1 Igolo lakwe melawo ya makingilima, valaala va vapumya matambekho ne vakhoombi valaala va Vayahudi palomwi ne valaangi va njaanga ja Musa valevigombyaa khomowolaga Yesu. 2 Apenee vakamotuunga ngosa no khomokenkha khwa Pilato, yunaa angile molaala wa Kelumi.

3 Epoo, Yuda yunaa aleamogalokhaa Yesu, panaa aleawonaa Yesu atengemekhagwaa ili awolage, mooyo gwakwe alegwamosaata modugo. Asolaa vechele evyoo vya madini ga feza, no khojetuvya khwa valaala va vapumya matambekho ne vakhoombi valaala va Vayahudi. 4 Yuda akavaweela, "Nanogajaa obe khwa khomopumya muntu oyo yunaa atokhola ibe lelensi khowolagwa." Ila evenee vakamoweela.

"Egoo osweswe gakhatoloma, eloo a ilamoli lakhoo gwegwee."

5 Apenee Yuda avesombelaa vechele evyoo kho Nyoomba ya Matuunda, no khopeta khwiniga.

6 Valaala va vapumya matambekho vasolangela vechele evyoo no khopaala, "Vechele evi vekhapogiwa khotoolwa ne vechele vya Nyoomba ya Matuunda, kho nguno vechele evi angile malepo ga khomowolaga muntu." 7 Apenee valevapalana no khwigombya khosola vechele evyoo no khogolela mogoonda gwa mowoombi wa nyoongo, ili gowee mogoonda gwa khozyekela vahenja. 8 Eye ayenee nguno ya mogoonda ogoo khwetwa, "Mogoonda gwa Chaji" mpakha seji.

9 Gechoo, mpola ja molooti Yelemia jalejadugama jenaa jalejapaalwa, "Valevasola vechele makomi gatato ga madini ga feza, jenaa Vaizilaeli valevagooomba kholepa kho nguno yakwe. 10 Valevajetomela vechele evyoo khwa khogolela mogoonda gwa mowoombi wa nyoongo, kete venaa Mwene Matuunda aleandagelelajaa."

11 Yesu panaa aleakenkhwaa paolongolo wa Pilato, yunaa angile molaala wa ihala la Kelumi no yunaa aleatulwaa ne Valumi. Oyoo molaala wa ihala akamowolya Yesu, "Mbi, ogwegwe amwenee mwami wa Vayahudi?" Yesu akamoweela.

"Ogwegwe wapalaga?" 12 Ila valaala va vapumya matambekho ne vakhoombi valaala va Vayahudi panaa valevamositachaa, Yesu aleakhapala chechensi. 13 Apenee Pilato akamowolya Yesu khanke, "Mbi, okhagategela egoo gensi ganaa vakhokhositachaa?"

14 Ila Yesu aleakhapala chechensi, no Pilato akumyaa modugo.

15 Kho nsiko ya Pasakha, molaala wa Kelumi angile atite omanyani wa khomolekolela motungwa yomwii yunaa vantu angile vakhomopooga. 16 No kho nsiko ejoo, angile apwale motungwa yomwii yunaa angile vantu vamomanyile modugo, yunaa akhwetwa Balaba. 17 Gechoo, vantu panaa alevakonganaga palomwi, Pilato avawolya, "Mokhopooga nevatungolele ananuu movamoonga mo ewa vawele? Nevatungolele Balaba ao Yesu, yunaa akhwetwa Kilisto?" 18 Pilato aleawolya gechoo, kho nguno angile amanyile kete valaala va Vayahudi valevamoleeta Yesu khwakwe kho nguno ya wiilu wawe topo.

19 Pilato panaa angile ikhalagaa pa kegoda cha matengemekho, molijakwe amotomelaa okhombe wonaa angile okhopaala, "Okhamonojele obe wewensi muntu oyoo, kho nguno atokhola obe wewensi, kho nguno otiko nagayaga modugo mo ndoti kho nguno yakwe."

20 Ila valaala va vapumya matambekho ne valaala va Vayahudi valevakhosongan'ya vantu vamolombe Pilato amodigolele Balaba apete, no Yesu awolagwe. 21 Pilato akavawolya khanke, "Mbi, ananuu yunaa mokhopooga nemolekolele apete movamoonga mwa ewa vawele?" Nanevo vakamoweela.

"Khokhopooga omolekolele Balaba."

