1 Yesu panaa aleamalya khopaala egoo gensi, akavaweela vahemba vakwe, 2 "Momanyile kete jasigaga nsiko jiwele ili opike mbina ya Pasakha, no Mwana wa Muntu alakenkhwa khwa vantu vabe ili ananamolwe pamosalaba."

3 Ituungo eloo valaala va vapumya matambekho ne valaala va Vayahudi valevitaanga palomwi kho nyoomba ya Kayafa, yunaa a molaala wa vapumya matambekho. 4 Omoo vakapooga njela ya khomogweela no khomowolaga Yesu. 5 Ila valevapooga mpola eyoo ekhanojwe kho mbina ya Pasakha, kho nguno vantu vakhiije vanojee iwo.

6 Yesu angile Betania khokhaye khwa Simoni, yunaa pamyakha angile molwile wa malimwa. 7 Itungo lenaa Yesu angile akholya endya ya mesee, mokhiima yomwii aleijaa ne nsopa yenaa ikhonogelelwa khwa ibwee lya Alabasta. Nsopa eyoo angile etite makuta ga mpia nkolo ne matukeleli. Aedigolaa nsopa eyoo no khomwitekelya Yesu makuta egoo khwi itwe. 8 Vahemba vakwe panaa valevawona gechoo, valevakilwa modugo no khopaala, "Kho kee akhononaanga makuta ga mpia nyinki gechoo? 9 Makuta ega angavalakhowola khogagolya khwa mpia nyinki modugo, ne mpia ejoo vapeelwe vapeena." 10 Yesu aleamanyaa kenaa angile vakhoheewa, akavaweela, "Kho kee mokhomogayanjaa mokhiima oyo? Omwenee aleanojelya mpola nsoga. 11 Onywenywe molaawa palomwi ne vapeena nsiko jensi, ila onene ndaawa ndekhotopo palomwi nanyu nsiko jensi. 12 Mokhiima oyo anitekelelajaa makuta egoo ili khogwandalela mowele gwaane kho nguno ya nsiko ya khozyeekhwa khwaane panaa ndaawa nafwaaga. 13 Nkhovaweela khapanga, kho nse jensi panaa vantu valaawa vakhoteenga Mpola Nsoga, mpola eye nsoga yenaa mokhiima oyo anojelajaa, elatengwa ne vantu valamokombola."

14 Yuda wa kho Kalioti, yunaa angile yomwii wa vahemba ikomi ne vawele va Yesu, aleapetaa khwa valaala va vapumya matambekho, 15 no khovawolya, "Molandepa kento kee mbe ndamogalokha Yesu paolongolo wenyu?" Apenee, valaala va vapumya matambekho vamopeela mabaande makomi gatato ga madini ga feza. 16 Khwandelya ituungo eloo, Yuda andya khopooga njela nsoga ya khomogalokha Yesu.

17 Nsiko ya mwandyo ya mbina ya mikate yenaa ikhatulwa amila, vahemba va Yesu valevamopetela no khomowolya, "Mbi, okhopooga khopete kwenii khonaa kholakhwandalela endya ya mbina ya Pasakha?"

18 Yesu akavaweela, "Mopete khwa muntu yomwii kho ihala la Yelusalemu, momowele geeke, ‘Molaangi khopalaa, ituungo laane latelelaga. Onene palomwi ne vahemba vaane kholaalya endya ya Pasakha pakhaye yakhoo.’ "

19 Gechoo, vahemba vakwe vapeta no khonoja kete venaa Yesu avalagelelajaa, nanevo vandalela endya ya Pasakha.

20 Panaa yaleyapikha mesee, Yesu palomwi ne vahemba vakwe ikomi ne vawele, valevikhala no kholya endya. 21 Panaa angile vakholya endya, Yesu aleapalaa, "Nkhovaweela khapanga, yomoonga wenyu alangalokha."

22 Vahemba vakwe panaa valevategeela gechoo, valevasaaya modugo, ne kela yomwii akamowolya, "Mbi, amba onene Mwene?"

23 Yesu akavaweela, "Yunaa akhodobya mokate mwibakuli palomwi nane, oyoo amwenee alangalokha. 24 Khapanga, Mwana wa Muntu alaafwa kete venaa yaleyandekhwa kho Maandekho ga Matuunda, ila alakewona muntu oyoo yunaa alamogalokha Mwana wa Muntu. Angaamba visoga muntu oyoo angaakhalelwe."

25 Apenee Yuda yunaa amwenee alamogalokha Yesu, akamoweela, "Molaangi, mbi, a onene?"

Yesu akamoweela, "Ogwegwe wapalaga."

26 Panaa valevakholya endya, Yesu asolaa mokate akamosongela Matuunda, apenee agomegan'ya no khovapeela vahemba vakwe, no khovaweela, "Solagi, molyee, ogo a mowele gwaane."

