1 Nsiko ayeyoo, Yesu aleapuma mokhate ya nyoomba apeta khwikhala kho mpelo ya ilambo no khwandya kholiga. 2 Madale ga vantu galegikhongan'ya no khomopilima, apenee atanta kho ipogo ikhala omoo, ne vantu vensi angile vimelela kho mpelo ya ilambo. 3 Nanoyo Yesu akavaliga mpola nyinki vantu vensi khwa mefwano.

"Tegeleli, muntu yomwii aleapeta khominja mbeyu momogoonda. 4 Panaa angile khominja mbeyu momogoonda gwakwe, mbeyu jiinge jalejagweela monjela ne nyonyi jiija jalyaa. 5 Mbeyu jiinge jalejagweela kho oloongo wonaa angile nkha mwinki. Mbeyu ejoo jalejaleemba nyango kho nguno oloongo angile kedo. 6 Ila panaa lyonse lalelajema, memelo eyoo yaleyanyaala no khokhala, kho nguno milii jakwe angile ikhatwina panse. 7 Mbeyu jiinge jalejagweela kho oloongo wonaa angile otite miyaa, miyaa eyoo jalejakhola no khwibananga memelo ejoo. 8 Jiinge jalejagweela mo oloongo mosoga, jaleemba, jalela, yeenge yalela nsanka igana ne yeenge yalela nsanka makomi sita ne yeenge yalela nsanka makomi gatato. 9 Owa matwi, ategeele."

10 Vahemba va Yesu vakamopetela no khomowolya, "Kho kee okhopaala ne vantu khwa khotomela mefwano?"

11 Yesu akavaweela, Matuunda avapelaga onywenywe omanyi no khogamanya ganaa giswekile khougela owami wakwe, ila vantu vaange akhavapela omanyi owo. 12 Khanke akavaweela, "Muntu yunaa atite kento alaongelelwa ne keenge, nanoyo alaawa atite vento vinki. Ila yeyensi yunaa atokhola kento, alasukhwa ninga kenaa amba atite. 13 Eye eyenee nguno nkhopaala nanevo khwa mefwano, kho nguno, vakukuuna ganaa nkhonoja, ila akhavagawine. Avivyoo, vakhotegeela ganaa nkhopaala, ila vakhamanya emaana yakwe. 14 Ega gakhonojekha gechoo, ili jidugame mpola jenaa aleapalaa Isaya molooti wa Matuunda kete,

‘Khotegeela molategeela, ila molalekha khomanya.

Khokuuna molakuuna, ila molalekha khowona.

15 Kho nguno meoyo ja vantu ewa javaaga mekhaku,

matwi gawe galimbaga,

miso gawe galimbaga.

Ili miso gawe gakhawone,

ne matwi gawe gakhategeele,

ne meoyo jawe jikhamanye,

vakiije vangalokele, ili nane nevapon'ye.’

16 "Ila onywenywe togagwi, kho nguno miso genyu gakhowona ne matwi genyu gakhotegeela. 17 Nkhovaweela khapanga, valooti va Matuunda ne vantu vinki vasoga valevatamanela vagawone egoo ganaa mokhogawona onywenywe, ila valevakhagawona, ne khotegeela ganaa mokhogategeela onywenywe ila valevakhategeela.

18 "Gechoo, onywenywe tegelelaji emaana ya mofwano wa mominji gwa mbeyu. 19 Muntu yeyensi yunaa khotegela mpola khougela owami wa khochanya pa Matuunda, ila akhakhomanya, muntu oyoo khwipyana ne mbeyu yenaa yaleyagwela mo njela. Papenee Khatawe akhwija ne khosola eloo lenaa Matuuunda atulagaa mokhate mwakwe. 20 Mbeyu ejoo jenaa jalejaminjwa kho oloongo wonaa nkha mwinki, a muntu yunaa akhotegeela Mpola ya Matuunda, ne apaponye akhopokeela khwa otogwi. 21 Ila olewamba mpola eyoo kho ituungo ikupe topo, kho nguno akhaikhotwiina modugo mokhate yawe. Epo magayo ne magayanjo panaa gakhovijela kho nguno ya mpola eyoo, apaponye vakholekhaa khoyegoomba. 22 Mbeyu jenaa jalegweela kho miyaa, jekhopyanekelwa no muntu yunaa khotegeela Mpola ya Matuunda. Ila kho nguno ya khotungumala khougela opanga, no khopepelwa ne matamanelo ja nsawo. Olebananga mpola ne vakhakhowola kholela viligi. 23 Ila mbeyu jenaa jalejagweela mo oloongo mosoga, a mofwano wa vantu vanaa vakhotegeela Mpola ya Matuunda ne kholemanya. Nanevo vakholela viligi, yomwii kholela igana no yoonge kholela makomi sita no yoonge kholela makomi gatato."