22 Pilato akavawolya khanke, "Nemonoje kee Yesu, yunaa akhwetwa Kilisto?" Vantu vensi valevajoma no khopaala.

"Ananamolwe pachanya pamosalaba."

23 Pilato akavawolya khanke, "Anogajaa obe kee?"

Ila evenee vendelela khojoma no khopaala, "Ananamolwe pachanya pamosalaba."

24 Pilato panaa aleawonaa kete akhakhowola khogalolya maheewo ga vantu evoo, ne avivyoo vandajaa iwo, asolaa meje no khokhalawa mekhono paolongolo wa idale la vantu, akapaala, "Onene ntapoya, ncha yakwe molamanya nywenywe."

25 Vantu vensi vakapaala, "Chaji yakwe ewaage khwisu sweswee no khwa vana visu."

26 Apenee Pilato akavalekolela Balaba, khanke akavalagelelya masinjala vakwe vamofwembe Yesu menyepo ja ntila no khopeta khomonanamola pachanya pamosalaba.

27 Apenee masinjala va Pilato vakamosola Yesu no khomokenkha mokhate ya ikolo ya molaala wa ihala, idale lensi la masinjala lakongana no khomopilima Yesu. 28 Vamolyola myenda jakwe no khomolyekha mwenda mokhasuku. 29 Khanke vanogelelya nkhata ya miiya no khomolyekha khwiitwe, no khomotolela nkhome ya mwanzi kho mokhono gwakwe gwa molyelo, ili iigele kete mwami. Vakamotungamela paolongolo wakwe no khomoletela makelege, apenee vandya khomolamochaa khwa khopaala, "Tokhokholamochaa Mwami wa Vayahudi." 30 Vamotyela matye no khosola nkhome eyoo ya mwanzi no khomokowela naneyo khwiitwe. 31 Masinjala evoo panaa valevamalya khomobyeda, vamolyola mwenda gwa kewami no khomolyekha khanke myenda jakwe. Apenee vamopumya panji ya ikolo ya molaala wa ihala no khowookha nanoyo khopeta khomokowelela pamosalaba.

32 Masinjala panaa valevapwale monjela, valevitaanga no muntu yomwii yunaa khwetwaa Simoni, yunaa akhopumela ihala la Kilene. Nanoyo vamong'ang'anelya akepole mosalaba gwa Yesu. 33 Panaa valevapikha lwande yenaa ekhwetwa Goligota, emaana yakwe, "Ibanka la Motwe". 34 Apenee masinjala vakamopeela Yesu divai yenaa esalenkine no ogaanga okhakha wa khopongolya osaati, ila panaa aleagemaa, asitaa khong'weela.

35 Panaa valevamalya khomonanamola Yesu pamosalaba, vigawela myenda jakwe khwa khojekowela ndiku. 36 Apenee masinjala evoo vikhala epoo ili khomolindelelya. 37 Pachanya ya itwe pa mosalaba, valevandekha nguno ya omwene khowolagwa, "Oyo a Yesu Mwami wa Vayahudi." 38 Yesu aleananamolwa pamosalaba palomwi ne vasuki vawele, kela yomwii pa mosalaba gwakwe palomwi no Yesu, yomwii aleapwale lwande lwa molyelo wa Yesu no yoonge lwande lwa mokege wa Yesu.

39 Vantu vanaa angile vakhokela epoo, valevayongan'yaa mitwe jawe no khomotokha Yesu khwa khopaala, 40 "Ogwegwee alewapaala, nokhowola khobomola Nyoomba ya Matuunda no khoejeenga khwa nsiko jetato topo. Mbe ogwegwee ole Mwana wa Matuunda, wipon'ye gwegwee no khwitelemola pamosalaba."

41 Avivyoo, valaala va vapumya matambekho ne valaangi va njaanga ja Musa palomwi ne valaala va Vayahudi angile vakhomobyeeda no khopaala, 42 "Aleavayawola vantu vaange, ila akonyagaa khwiyawola mwenee. Mbe khapanga omwene a mwami wa Vayahudi. Gechoo, atelemokhe pamosalaba, apenee naswi kholamogomba. 43 Omwene akhomosowelela Matuunda, gechoo Matuunda amoyawole pamosalaba, mbe Matuunda amotogilwe kho nguno angile akhopaala onene a Mwana wa Matuunda."

44 Avivyoo, ninga vasuki vanaa angile vananamolagwa kho mesalaba palomwi no Yesu, nanevo angile vakhomotokha kete venaa ne vaange angile vakhomotokha.

