1 Kho ituungo lenaa valevapwale kho ihala la Nazaleti, aleapumela muntu yomwi yunaa alekhwetwa Yohana Mobatiji. Muntu oyoo aleigela kho ipalangwa la Yudea, aleijaa oko akhotangazya khwa khopaala, 2 "Galokhagi no khogalekha mabe genyu, kho nguno owami wa khochanya khwa Matuunda watelelaga." 3 Yohana amwenee yunaa aleapalwa no Isaya molooti wa Matuunda kete,

"Muntu khojomaa pipalangwa akipaala,

momonogelelye Mwene njela yakwe,

Gololagi vejela visoga monaa alakela."

4 Yohana alealyala mwenda gonaa gonogelilwe no wage wa ndimwana yunaa khwetwaa ngamia no khwituunga mokhanki gwa ntila pakeweno chakwe. Endya yakwe angile mpandi no woke. 5 Vantu vinki valevamopetela khopuma kho ihala la Yelusalemu, no khopuma lwande jensi ja Yudea, no khopuma lwande jensi ja mompelo ja lweje lwa Yolodani. 6 Valevapaala mabe gawe paolongolo wa Matuunda no khogalekha, nanoyo Yohana akavabatija kho lweje lwa Yolodani.

7 Ila Yohana panaa aleawona Mafalisayo ne Masadukayo vakhomopetela khwa winki ili avabatije, akavaweela, "Onywee mole kete njokha, a nanuu yunaa avalangagaa mokekembele kesila cha Matuunda kenaa kiijile? 8 Gechoo ikhalagi wikhalo wonaa okholageela kete mwalekhaga mabe genyu gensi. 9 Lekhagi khwiganekha no khwipalela kete, ‘Daada yisu a Abulahamu.’ Nkhovaweela khapanga, Matuunda nokhowolaa khogelolya mabwe ega gawee vana va Abulahamu. 10 Ntemo ya Matuunda yandalelagwa khovatengemekha kete venaa ekhotipa matina ga mapeke. Vantu vanaa vakhavakhonoja manoji masoga, valatengemekhwa, kete venaa kela ipeke lenaa lekhalekholela viligi visoga lekhodomolwa no khojutelwa mo moto. 11 Onene nkhovabatija kho meje kholageela mwagalokhaga no kholekha mabe genyu, ila muntu yunaa ijilee panaa onene amba nakelaga, atite olaala khokela onene, yunaa nkhalomwa ninga khotungula ngosa ja ntajee jakwe. Kho nguno omwene alavabatija khwa Moye wa Matuunda no khwa moto. 12 Omwene avambagaa losela mo mekhono jakwe, ili apepemole ogosi, ne mpuumba ja ogosi jepepemolwe. Alaokongan'ya ogosi mo kienge, ne mpuumba ejoo alajetima mo moto gonaa gokhalimaga."

13 Papenee Yesu aleijaa khopuma Galilaya mpakha Yolodani, ili abatijwe no Yohana. 14 Ila Yohana aleagemaa khomositela, akamoweela, "Onene amwenee nkhopogiwa khobatijwaa nagwe, gechoo, kho kee ogwegwe okhwija khwaane?"

15 Ila Yesu akamoweela, "Ogwegwe nibatijee seji, kho nguno khokhopogiwa khonoje gensi ganaa Matuunda khopogaa." Apenee Yohana akagoomba khomobatija.

16 Yesu panaa aleamalyaa khobatijwa no khopuma mo meje, timpu, khochanya khwa Matuunda khwadigokha, nanoyo aleamowonaa Moye wa Matuunda khotelemokhaa pachanya yakwe kete njewa. 17 Apenee lolii lwategelekha khopuma khochanya khwa Matuunda lonaa lokhopaala, "Oyo amwene mwanaane aleemwi yunaa nkhotojwaa nanoyo."