1 Yesu panaa alealelagwa kho ihala la Betelehemu kho nse ya Yudea, ituungo lenaa Helode angile mwami, vamanyi va njota khopuma keeya valevapikha Yelusalemu, 2 vaawa vakhowolya, "Alekwenii mwana yunaa alelagwa, ili awee mwami wa Vayahudi? Khwameyonaga njota yakwe kepumela keeya, nasu khwijaga khomokumbekha." 3 Mwami Helode panaa aleategela mpola eye, aleingelwa no wowa mokolo omwene palomwi ne vantu vensi va Yelusalemu. 4 Apenee Helode aleavakungan'ya valaala vensi va vapumya matambekho va Matuunda palomwi ne valaangi va njaanga ja Musa, avawolya, "Kilisto angaalalelwa kwenii?"

5 Nanevo vamoweela, "Alalelwa Betelehemu kho ihala la Yudea. Avyenee molooti wa Matuunda aleandekhaa.

6 ‘Nagwe Betelehemu ihala la Yudea,

ogwegwe nkha ihala la khobyeedwa mogamoonga ga mahala ga Yudea,

kho nguno khopuma khwakhoo alapumela mwimeleli yunaa alavaimelela vantu vaane va Izilaeli.’ "

7 Apenee Helode akavaeta khwa osweki vamanyi va njota evoo, ili viije vamopalele visoga ituungo lenaa valevandya khomeyona njota eyoo. 8 Papenee akavalagelelya vapete Betelehemu, no khovaweela kete, "Mopete momopoge visoga mpakha momanye khonaa mwana oyoo apwale. Nanyu panaa molamowona mwiije mondetele mpola jakwe nyango, ili nane nipete khomokumbekha."

9 Nanevo vakapuma khokhaye khwa mwami oyoo. Panaa valevapuma, valevameyona njota keeya, valevatogwaa modugo. 10 Njota eyoo yaleyavalongolya mpakha pa lwande yenaa aleapwale mwana oyoo. Yapeta khwimelela pachanya pa lwande yenaa aleapwale mwana oyoo. 11 Panaa valevingela mokhate ya nyoomba, vakamowona mwana palomwi no Malia onyinya, vamotungamela no khomokumbekha mwana, papenee vatungula miligo jawe no khomopumelya mfinga ja zahabu no obani palomwi no ogaanga monogu gonaa gokhwetwa manemane. 12 Matuunda aleavagilya kho ndoti vakhamotuwele khanke Helode, gechoo vatuuwa khokhaye jawe khwa khokelela njela jiinge.

13 Vamanyi va njota evoo panaa angile vawokhaga, motomami wa khochanya pa Matuunda amopumelaa Yusufu kho ndoti, akamoweela, "Lawelaa, omosole mwana no nyinya mokembelele kho nse ya Misili. Mwikhalage okhoo mpakha panaa ndavawela, kho nguno Helode akhopooga khomowolaga mwana oyo."

14 Apenee Yusufu akalawela, akamosolaa mwana palomwi no nyinya, vakawookha otikho awowoo khopeta kho nse ya Misili, 15 ne valevikhala okhoo mpakha panaa Helode aleafwaa. Mpola eyoo aleyanojekha ili empola yenaa aleapalaa Mwene khokelela khwa molooti wa Matuunda idugame. Panaa aleapalaa, "Nalenamweta mwanaane iije khopuma nse ya Misili."

16 Helode panaa aleamanyaa kete vamanyi va njota evoo vamopepelaga, aleasimbaa modugo. Apenee akavatoma masinjala vakwe vapete Betelehemu palomwi ne lwande jensi ja pepi, avalagelelya vapete vawawolage vana vakeke vensi va kegwisha. Aleanojaa gechoo khopumana ne ituungo lenaa aleawelwaa ne vamanyi va njota.

17 Avyenee venaa jalejadugama mpola jenaa jalejapaalwa khokelela khwa Yelemia yunaa angile molooti wa Matuunda kete,

18 "Lolii lwalelwategelekha khopuma kho ihala la Lama,

nkooto ne losongo nyinki.

Laheli khovakotelaa vanaakwe,

ninga akhaloma khopepeselwa,

kho nguno vanaakwe vensi vagulalaga."

19 Helode panaa aleafwaa, motomami wa khochanya khwa Matuunda akamopumela Yusufu kho ndoti okhoo Misili, 20 akamoweela, "Lawelaa, omosole mwana palomwi no nyinya, motuuwe kho nse ya Izilaeli, kho nguno evoo vanaa angile vakhopooga khomowolaga mwana, vafwaaga." 21 Apenee Yusufu akalawela, akamosola mwana palomwi no nyinya, atuuwa nanevo kho nse ya Izilaeli.

22 Ila Yusufu panaa aleategelaa kete Alikelo angile mwami wa nse ya Yudea panaa ise aleafwaa, aleatungumala khopeta okhoo. Matuunda aleamolanga kho ndoti, gechoo aleapeta kho nse ya Galilaya, 23 akasamela no khwikhala kho ihala la Nazaleti. Apenee yaleyadugama mpola yenaa yaleyapalwa khowogela Yesu khwa khokelela valooti va Matuunda kete, "Alaetwa Munazaleti."