24 Yesu akavaweela mofwano woonge, "Owami wa khochanya pa Matuunda okhwipyana ne muntu yunaa aminjaga mbeyu nsoga kho mogoonda gwakwe. 25 Ila ituungo lenaa vantu vagonile, nyambuda wakwe iija no khovyala ndagu pakhate ya ogosi, papenee akapeta. 26 Panaa ogosi owoo walewalemba no khwandya khovelekha, apenee ndagu nanejo jiigela. 27 Vatomami va oyoo wa mogoonda vamopetela no khomowolya, ‘Meyaa khomanyile kete angawaminjaga mbeyu nsoga kho mogoonda gwakhoo, seji ndagu japumaga khwenii?’ 28 Nanoyo akavaweela, ‘Nyambuda amwenee anogaja gechoo.’ Apenee vatomami vakamowolya, ‘Mbi opogile khopete khogalimbule?’ 29 Nanoyo akamoweela, ‘Khotopo, mokhagalimbule, kho nguno mbe molimbule ndagu, molakhowola kholimbula ne ogosi. 30 Moleke vyensi vekole palomwi mpakha ituungo la khokungula. Ituungo eloo ndavaweela vakunguli kete, vakungan'ye taali ndagu ne khogatuunga ne khogatuula kho maloondo ili vagatime. Ila vakungule ogosi, vaituule mo keyenge.’ "

31 Yesu akavaweela mofwano goonge, "Owami wa khochanya pa Matuunda okhwipyana ne mbeyu wa ipeke lenaa lekhwetwa mohaladali, muntu yomwii aleayesola ne khoyevyala kho mogoonda gwakwe. 32 Mbeyu eye a nndo khokela mbeyu jensi, ila panaa ikholemba no khokola, ikhowa nkolo khokela mapeke gensi, ninga nyonyi jiijile ne khonogelelya vityoo vyawe kho matambe gakwe."

33 Yesu akavaweela mofwano goonge, "Owami wa khochanya pa Matuunda okhwipyana ne amila yenaa mokhiima aleayesola, ayesalenkhan'ya kho madebe gatato ga otuu, ne otuu wensi watuta."

34 Yesu aleavawelaa vantu egoo gensi khwa mefwano. Omwenee aleakhavaliga chechensi patokhola khotomela mofwano. 35 Egoo aleganojekha gechoo, ili mpola yenaa aleyapalwa no molooti wa Matuunda idugame, kete

"Ndapala nanevo khwa mefwano.

Ndavaweela mpola jenaa vantu valevakhajemanya mpuma khowombwa khwa liwelelo."

