1 Nsiko yemwii ya Khosuupa, Yesu palomwi ne vahemba vakwe angile vakhokela kho megoonda ja ogosi. Vahemba vakwe valevategeela njala, vandya khoyawa mansale ga ngano no kwandya kholya. 2 Mafalisayo panaa valegawona egoo, vakamoweela Yesu, "Kunaa, vahemba vakhoo vakhonoja mpola jenaa jekhalomwa khonojwa Nsiko ya Khosuupa."

3 Yesu akavawolya, "Mbi, mokhasoma kho Maandekho ga Matuunda, venaa Daudi aleanoja ituungo lenaa omwene ne vayakwe angile vakhotegeela njala? 4 Daudi aleingela kho Nyoomba ya Matuunda, papenee omwene ne vayakwe valyaa mekate yenaa yaleyapumajwa khwa Matuunda. Valevalyaa mekate yenaa njaanga ja Matuunda jenaa aleapelwaa Musa jalejekhawagombela valyee, ila topo vapumya matambekho. 5 Khanke mokhasoma kho ketabu cha njaanga ja Musa, kete vapumya matambekho va mo Nyoomba ya Matuunda angile vakhonoona njaanga kho Nsiko ya Khosuupa, ninga gechoo, Matuunda akhavavalya kete vanogaja mabe? 6 Gechoo nkhovaweela kete, epa apwale yomwii yunaa molaala khokela Nyoomba ya Matuunda. 7 Mbe angamomanye emaana ya Maandekho ga Matuunda, ganaa gakhopaala, ‘Nkhopooga molageele losongo khokela khopumyaa sadakha.’ Anga khotopo movatengemeke vantu vanaa vatokhola obe wewensi. 8 Kho nguno Mwana wa Muntu amwenee Mwene wa Nsiko ya Khosuupa."

9 Yesu akawookha epoo, akapeta kho nyoomba ya khwitangela Vayahudi. 10 Mokhate omoo angile khole muntu yunaa angile apolile mokhono. Vantu vamoonga vanaa angile vapwale omoo, angile vakhopooga nguno ya khomositachaa Yesu, gechoo vakamowolya Yesu, "Mbi, njaanga ja Musa, jekhogoomba khomopon'ya muntu Nsiko ya Khosuupa?"

11 Yesu akavaweela, "A nanuu movamoonga venyu, yunaa kete nkholo wakwe, agwelaga mwilende kho Nsiko ya Khosuupa, akhakhowola khomogweela no khomopumya omoo. 12 Ila muntu a mosoga khokela nkholo. Gechoo njaanga ja Musa jekhogombela khonoja masoga Nsiko ya Khosuupa." 13 Papenee Yesu akamoweela oyoo muntu, "Goloola mokhono gwakhoo."

Nanoyo awogolola, ne apaponye waawa mopanga kete owoo woonge. 14 Papenee Mafalisayo vapuma panji, no khopalana venaa valamowolaga Yesu.

15 Yesu panaa aleamanya kete Mafalisayo vakhopalana venaa valamowolaga, akawookha epoo. Vantu vinki vakamoloonda, nanoyo akavapon'ya vensi vanaa angile valwile. 16 Ila akavagilya kete, vakhavaweele vantu mpola jakwe. 17 Yesu aleanoja gechoo, ili gadugame egoo khwa khokelela Isaya molooti wa Matuunda kete,

18 "Kunaa, oyo amwenee motomami waane yunaa namosagolaga,

oyo amwenee motogwi waane yunaa agotogajaa mooyo gwaane,

Ndatola Moye waane pachanya yakwe,

nanoyo alavawela vantu va nse jensi khwa mpola ya itengemekho laane.

19 Khotopo akindane khwa mpola ne vantu, ninga khokowa madoolo,

ninga khotopo yunaa alategela lolii lwakwe mo njela.

20 Khotopo avalemeke vantu vapeena,

alaawa mosoga khwa vantu vanaa vatokhola ngulu,

mpakha panaa alanoja matengemekho ganaa gakhogombwaa nanoyo gakhowole khokiinda,

21 vantu va nse jensi valamosowelela kete alavapon'ya."

22 Apenee vantu vamoonga vamoletela Yesu muntu yomwi yunaa angile asalenkhanagaa ne idemi. Muntu oyoo angile mutulu, avivyoo angile khameme. Yesu amopon'yaa ne apaponye andya no khopaala no khowona. 23 Vantu vensi vanaa angile vapwale epoo, valevakumyaa modugo no khopaala, "Mbi, oyo amwenee Mwana wa Daudi?"

24 Ila Mafalisayo panaa valevategeela mpola ejoo, vakapaala, "Muntu oyo akhodaga mademi khwa ngulu ja Belizebuli, yunaa a molaala wa mademi."

25 Yesu angile amanyile kenaa angile vakhoheewa, gechoo akavaweela, "Mbe vantu va owami womwii valibegola madale, madale, owami owoo olaagwa, khanke mbe vantu va khaye yemwi valibegola madale, gechoo, owami owoo olasambala. 26 Mbe, Khatawe khomobidinjaa Khatawe, khwimalya mwenee, gechoo, owami wakwe olaagwa. 27 Mbe mokhopala onene nkhopumya mademi khwa olaala wa Belizebuli, mbi vahemba venyu vakhopumya mademi khwa olaala wa a nanuu? Kho nguno eyoo, evoo avenee vanaa valavatengemekha onywenywe. 28 Ila mbe onene nkhopumya mademi khwa olaala wa Moye wa Matuunda, manyagi kete owami wa Matuunda wijaga khwenyu.

