1 Apenee Yesu aleatantaa ipogo, alowokhaa ilambo no khotuuwa kho ihala lakwe la Kapelanaumu. 2 Panaa aleapikha okhoo, vantu vamoonga vamoletela muntu yunaa angile apolile oko agonilee kho mokekha. Yesu akamoweela oyoo yunaa angile apolilee, "Mwanaane ipele mooyo, wawokelajwaa mabe gakhoo."

3 Apenee vamoonga va valaangi va njaanga ja Matuunda jenaa aleapelwaa Musa vanaa angile vapwale epoo, vipalela momeoyo jawe, "Muntu oyo akhomotokha Matuunda."

4 Ila Yesu aleamanya gensi ganaa alevakhoheewa, avawolya, "Kho kee mokhoheewa mabe momeoyo jenyu? 5 A kento kee kenaa kepelu khwenyu, ‘Khomoweela wawokelajwaa mabe gakhoo,’ ao khomoweela imelelaa opete. 6 Ila nkhopooga momanye kete Mwana wa Muntu atite olaala kholekolela mabe ga vantu." Apenee Yesu akamoweela muntu oyoo yunaa angile apolajaa mowele, "Imelelaa osole mokekha gwakhoo, opete khokhayakhoo."

7 Apaponye muntu oyoo akaimelela no khopeta khokhayakwe. 8 Vantu vensi kho idale eloo panaa valevawona mpola eyoo, vakatungumala no khomokolya Matuunda, yunaa avapelaga vantu olaala wa gechoo.

9 Yesu panaa aleawokhaa epoo, ne panaa angile apetile, akamowonaa muntu yomwii yunaa khwetwaa Mateo, ikhalagaa kho nyoomba ya khokunganelya kodi. Yesu amoweela, "Ndonde."

Nanoyo Mateo imelela no khomoloonda.

10 Apenee, Yesu panaa ikhalaga kholya endya khokhaye khwa Mateo, vakungan'ya khodi vinki ne vanoja mabe, valeviija kholya endya palomwi nanoyo ne vahemba vakwe. 11 Mafalisayo panaa valevawona kento echoo, vawaweela vahemba va Yesu, "Kho kee molaangi wenyu akholya endya palomwi ne vakungan'ya khodi ne vanoja mabe?"

12 Yesu panaa aleategela mpola ejoo, avaweela, "Vantu vanaa nkha valwile vakhamoloma mogaanga ila valwile avenee vamolomile. 13 Petagi, mwilige emaana ya Maandekho ga Matuunda ganaa gakhopaala, ‘Nkhopooga mowee losongo khokela khopumya sadakha.’ Alenkhiija khovaeta vantu vanaa vasoga, ila vanoja mabe."

14 Nsiko yemwii vahemba va Yohana Mobatiji viija khwa Yesu, vamowolya, "Kho kee osweswe ne Mafalisayo khokhotuunga kholya, ila vahemba vakhoo akhavakutuunga kholya?"

15 Yesu akavaweela, "Vahenja va mwenga wa kegwisha, khotopo vakhowole khombolelya, panaa vapwale palomwi no mwenga wa kegwisha? Ila nsiko iliija panaa mwenga wa kegwisha alawochwa khwawe, ituungo aleloo alenee valatunga kholya.

16 "Khotopo muntu yunaa khosolaa kelakha kepya no khoketoola kho mwenda mosakhalu, kho nguno kelakha kepya kelagonoja mwenda mosakhalu khongeleke khodemokha. 17 Ninga vantu vakhavakhotuula divai mpyaa momefukho jenaa janogelelajwa khwa ntila jenaa nsakhalu. Mbe valanoja gechoo, mefukho ejoo jelademokha ne divai eliitekha ne mefukho yensi jelademokha. Ila a visoga khotuula divai mpyaa mo mefukho mepyaa ja ntila, nanevyo vensi vekhotulwa visoga."