27 Khanke, asolaa kekhombe kenaa angile ketite divai, akamosongela Matuunda, no khovaweela, "Ng'welagi vensi khwa kekhombe eke." 28 "Kho nguno eye a chaji yaane yenaa ekhwitekha kho nguno ya vantu vinki ili vawokelwee mabe gawe. Ne chaji eye ekholageela ilekhaano la Matuunda ne vantu. 29 Nkhopooga momanye kete, khotopo niije ng'weele khanke divai ya mozabibu mpakha nsiko yenaa ndang'wela divai mpya palomwi nanyu kho owami wa Daada yaane."

30 Khanke panaa valevamalya khwemba nyembo ja khomokolya Matuunda, vakawookha no khopeta kho ketonda cha Mizeituni.

31 Yesu akavaweela vahemba vakwe, "Otiko wa leelo onywenywe vensi molakembela no khondekha. Elaawa kete venaa Matuunda aleapalaa kho Maandekho gakwe kete, ‘Ndamowolaga mosoongi wa nkholo, ne nkholo jelasambala.’ 32 Ila panaa ndafufokha, ndavalongole khopeta Galilaya."

33 Petulo akamoweela Yesu, "Ninga mbe vensi valakholekha, onene khotopo niije nkholeke ninga nsiko yemwii." 34 Yesu akamoweela Petulo, "Nkhokhoweela khapanga kete, otiko wa leelo panaa njogolo elaawa ekhale khowekha, olaawa wansitaga mala jetato kete okhanimanya onene."

35 Ila Petulo akamoweela Yesu khanke, "Ninga mbe ndapogiwa nfwee palomwi nagwe, khotopo niije nkhosite ninga kedo."

Ne vahemba vaange vensi valevapaala avivyoo.

36 Yesu palomwi ne vahemba vakwe, valevapeta kho lwande yemwii yenaa ekhwetwa Getisemane. Yesu akavaweela, "Mwikhale epa, onene nipetile epoo paolongolo kholoomba." 37 Akavasolaa Petulo palomwi ne vana vawele va Zebedayo. Apenee Yesu aleandyaa khosaaya no khotaanka momooyo gwakwe. 38 Epoo Yesu akavaweela, "Mooyo gwaane gotite osaati mokolo wonaa gokhonkenkelelya ninga khofwa. Mwikhale epa mokeyole palomwi nane."

39 Apenee omwenee atelelaa paolongolo kedo, atungamaa no khosunamya itwe lakwe panse no kholoomba, "Daada yaane, mbe nekhowolekhaa, nkhokholoomba ombokelye kekhombe eke cha magayo. Ila okhanoje kete venaa onene nkhopooga, ila nojaa kete venaa ogwegwe khopooga."

40 Apenee Yesu atuwaa panaa angile avalekhagaa vahemba vakwe evoo vatato, avapikhaa vagonaga ndoolo. Akamowolya Petulo, "Mbi, mwakonyaga khwikhala miso palomwi nane ninga khwa ituungo lemwii? 41 Keyolagi no khomoloomba Matuunda ili mogakinde magemo, kho nguno moye gokhopooga khonoja vento vesoga, ila mowele gotokhola ngulu."

42 Yesu akavalekha apaponye no khotuuwa khanke akhokhonye khwa mala ya owele khomoloomba Matuunda khwa khopaala, "Daada yaane, mbe kekhombe eke cha magayo kekhakhowolekha khowochwaa khwaane, gechoo, nogajaa venaa okhopooga." 43 Panaa aleatuwaa khwa vahemba vakwe evoo vatato, akavapikha vagonaga ndoolo khanke, kho nguno angile vatite ndoolo nyinki.

44 Yesu akavalekha khanke, apetaa khomoloomba Matuunda khwa mala ya otato, atuwelelya kholoomba maloombi agagoo. 45 Apenee atuwaa khwa vahemba vakwe no khovaweela, "Mokhale mogonile no khosuupa? Kunagi, ituungo lapikhaga no Mwana wa Muntu akholekhwa agweelwe. 46 Lawelagi khopete. Kunagi, ijilee oyoo yunaa alangalokha."

47 Yesu panaa angile akhale khopalaa nanevo, apaponye, Yuda yomwii wa vahemba vakwe ikomi ne vawele, ijaa palomwi ne idale ikolo la vantu vanaa vatite mpanga ne malungu. Ewa vensi angile vatomilwe ne valaala va vapumya matambekho ne vakhoombi valaala va Vayahudi. 48 Yuda yunaa alamogalokha Yesu, angile avapelagaa lomekho vantu evoo kete, "Yunaa ndamosona mokhono amwenee ayoyoo, momogwele."

49 Apaponye, Yuda apetaa khwa Yesu no khomoweela, "Ole mopanga Molaangi." Apenee amosonaa mokhono.

50 Yesu akamoweela, "Molashane, nogajaa kenaa okhopooga khonoja."

Apaponye vantu evoo viija khomogweela Yesu no khomotuunga. 51 Apaponye yomwii wa vamoonga vanaa angile vapwale palomwi no Yesu, akasomola nsiime yakwe nkolo no khomokowa motomami molaala wa vapumya matambekho no khomodomola itwi lakwe. 52 Ila Yesu akamoweela, "Tuvyaa nsiime yakhoo mo mofukho gwakwe, kho nguno muntu yeyensi yunaa khotomelaa nsiime ili awolage, nanoyo alawolagwa khwa nsiime. 53 Mbi, mokhamanya kete angaankhowola khomoloomba Daada yaane anyalye? Nanoyo ituungo lemwii angaalantomela masinjala wa vatomami vakwe va pachanya madale makolo ikomi ne gawele no khokelelyaa? 54 Mbi, mbe anganojee gechoo, angagalakhowola mbi khodugama ganaa gandekhagwa kho Maandekho ga Matuunda? Avyenee venaa gakhopogiwa gapumeele."

