1 Ogo agwene mosololo gwa odogo wa Yesu Kilisto. Yesu Kilisto angile wa odogo wa mwami Daudi. Daudi nanoyo angile wa odogo wa Abulahamu.

2 Abulahamu amolelile Isaka, no Isaka akamolela Yakobo, no Yakobo akamolela Yuda ne vadogwakwe. 3 Yuda amolelile Pelesi no Zela, onyinya yawe angile Tamali. Pelesi akamolela Heziloni, no Heziloni akamolela Lami, 4 Lami akamolela Aminadabu, no Aminadabu akamolela Nashoni, no Nashoni akamolela Salimoni, 5 Salimoni akamolela Boazi, no nyinya Boazi angile Lahabu. Boazi no Lutu angile valeli va Obedi, no Obedi akamolela Yese, 6 Yese akamolela mwami Daudi, nanoyo Daudi akamolela Solomoni, onyinya wa Solomoni a oyoo yunaa angile moliji wa Ulia, 7 Solomoni akamolela Lehoboamu, no Lehoboamu akamolela Abiya, no Abiya nanoyo akamolela Asa, 8 Asa nanoyo akamolela Yehoshafati, no Yehoshafati akamolela Yolamu, no Yolamu akamolela Uzia, 9 Uzia nanoyo akamolela Yotamu, no Yotamu akamolela Ahazi, no Ahazi nanoyo akamolela Hezekia, 10 Hezekia nanoyo akamolela Manase, no Manase akamolela Amoni, no Amoni akamolela Yosia, 11 Yosia nanoyo akamolela Yekonia ne vadogwakwe, ituungo panaa Vayahudi angile vakhosamiwaa kho nse ya Babeli. 12 Ituungo eloo la osaami, Yekonia akamolela Shealitieli, no Shealitieli akamolela Zelubabeli, 13 Zelubabeli akamolela Abiyudi, no Abiyudi akamolela Eliakimu, no Eliakimu akamolela Azoli, 14 Azoli nanoyo akamolela Sadoki, no Sadoki akamolela Akimu, no Akimu akamolela Eliudi, 15 Eliudi akamolela Eliazali, no Eliazali akamolela Matani, no Matani akamolela Yakobo, 16 Yakobo akamolela Yusufu yunaa angile mogwisha wa Malia, no oyoo Malia aleamolela Yesu yunaa akhwetwa Kilisto. 17 Gechoo, alevepwale veleli ikomi ne venee khopuma khwa Abulahamu mpakha khwa mwami Daudi. No khopuma khwa mwami Daudi mpakha ituungo la osaami wa khopeta Babeli. No khopuma kho osaami wa Babeli mpakha khwa Kilisto alevepwale veleli ikomi ne venee.

18 Mpola ya kholelwa khwa Yesu Kilisto angile geeke. Malia nyinya wa Yesu angile abanyagwaa no Yusufu, ila panaa angile vakhale vandye khwikhala palomwi kete moliji no mogwisha, Malia aleigelaa akepolagaa ndaa kho olaala wa Moye wa Matuunda. 19 Yusufu angile muntu musoga, aleakhapoga khomopeela nsoni molijakwe khwa vantu, gechoo alealoma khomolekha khwa osweki ili akhamotole khanke. 20 Yusufu panaa angile khohewaa empola eyoo, motomami wa pachanya khwa Matuunda amwijelaa kho ndoti, amowelaa, "Yusufu, molelwa wa mwami Daudi, okhatungumale khomotoola Malia, kho nguno ndaa yakwe yapumanagaa khwa olaala wa Moye wa Matuunda. 21 Nanoyo Malia alamolela mwana wa kegwisha, nagwe olamweta Yesu, kho nguno omwenee amwenee alavapon'ya vantu vakwe khopuma kho mabe gawe."

22 Ega gensi alegapumeela ili idugame mpola yenaa Mwene angile apalagaa khokelela khwa molooti wa Matuunda kete, 23 "Tegelelyaa, mwalele yunaa akhale iitange no mogwisha, alakepola ndaa, nanoyo alamolela mwana wa kegwisha, nanoyo alaetwa lina lakwe, Emanueli" emaana yakwe, "Matuunda palomwi nasu."

24 Yusufu panaa alealawelaa, anojaa kete venaa motomami oyoo wa khochanya khwa Matuunda aleamowelagaa, amosolaa Malia no khomonoja molijakwe. 25 Ila aleakhagona nanoyo, mpakha panaa aleitungolaa mwana. Nanoyo Yusufu amwetaa mwana oyoo Yesu.