29 "Khotopo muntu yunaa nokhowolaa khwingela kho nyoomba ya muntu yunaa atite ngulu no khomosukha vento vyakwe, ila mbe amotunge oyoo muntu yunaa atite ngulu. Epoo apenee alakhowola khomosukha vento vyakwe vyensi.

30 "Muntu yeyensi atapoya palomwi nane, akhonsiita, ne yeyensi yunaa akhakhokungan'ya palomwi nane, alavasambalya. 31 Kho nguno eyoo nkhovaweela, Matuunda nokhowola khovalekolela vantu mabe gawe gensi ne matoki gawe, ila akhakhowola khovalekolela vantu mabe gawe mbe vakhomotokha Moye wa Matuunda. 32 Khanke Matuunda nokhowola khovalekolela vantu vanaa vakomotokha Mwana wa Muntu, ila akhakhowola khovalekolela evoo vanaa vakhomotokha Moye wa Matuunda iwee mwituungo ele ao lenaa liijile.

33 "Nogaji ipeke lewee isoga ne viligi vyakwe velaawa visoga, ao nogaji ipeke lewee ibe ne viligi vyakwe velaawa vibe. Kho nguno ipeke lekhomanyekha khopumana ne viligi vyakwe. 34 Onywenywe vanaa mopwale kete olelo wa njokha. Mokhokhowola mbi khopaala mpola nsoga, oko onywenywe a vanoja mabe? Kho nguno muntu khopaala ganaa gijwile mo mooyo gwakwe. 35 Muntu mosoga akhopaala vento vesoga khopuma mo maheewo gakwe masoga. No muntu mobe akhoheewa maheewo mabe khopuma mo maheewo gakwe mabe.

36 "Gechoo nkhovaweela, nsiko ya itengemekho vantu valapogiwa khopalela kela mpola yenaa nkha nsoga yenaa alemwapaala. 37 Kho nguno Matuunda alatomela mpola jakhoo khokhotengemekha."

38 Papenee vamoonga va valaangi va njaanga ja Musa ne Mafalisayo vakamoweela Yesu, "Molaangi," vapaala, "tokopooga onojee lomekho kholageela kete wapumaga khwa Matuunda."

39 Yesu akavaweela, "Onywenywee keleli cha vantu vabe ne vanaa nkha vakhapanga khwa Matuunda, mbi, mokhopooga lomekho? Khotopo mopelwee lomekho yeyensi, ila topo eyoo lomekho ya Yona molooti wa Matuunda. 40 Kete venaa Yona aleikhalaa mo ndaa ya nshe mokolo khwi ituungo la nsiko jetato, otiko ne lyonse, avyenee avivyoo Mwana wa Muntu aliikhala nsiko jetato mo oloongo, otiko ne lyonse. 41 Kho nsiko yenaa Matuunda alatengemekha, vantu va ihala la Ninawi valaimelela palomwi ne vantu va keleli eke no khoketengemekha, kho nguno evenee valevagalokha no khogalekha mabe gawe, panaa valevategeela mateengi ga Yona. Ila nkhovaweela onywenywe, epa apwale yunaa molaala khokela Yona. 42 Khanke kho nsiko eyoo ya matengemekho, mwami wa kekhiima wa nse ya Sheba, aliimelela no khovatengemekha vantu va keleli eke kete vanoja mabe. Kho nguno omwenee aleapuma kho nse ya khotale ili iije ategelelye maligi ega masala ga mwami Solomoni. Ila nkhovaweela onywenywe kete, epa apwale molaala khokela Solomoni.

43 "Idemi panaa lekhomopuma muntu, lekhopeta pitenengwa, ili khopooga lwande ya khosuupa. Mbe alalekha khoepata, 44 apenee khwipalela, ‘Ndatuuwa khokhayaane khonaa napumaga.’ Nanoyo panaa atuwile no khoyepikha itokhola kento, naneyo ipyagilwe no kholeembwa. 45 Gechoo, apetile khosola mademi gaange saba ganaa mabe khokela elenee, gensi gakhwingela khwa muntu oyoo, gakhwikhala omoo. Apenee wome wa muntu oyoo, okhogelokhaa khowa mobe khokela wome wa mwandyo. Gechoo avyenee elaawa kho vantu va keleli eke kebe."

46 Yesu panaa angile akhale akhopaala ne idale la vantu evoo, onyinya ne vadogwakwe viija, vimelela panji vakapooga khopaala nanoyo. 47 Apenee muntu yomwii akamoweela Yesu, "Kunaa, onyokho ne vadogwakhoo vapwale panji, vakhopooga khopaala nagwe."

48 Yesu akamoweela, "Maye waane ne vadogwaane a vananuu?" 49 Apenee avagololela vahemba vakwe mokhono, akavaweela, "Ewa epaa avenee a nyinya ne vadogwaane. 50 Gechoo, muntu yeyensi yunaa akhonoja ganaa agatogilwe Daada yaane wa khochanya, oyoo amwenee mokolwane, khaloombo yaane no maye waane."