1 Kho ituungo eloo, Helode mwami wa Galilaya, aleategela mpola jenaa jekhomopalela Yesu. 2 Apenee akavaweela vatomami vakwe, "Muntu oyo a Yohana Mobatiji, yunaa afufokhaga." Avyenee atite olaala wa khonoja matuntumu.

3 Helode aleapala gechoo, kho nguno omwenee amwenee alealagelelya Yohana agwelwe no khotuungwa mokhandulunge. Aleanoja gechoo kho nguno ya Helodia angile moliji wa Filipo mokolwakwe Helode. 4 Kho nguno Yohana angile khomowelaga Helode kete, "Nkha visoga ogwegwe khomotoola moliji wa modogwakhoo." 5 Helode aleapogile khomowolaga Yohana, ila angile akhovogopa vantu, kho nguno valevagoomba kete Yohana angile molooti wa Matuunda.

6 Ila panaa yaleyapikha nsiko ya mbina ya khokombola kholelwa khwa Helode, mwalele wa Helodia iija, igeya paulongolo ya vahenja. Helode aleasekelela modugo, 7 gechoo, "Akamolapela kete alamopela mwalele oyoo kento chechensi kenaa alapoga."

8 Mwalele oyoo aleawelwa no nyinya kento cha kholoomba. Mwalele oyoo akamowela Helode, "Nkhopooga onepele itwe la Yohana Mobatiji mwi sinela."

9 Mwami Helode aleasaya modugo, ila kho nguno angile alapaga paulongolo ya vahenja, gechoo akalagelelya vamopele mwalele oyoo itwe. 10 Gechoo, alealageleya muntu yomwii apete mokhandulunge khomodumula itwe Yohana Mobatiji. 11 Apenee muntu oyoo aleatuuwa ne itwe la Yohana molosela, amopela mwalele oyoo, nanoyo akikenkha khwa nyinya. 12 Vahemba va Yohana Mobatiji panaa valevategeela mpola eyoo, valevapeta khosola movimba yakwe, vapeta khowozyeekha, apenee vapete khomoweela Yesu mpola jensi jenaa alejapumeela.

13 Yesu panaa aleategela egoo gensi, aleawokha palwande epoo ne ipogo, apetaa kho lwande yenaa vantu vatapoya. Ila vantu panaa valevategela khonaa Yesu angile apetaa, valevapuma kho mahala gawe no khomoloonda Yesu kho megolo. 14 Yesu panaa aleatelemokha mwipogo, akawona idale ikolo la vantu, akavawonela losongo no khovapon'ya evoo vanaa angile valwile.

15 Panaa yaleyapikha mesee, vahemba vakwe vamopetela no khomoweela, "Epa khopwale pipalangwa ne otikho watelelaga, gechoo vadaye vantu ewa vapete kho mahala vigolele endya."

16 Ila Yesu akavaweela, "Khotopo nguno ya evenee khowookha, gechoo onywenywe movapele endya."

17 Ila evenee vakamoweela, "Khotite mekate jetaano ne nshe jewele topo," Avaweela.

18 Yesu akavaweela, "Moleete khwaane mekate ne nshe ejoo." 19 Apenee akavaweela vantu vikhale kho masanje, akasola mekate eyoo metaano ne nshe ejoo jewele, akunaa khochanya pa Matuunda, amosongela Matuunda. Papenee amegan'ya mekate eyoo, akavapela vahemba vakwe, nanevo vavagawela vantu. 20 Vantu vensi valevalya, vikota. Papenee vahemba vakwe vakungan'ya masigelo, vijolya vekhapu ikomi ne vewele. 21 Vantu vanaa angile valya endya eyoo angile vagwisha elufu jetaano, patokhola khovalya vakhiima ne vana.

22 Apaponye, Yesu akavalagelelya vahemba vakwe vatante mwipogo, valongole kho nkelo ya ilambo, ituungo lenaa omwene khodaya idale la vantu. 23 Yesu panaa aleamalya khodaya idale eloo la vantu, aleatanta kho ketonda aleemwi kholoomba. Ne mesee panaa yaleyapikha, omwene angile akhale apwale okhoo kho ketonda aleemwi. 24 Ne ituungo eloo ipogo angile yapikhaga pakhate ya ilambo, ila kewalawumbe angile okhoisunkha ipogo, kho nguno ipuuta ikhaka angile lekhovagilya.

25 Makingilima, Yesu aleapikha khonaa vahemba vakwe angile vapwale, okho akhogenda pachanya ya meje. 26 Panaa vahemba vakwe valevamowona akhogenda pachanya ya meje, valevatungumala modugo, no khwandya khojoma, "Owo a mogawo."

27 Apaponye, Yesu akavaweela, "Mowee vagimba a nene, mokhanyogope."

28 Petulo akamoweela, "Mwene, mbe khapanga a ogwegwe, onewele ngeende pachanya ya meje niije khwakhoo."

29 Yesu akamoweela, "Wiije." Apenee Petulo apuma mwipogo, andya khogenda pachanya ya meje no khomopetela Yesu. 30 Ila panaa aleawona ipuuta ikhaka, aleatungumala, andya khotwiina mo meje, akota khwa lolii, akapala, "Mwene nyalye."

31 Apaponye Yesu, agolola mokhono, amowamba no khomoweela, "Ogwegwe yunaa omogombile Matuunda kedo, kho kee okhotongumala?"

32 Yesu no Petulo panaa valevatanta mwipogo, ipuuta alelapola. 33 Apenee vahemba vanaa angile vapwale mwipogo, vamotungamela no khomoweela Yesu, vakapaala, "Khapanga ogwegwe a Mwana wa Matuunda."

34 Yesu palomwi ne vahemba vakwe, panaa valevalowokha ilambo, vakapikha kho nse ya Genezaleti. 35 Vantu va okhoo panaa valevatembola kete a Yesu, valevasambalya mpola lwande jensi ja pepi. Apenee vamoletela Yesu valwile vensi. 36 Nanevo vakamoloomba Yesu, avagombele vapalye topo ipeembo la mwenda gwakwe. Ne vensi vanaa valevapalya, valevapona.