1 Yesu panaa aleatelemokhaa khopuma kho ketonda, madale minki ga vantu galegamoloonda. 2 Apaponye, muntu yomwii wa malimwa aleijaa, amotungamelaa Yesu no khomoweela, "Mwene, mbe otogwee, nokhowola khonenoja ngombwee khomokumbekha Matuunda." 3 Yesu agololaa mokhono gwakwe amopalyaa no khomoweela, "Nkhopooga opone" Apaponye, olwile wakwe wensi, alewamosila. 4 Apenee Yesu akamoweela, "Kunaa, okhamowele muntu yeyensi mpola eye, ila petaa wilagele khwa mopumya matambekho venaa seji opwale, khanke petaa opumye sadakha kholageela kete waponaga, kete venaa njaanga ya Musa kelagelelya."

5 Yesu panaa alekhwingela kho ihala la Kapelanaumu, mwimeleli yomwii wa masinjala wa Loma ijaa khwakwe no khomoloomba amwalye, 6 Akamoweela Yesu, "Mwene, khokhayaane khole motomami waane yomwii apolajaa mowele, akhwitegeela osaati mokhakha modugo."

7 Yesu akamoweela, "Aniija khomopon'ya."

8 Molaala wa masinjala avawelaa, "Mwene, onene nkhalomwa khokhopokeela mokhate ya nyoomba yaane. Ila palaa mpola yemwii topo, ne motomami waane alapona. 9 Kho nguno, ninga onene nipwale panse ya vimeleli vaange, khanke nipwale ne masinjala vanaa vapwale panse yaane. Panaa ndamowela yomwii, ‘Petaa,’ apaponye akhopeta. Ne panaa ndamowela yoonge kete, ‘Wiije,’ apaponye khwiija. Ne panaa ndamowela motomami waane, ‘Nogajaa geeke,’ avyeene khonojaa."

10 Yesu panaa aleategelaa mpola ejoo, aleakumya modugo no khovaweela vantu vanaa alevakhomoloonda, "Nkhovaweela khapanga, kho nse ya Izilaeli nkhawona muntu yunaa khomogombaa Matuunda kete oyo. 11 Avyenee nkhovaweela, vantu vinki valaija khopuma lwande ja keeya ne ja meli khwingela mo owami wa khochanya khwa Matuunda. Nanevo valaija kho wenga kholya no khong'weela palomwi no Abulaamu no Isaka no Yakobo kho wa wami wa khochanya khwa Matuunda. 12 Ila evoo vanaa owami wa Matuunda a wakhowawe, valajutwa panji kho kiiti, khonaa valakota no kholoman'ya mino kho nguno ya osaati."

13 Apenee Yesu akamoweela mwimeleli oyoo wa masinjala geeke, "Tuwaa khokhayakhoo, ne ewaage kete venaa wagombaga."

Ne ituungo alelonye alenee oyoo motomami wakwe aponaa.

14 Yesu panaa aleapikhaa khokhaye khwa Petulo, akamopikha mokhoyakwe Petulo agonagaa pa kegonelo, kho nguno ya angile molwile wa homa nkhakha. 15 Yesu amopalya mokhono maye oyoo, apaponye aponaa homa. Apenee akaimelela no khwandya khomwandalela Yesu endya.

16 Panaa yaleyapikha mesee, valevamoletela Yesu valwile vinki vanaa angile vatite mademi. Nanoyo aleagapumya mademi egoo khwa khopaala mpola topo no khovapon'ya valwile vensi. 17 Aleanojaa gechoo ili jidugame mpola jenaa jalejapalagwa no Isaya molooti wa Matuunda kete, "Atopon'yajaa malwile gisu, ne atonogajaa khowee vapanga."

18 Yesu panaa aleawonaa kete vantu vinki vamopilimaga, aleavalagelelya vahemba vakwe vapete kho nkelo ya ilambo. 19 Molaangi yomwii wa njaanga ja Musa, aleamopetela Yesu no khomoweela, "Molaangi, onene ndakholonda kwekwensi khonaa olaawa opetile."

20 Yesu akamoweela, "Mpunja vatite mpinga ne nyonyi vatite vityoo, ila Mwana wa Muntu, atokhola ninga lwande lwa khogona no khosuupa."

21 Apenee mohemba yoonge wa Yesu akamoweela, "Meyaa, nkholoomba ongombele taali nipete nemozyeke daada yaane."

22 Ila Yesu akamoweela, "Ndondee, valeke vachi vavazyeke vachi vawe."

23 Apenee Yesu akaingela mo ipogo, nanevo vahemba vakwe alevamoloonda. 24 Panaa valevapikha pakhate ya ilambo, timpu, alechapumeela kewalawumbe ne magelekha makolo ga momeje no khwandya khoekuumba ipogo. Ila Yesu angile agonagaa ndoolo. 25 Vahemba vakwe vamolawelya no khomoweela, "Mwene, okhopon'ye." "Khokhofwa."

26 Yesu akavaweela, "Onywee vantu vanaa mokhogoomba kedo, kho kee mokhotungumala?" Apenee Yesu akaimelela no kholekhakela lekewalawumbe, ne ikhwa yapola, khwawa visoga.

27 Vahemba vakwe valevakumya no khopaala, "Mbi oyo a muntu wa mbi? Yunaa ninga kewalawumbe ne ikhwa vekhomotegelelya."

28 Yesu panaa alealowokha ilambo, apikha kho nse ya Vagadala, no okhoo aleitanga ne vantu vawele vanaa vatite mademi, vantu evoo angile vapumile kho malalo, vantu evoo angile vatite mademi makhakha, ninga khotopo muntu yunaa aleagemaa khokela kho njela eyoo. 29 Apenee mademi egoo galegandya khololoma khwa khopaala, "Mbi, ogwegwe Mwana wa Matuunda, otite kee nasu? Mbi, wijaga khotogaya panaa ituungo lekhale lepike?"

30 Pepi ne epoo, alelepwale idale ikolo la ngolowe jekhwipogela endya. 31 Apenee mademi egoo alegamoloomba Yesu, gapaala, "Mbe okhotupumya khogombelee khopete khwingele kho ngolowe ejoo."

32 Yesu akagaweela, "Petagi," apenee mademi egoo, galegapuma mokhate ya vantu evoo no khopeta khwingela mo ngolowe. Idale lensi la ngolowe lalelasulumokha kho mosulumokho no khwingela mo ilambo, ne ngolowe jensi jafweela omoo.

33 Vasoongi va ngolowe evoo, valevakembela vapeta kho ihala, no okhoo valevavapalela vantu mpola jensi jenaa jalejapumeela khwa vantu evoo vawele vanaa angile vatite mademi. 34 Apenee vantu vensi va ihala eloo, valevapuma no khopeta khwitaanga no Yesu, nanevo panaa valevamowona, vamoloomba apume kho nse yawe.