45 Khwandelya ituungo lenaa lyonse angile lepwale pakhate, kiiti yaleyaigubekha nse yensi mpakha panaa yalelapikha ituungo la saa kenda ya lyonse. 46 Panaa yaleyapikha saa kenda ya lyonse, Yesu aleajomaa no khopaala, "Eloi, Eloi, lama sabakitani?" Emaana yakwe, "Matuunda waane, Matuunda waane, kho kee wandekhaga?"

47 Vamoonga va vantu vanaa angile vemaga epoo, panaa valevategeela gechoo, valevapaala, "Motegeleli, akhomwetaa Eliya." 48 Apaponye muntu yomwii aleakembelaa lowelo, ijaa adobya idodoki mo divai yenaa angile yasasaga, asopekhaa pachanya ya mwanzi anyanyolaa no khomopeela Yesu ili ang'weele.

49 Ila vaange valevapaala, "Lekhaa khowone mbe Eliya aliija khomoyawola." 50 Epoo, Yesu aleakotaa khanke khwa khojoma, papenee afwaa.

51 Ituungo aleloo, lepazia lenaa angile lepwale kho Nyoomba ya Matuunda, lalelademokha mabaande gawele khwandelya pachanya mpakha panse. Avivyoo, lalelapumeela ilindimya lenaa lalelakenkelelya mapampa khodemokha. 52 Makhabuli galegadigokha ne mewele minki ja vantu va Matuunda vanaa angile vafwaaga, valevafufolwa, 53 vakapuma mo makhabuli gawe. Yesu panaa alefufokha, vingela kho Yelusalemu ihala la Matuunda, no vantu vinki valevavawona.

54 Mwimeleli wa masinjala palomwi ne vanaa angile vakhomolindelelya Yesu, panaa valevawona ilindimya la nse ne gaange gensi ganaa galegapumeela, valevatungumala modugo, no khopaala, "Khapanga, muntu oyo angile Mwana wa Matuunda."

55 Ne epoo valevapwale vakhiima vinki vanaa angile vakhomoloonda Yesu khopuma kho Galilaya, angile vakhomwalya. Vakhiima evoo angile vimelelaga khotale vakhokuuna gensi ganaa angile gakhonojekha. 56 Mo vakhiima evoo, valevapwale Malia wa kho Magidala no Malia nyinya wa Yakobo no Yosefu, palomwi no moliji wa Zebedayo.

57 Panaa yaleyapikha mesee, aleijaa muntu yomwii mosawi yunaa akhwetwaa Yosefu, yunaa mwikhali wa ihala la Alimataya, omwenee nanoyo angile mohemba wa Yesu. 58 Yosefu aleapetaa khwa Pilato, no khomoloomba movimba gwa Yesu. Apenee Pilato akavalagelelya masinjala vakwe vamopele movimba ogoo. 59 Yosefu agosolaa movimba ogoo no khogopilingelya mo shanda, 60 no khogotuula mokhabuli, lenaa angile leponjilwe pi ipampa. Papenee abilingityaa ibwee ikolo, no khokundekela pamolyango wa khabuli. Panaa aleamalya khonoja gechoo, akawookha. 61 Malia wa kho Magidala palomwi no Malia oyoo yoonge, angile vikhalaga epoo vakhokuuna khabuli.

62 Igolo lakwe, yenaa angile Nsiko ya Khosuupa, valaala va vapumya matambekho palomwi ne Mafalisayo valevamopetela Pilato, 63 no khomoweela, "Meyaa, khokombwike kete oyoo mopepi panaa angile akhale mopanga, aleapalaa, ‘Kho nsiko ya otato, ndafufokha.’ 64 Gechoo, khokholoomba ovalagelelye masinjala vakhoo valindelelye khabuli mpakha nsiko ya otato. Mbe olalekha khotoola valindeleli, vahemba vakwe navakhowola khwija no khwiwa movimba gwakwe no khopeta khovapepela vantu kete afufokhagaa. Mbe valanoja gechoo, opepi owoo wa odugo olaawa mobe khokela owoo mwandyo."

65 Pilato akavaweela, "Solagi masinjala mopete molindelelye khabuli visoga venaa mokhowile."

66 Apenee vapeta kho khabuli no khotoola kelageeli kho ibwee, ili mbe muntu alabilingitya ibwee eloo, vakhowole khomanya, no khovatoola masinjala epoo ili valelindelelye khabuli eloo.