

14 Yesu ne vahemba vakwe panaa alevatuuwa kho idale eloo la vantu, muntu yomwii akamwijela Yesu no khotungama paulongolo wakwe. 15 Amowelaa Yesu, "Mwene, nkholoomba omowonele losongo mwanaane. Atite olwile wa khafunta, ne olwile owoo okhomogayanja modugo, omwene khagwelaga mo moto ne mo meje. 16 Alenamoleeta khwa vahemba vakhoo vamopon'ye ila valevakonya." 17 Yesu apalaa, "Onywee keleli cha vantu vanaa mokhamogomba Matuunda, ne vabe. Ndikhala nanyu mpakha nale? Ndavakhamelelya mpakha nale? Mondetele molomyana oyoo epa." 18 Panaa valevapeta nanoyo, Yesu akaleweela idemi la khwa molomyana oyoo, lepume. Apaponye molomyana oyoo aponaa.

19 Apenee vahemba vakwe vakamopetela Yesu ituungo lenaa vantu angile vatapoya no khomowolya, "Kho kee osweswe alekhwakonya khopumyaa idemi eloo?"

20 Yesu akavaweela, "Alemwakonya, kho nguno khogoomba khwenyu a khodo. Nkhovaweela khapanga, mbe anga mowee mokhogoomba kedo topo, kete venaa epwale mbeyu ya haladali, angamolakhowola khokeweela ketonda eke, ‘Pumaa epa opete okhoo,’ nanogo angagolapeta. Gechoo, nanyu molakhowola khonoja mpola yeyensi." 21 "Ila idemi kete ele, khotopo lepume, ila topo khwa njela ya khomoloomba Matuunda no khotuunga kholya."

22 Yesu ne vahemba vakwe panaa angile vapwale kho ihala la Galilaya, Yesu aleavawelaa, "Mwana wa Muntu alagalokhwa no khomokenkha ili agwelwee ne vantu vabe. 23 Nanevo valamowolaga, ila nsiko ya otato alafufokha."

Vahemba vakwe panaa valevategeela gechoo, valevasaaya modugo.

24 Yesu ne vahemba vakwe panaa valevapikha Kapelanaumu, vantu vanaa angile vakukungan'ya khodi kho nguno ya Nyoomba ya Matuunda, vapeta khwa Petulo, no khomowolya, "Mbi, molaangi wenyu akholepa khodi ya Nyoomba ya Matuunda?"

25 Petulo akavaweela, "Avyenee, akholepa."

Petulo panaa aleingela mokhate ya nyoomba, ne panaa angile akhale khopaala ninga mpola yeyensi, Yesu akamowolya, "Simoni, ogwee okhowona mbi? Vami va liwelelo ele vakukungan'ya khodi khopuma khwa vananuu? Mbi, khopuma khwa vantu va nse jawe, ao khopuma khwa vantu va nse jiinge?"

26 Petulo akamoweela, "Vakukungan'ya khopuma kho vantu va nse jiinge."

Yesu akamoweela, "Kho gechoo, vahenja vakhavakholepa khodi. 27 Ila khokhavakilye vantu ewa. Petaa kho ilambo, no ojutele ndowano mo meje. Ne nshe wa mwandyo yunaa olapata, omotungule molomo, nagwe olawona omoo mpia. Osole mpia eyoo opete olepe khodi yaane ne yakhoo."