1 Apenee Moye wa Matuunda akamonoja Yesu apete kho itenengwa, ili agemwe no Khatawe. 2 Nanoyo Yesu panaa aleamalya khotuunga kholya kho ituungo la nsiko makomi ganee, otikho ne lyonse, aleitegelaa njala. 3 Apenee Khatawe iija khomogema, no khomoweela, "Mbe ogwegwe a Mwana wa Matuunda, gapogee mabwee ega gagaloke gawee mikate."

4 Ila Yesu akamoweela, "Yandekhagwa kho Maandekho ga Matuunda kete, ‘Muntu khotopo ikhale khwa endya topo, ila khwa kela mpola yenaa ekhopuma khwa Matuunda.’ "

5 Papenee Khatawe aleamokenkhaa Yesu mpakha khwi ihala la Matuunda la Yelusalemu, no khomonoja imelele pachanya ya kensuunda cha Nyoomba ya Matuunda, 6 akamoweela kete, "Mbe ogwegwe ole Mwana wa Matuunda, wisombe panse, kho nguno yandekhagwa kho Maandekho ga Matuunda,

‘Matuunda alamolagelelya motomami wakwe wa khochanya khwakwe kho nguno yakhoo,

nanevo valakhokepola momekhono jawe,

ili megolo jakhoo jekiije jikumpe kho mabwee.’ "

7 Ila Yesu akamoweela kete, "Khanke yandekhagwa kho Maandekho ga Matuunda, ‘Okhamogeme Mwene Matuunda wakhoo.’ "

8 Apenee Khatawe akamosola Yesu no khomokenkha khochanya pa ketonda ketale no khomolageela owami wensi wa paliwelelo ne nsawo jakwe jensi jenaa nsoga. 9 Khanke akamoweela, "Ndakhopela eve vyensi mbe olantungamela no khonkumbekha."

10 Apenee Yesu akamoweela, "Pumaa paolongolo waane Khatawe, kho nguno yandekagwa kho Maandekho ga Matuunda kete, ‘Mokumbekee Mwene Matuunda wakhoo no khomotomamela omwene aleemwi.’ " 11 Papenee Khatawe akamolekha Yesu, ne vatomami va pachanya pa Matuunda viija khomotomamela.

12 Yesu panaa aleategelaa kete Yohana atungagwaa mo khandulunge, aleapetaa ihala la Galilaya. 13 Yesu akapuma Nazaleti, akapeta khwi ihala la Kapelanaumu, Genesaleti lenaa alenee ilambo Galilaya, lenaa lepwale kho udugo wa nse ya Zebuluni ne ya Nafutali. 14 Yaleyapumela gechoo, ili idugame mpola yenaa Matuunda aleapalaa khokelela Isaya molooti wa Matuunda, kete,

15 "Tegeleleli onywee vantu vanaa mokhwikhala kho nse ya Zebuluni ne ya Nafutali,

tegeleli onywee vantu va nse jenaa jepwale kho mpelo ya njela ja khopeta kho ilambo Galilaya,

ne nkelo ya lweje Yolodani,

tegeleli onywee vantu va Galilaya, kho nse ya vantu vanaa nkha Vayahudi.

16 Vantu vanaa vakhwikhala kho kitii

vawonaga welo mokolo,

ne evoo vanaa vakhwikhala mo molule gwa ncha,

vamolekelagwa no welo wa melaawo."

17 Mpuma ituungo eloo, Yesu aleandya khovatengela vantu, akipaala, "Mogelokelagi Matuunda no khogalekha mabe genyu, kho nguno owami wa khochanya khwa Matuunda watelelaga."

18 Yesu panaa angile khogendaa pampelo ya ilambo la Galilaya, akavawona valuwi vawele, Simoni yunaa angile akhwetwa Petulo, palomwi no Andelea modogwakwe. Valevakholuwa nshe khwa megonyo jawe mo ilambo. 19 Yesu akavaweela kete, "Mwiije mondonde, nane ndavanoja movalete vantu khwaane kete venaa mokholuwa nshe no khojekenkha khokhaye." 20 Apaponye valevalekha megonyo jawe, vakamoloonda Yesu.

21 Yesu panaa aleapetaa paulongolo kedo, aleavawonaa vadogo vaange vawele, Yakobo no Yohana, vanaa angile vana va Zebedayo. Evoo angile vapwale mwipogo palomwi no isewe, vakhonogelelya megonyo jawe. Apenee Yesu avetaa 22 apaponye valevalekha ipogo palomwi no isewe, vakamoloonda Yesu.

23 Yesu angile akhopilima kho mahala gensi ga Galilaya kho nyoomba ja khwitangela Vayahudi no khovaliga vantu omoo, khovantegela vantu Mpola Nsoga khougela owami wa Matuunda, no khovapon'ya malwile gawe gensi. 24 Mpola jakwe jalejasambaala kho nse yensi ya Silia. Vantu valevapeta ne valwile va malwile gensi, movamoonga vawe, valevapwale vanaa valevalwalile modugo, ne vanaa valevawambagwa ne mademi, ne vanaa angile vatite khafunta, ne vanaa valevapolajaa mowele, nanoyo Yesu aleavapon'yaa vensi. 25 Apenee vantu vinki angile vakhomoloonda khopuma kho Galilaya no kho Dekapoli, emaana yakwe nse ya mahala ikomi, Yelusalemu, ne Yudea, ne nkelo ya lweje Yolodani.