36 Apenee Yesu aleavadaya evoo vantu, engela kho nyoomba. Vahemba vakwe vakamopetela, vakamoweela, "Khodadamolele emaana ya mofwano gwa ndagu jenaa jalejepwale momogoonda." 37 Yesu akavaweela, "Muntu yunaa aleavyala mbeyu nsoga, a Mwana wa Muntu. 38 Mogoonda a liwelelo. Ne mbeyu nsoga a vantu va owami wa khochanya pa Matuunda. Ne ndagu a vantu va oyoo mobe. 39 Nyambuda yunaa aleiija khovyala ndagu a Khatawe. Makongola a odugo wa liwelelo, nanevo vakunguli a vatomami va khochanya pa Matuunda. 40 Kete ndagu venaa jekhokunganywa no khotimwa momoto, avyenee elaawa kho odugo wa liwelelo. 41 Mwana wa Muntu alavalagelelya vatomami va pachanya pa Matuunda, ili vavakungan'ya khopuma kho owami wakwe vantu vensi vanaa vakhovapwelya vaange ili vanoje mabe, ne vensi vanaa vakhonoja mabe, 42 ne vatomami evoo va khochanya pa Matuunda valavajuuta kho moto gonaa gokhalimaga nsiko jensi patokhola modugo, ne okhoo valakota no kholoman'ya mino kho nguno ya osaati. 43 Vantu vanaa valevamotegelelya Matuunda, evoo avenee valang'alala kete lyonse kho owami wa Isewe. Owa matwi ategeele.

44 "Owami wa khochanya pa Matuunda, opyanilwe ne kento cha mpia nkolo kenaa alechaswekhaga momogoonda. Muntu yomwii aleakewona ne akakeswekhaa khanke. Aleasekelela modugo, apenee aloma khopeta khogolya vento vyakwe vyensi venaa angile atite, ili agole mogoonda ogoo.

45 "Khanke, owami wa khochanya pa Matuunda, gwipyanile no mogolya vento yomwii yunaa angile khopogaa kento kenaa kekhwetwa lulu. 46 Panaa aleapata kento cha mpia nkolo kenaa kekhwetwa lulu, akapeta khogolya vento vyakwe vyensi, ne khogola lulu.

47 "Owami wa khochanya pa Matuunda okhwipyanekelwa ne mogonyo gonaa valuwi valevagojotela kho ilambo. Mogonyo ogoo alewakungan'ya nshe mosalinkhano. 48 Mogonyo owo panaa alewijola, valuwi valevawokhwesa kho mpelo ya yiilambo. Apenee vikhala pansi, vakungan'ya nshe vasoga, vawatuula mo vekhapu. Ila nshe jenaa nkha nsoga valevajijuta. 49 Gechoo, avyenee ilaawa kho odugo wa liwelelo. Vatomami va pachanya pa Matuunda, valiija ne khovabegola vantu vabe ne vasoga. 50 Apenee valavajuta vanoja mabe kho moto gonaa gokhalimaga nsiko jensi patokhola odugo, no omoo valakota no kholoman'ya mino khwa osaati.

51 "Yesu akavawolya, Mbi, mwajemanyaga mpola eji jensi?"

Nanevo vakamoweela, "Avyenee, khwamanyaga."

52 Papenee akavaweela, "Gechoo, kela molaangi wa njaanga ja Musa yunaa khowaa mohemba kho owami wa khochanya pa Matuunda, khwipyana no yunaa atite nyoomba yunaa khopumya kho nsawo yakwe vento vepyaa ne vya myakha."

53 Yesu panaa aleamalya khopaala mefwano eyoo, akawokha epoo, 54 akatuuwa khokayawe khonaa alealwa Nazaleti. Panaa aleapikha okhoo, andya khovaliga vantu kho nyoomba yakhwitangela Vayahudi, nanevo valevakumya no khowolya, "Muntu oyo apataga khwenii masala ega?" "Ne olaala wa khonoja matuntumu ega? 55 Mbi, oyo nkha mwana oyoo wa moponji? Mbi, Onyinya nkha Malia, ne vadogwakwe nkha, a Yakobo no Yusufu no Simoni palomwi no Yuda? 56 Mbi ne velombo vakwe vensi nkha vanaa khokhwikhala nanevo epa? Gechoo muntu oyoo apataga khwenii mpola jensi eji?" 57 Vantu evoo vamosimbela, vasiita khomogoomba.

Yesu akavaweela, "Vantu vakhomokolya molooti wa Matuunda pepensi epoo, ila vantu va nse yakwe ao khokhayakwe, akhavakhomokolya." 58 Gechoo, Yesu aleakhanoja matuntumu minki okhoo, kho nguno vantu evoo valevakhamogomba.