18 Yesu panaa angile akhale khopalaa mpola ejoo, Mwimeleli yomwii wa Keyahudi aleapikhaa, atungumaa paulongolo wakwe, akamoweela, "Mwalele waane afwagaa ituungo aleele, ila nkhokholoomba khopete omotolele mokhono gwakhoo nanoyo alaawa mopanga khanke."

19 Apenee Yesu awokhaa, palomwi ne vahemba vakwe vamoloonda mwimeleli oyoo.

20 Ituungo aleloo mokhiima yomwii yunaa angile molwile wa mosongelo kho ituungo la myakha ikomi je jewele, akamolonda Yesu khonyuma no khopalya ipeembo la mwenda gwakwe. 21 Mokhiima oyoo alekhwipalelaa momooyo gwakwe kete, "Mbe nemopalye topo mwenda gwakwe, ndapona."

22 Apaponye panaa aleamopalya, Yesu akagalokha. Apenee akamowona no khomoweela, "Mokhiima ipelage mooyo, waponaga kho nguno wangombaga." Apaponye mwalele oyoo, aponaa.

23 Apenee Yesu panaa aleapikha kho nyoomba ya mwimeleli oyoo wa Keyahudi, aleavapikha vakowa mbuuto, vakhwemba nyeembo ja kelelo, ne vantu vinki vakonganaga pa kelelo echoo, oko vakhokoota modugo. 24 Yesu akavaweela, "Mopume epa. Mwalele oyo akhafwa, ila agonaga ndoolo topo." Vantu evoo panaa valevategeela gechoo, vamosekha Yesu. 25 Ne vantu evoo panaa valevadagwa mokhate, Yesu ingelaa khombele no khomowaamba mwalele oyoo mokhono, nanoyo akalawela. 26 Mpola ejoo jasambaala kho nse eyoo yensi.

27 Yesu panaa alekhowokhaa epoo, vatulu vawele vamoloonda, oko vakojoma no khopaala, "Wee, Mwana wa Daudi, khowonelee losongo."

28 Yesu panaa aleingela mokhate ya nyoomba, vatulu evoo vamopetela. Nanoyo avawolya, "Mbi, mokhogombaa kete ankhowola khovapon'yaa?"

Nanevo vamoweela, "Avyenee Meyaa tokhogoomba."

29 Papenee Yesu akavapalya miso gawe no khopaala, "Inojeke gechoo kete venaa mokhogoomba." 30 Apaponye miso gawe gadigokha no khwandya khokuuna. Yesu akavagilya khwa okhakha kete, "Mokhamowele muntu yeyensi mpola eje."

31 Ninga gechoo vapeta no khwandya khosambalya mpola ja Yesu kho nse eyoo yensi.

32 Vantu panaa angile vakhowookha, vamoonga va vantu valevamoletela Yesu muntu yomwii yunaa angile kameme, kho nguno angile asalenkhanagwa ne idemi. 33 Yesu panaa alealedaga idemi eloo, apaponye muntu oyoo andyaa khopaala khanke, vantu vensi vanaa angile vapwale epoo valevakumyaa modugo no khopaala, "Khokhale khowonage mpola kete eye kho, nse yensi ya Izilaeli." 34 Ila Mafalisayo vaawa vakhopaala, "Khogadagaa mademi khwa ngulu ja molaala wa mademi."

35 Yesu angile khopilimaa kho mahala ne vikhaye vyensi, alekhovaliga vantu kho nyoomba ya khwitangela Vayahudi, akhovatengela vantu Mpola Nsoga ya owami wa khochanya khwa Matuunda ne angile akhopon'ya malwile gensi. 36 Yesu panaa aleawona idale la vantu, avawonela losongo, kho nguno angile vakhogaya ne angile khotopo muntu wa khovaalya. Angile vapwale kete nkholo jenaa jetokhola mosoongi. 37 Apenee akavaweela vahemba vakwe, "Makongola a minki, ila vatomami vatiiti. 38 Gechoo, molombagi owa mogoonda, ili atome vatomami vakongole makongola gakwe."