55 Apenee Yesu akavaweela vantu va idale eloo, "Mbi, mwijaga ne nsiime nkolo ne malungu khongweela kete onene nde mosuki? Nsiko jensi angile nkholiga kho ibololo la Nyoomba ya Matuunda, kho kee mokhangwele okhoo? 56 Ila mpola eji jensi japumelaga ili Maandekho ga valooti va Matuunda gakhowole khodugama."

Apenee vahemba vakwe vensi vakamolekha Yesu epoo no khokembela.

57 Vantu vanaa angile vamogwelaga Yesu, alevamokenkha khwa mopumya matambekho molaala, yunaa akhwetwa Kayafa. Okhoo valevakonganaga valaangi va njaanga ja Musa ne valaala va Vayahudi. 58 Petulo aleamolondaa khwa otale, mpakha kho lukiinga khwa mopumya matambekho molaala, ikhalaa palomwi ne valindeleli ili akhowole khowona kenaa kelapumela. 59 Valaala vapumya matambekho ne vakhombe va ivanza lensi valevapooga owoni wa opepi khomositachaa Yesu, ili vakhowole khomowolaga. 60 Valeviija vawoni va opepi vinki, ila valevakhapata owoni wewensi wa khokweela. Paudugo valeviija vawoni vawele, 61 no khopaala, "Muntu oyo aleapalaa kete, ‘Ndakhowola khobomola Nyoomba ya Matuunda no khoejeenga khanke khwa nsiko jetato.’ "

62 Apenee molaala wa vapumya matambekho imelelaa no khomowolya Yesu, "Mbi, ogwegwe okhakhopaala mpola yeyensi khwa ganaa vantu ewa vakhokhositachaa?" 63 Ila Yesu aleapombolaa mya topo. Khanke molaala wa vapumya matambekho oyoo akamowolya Yesu, "Lapaa khwa lina la Matuunda yunaa mopanga kete, ogwegwe amwenee Kilisto, Mwana wa Matuunda."

64 Yesu akamoweela, "Ogwegwe amwenee wapalaga. Ila nkhokhoweela, khwandelya seji, molamowona Mwana wa Muntu ikhalagaa kho lwande lwa molyelo lwa Matuunda owa ngulu, ijilee khochanya mwiluunde, khopuma khochanya khwa Matuunda."

65 Yesu panaa alepalaa gechoo, molaala wa vapumya matambekho oyoo, akademola myenda jakwe no khopaala, "Muntu oyo amotokhagaa Matundaa! Khokhaloma khanke owoni wewensi. Kho nguno ninga nanyu mwamotegelaga venaa akhomotokha Matuunda. 66 Gechoo, onywenywe mokhopaala mbi?"

Nanevo vakapaala, "Akhopogiwaa awolagwe."

67 Apenee vandyaa khomotyeela Yesu matye kho osho, no khomokowa. Ne vaange vamopatolanga mankhofi, 68 no khomoweela, "Ogwegwe Kilisto, lotelaa ananuu yunaa akhokowagaa."

69 Petulo panaa angile akhale ikhalagaa kho lukiinga oloo, apenee motomami yomwii wa kekhiima akamotelela Petulo no khomoweela, "Ninga nagwe angile ole palomwi no Yesu wa Galilaya."

70 Ila Petulo akasiita paolongolo ya vantu vensi vanaa angile vapwale epoo, no khopaala, "Nkhamanya kenaa opkhopaala."

71 Petulo panaa angile akhopuma pamolyango, motomami yoonge wa kekhiima amowonaa, nanoyo akavaweela vanaa angile vapwale epoo, "Muntu oyo angile apwale palomwi no Yesu wa kho Nazaleti."

72 Petulo akasiita khanke no kholapa khwa khopaala, "Nkhamomanya muntu oyoo."

73 Khatuungo khakupe, vantu vanaa angile vapwale epoo, vakamopetela Petulo no khomoweela, "Khapanga, ninga nagwe ole yomwii wawe, kho nguno ninga venaa okhopaala topo, okholageela avyenee avivyoo."

74 Apenee Petulo andyaa khopaala, "Matuunda andigite mbe nkhopaala opepi, nkholapa khwa lina la Matuunda kete, nkhamomanya muntu oyoo."

Apaponye, njogolo yawekhaa, 75 apaponye Petulo akombolaa mpola jenaa Yesu angile amowelagaa kete, "Panaa njogolo alaawa akhale khowekha, olapala mala jetato kete, okhanimanya." Apenee Petulo apumaa panji, andyaa khokoota khwa osaati mokolo.