1 Yesu panaa aleagawonaa madale ga vantu, aleatantaa pachanya ya ketonda ikhalaa panse, nanevo vahemba vakwe vakamopetela, 2 apenee andyaa khovaliga, khwa khopaala.

3 "Vatite otogwi vanaa vapeena va moye,

kho nguno owami wa khochanya khwa Matuunda a wakhowawe.

4 Vatite otogwi vanaa vakhosaaya, kho nguno valapepeselwa.

5 Vatite otogwi vanaa vanyenyekeli,

kho nguno evoo avenee valaesala nse.

6 Vatite otogwi vanaa vatite njala ne nyoota ya khonoja ganaa gakhogombekha no Matuunda,

kho nguno Matuunda alavikotya.

7 Vatite otogwi vanaa vatite losongo,

kho nguno evoo valasayelwa.

8 Vatite otogwi vanaa vatokhola mabe mo meoyo,

kho nguno valamowona Matuunda.

9 Vatite otogwi vanaa vakholeeta wikhalo mosoga,

kho nguno valeetwa vana va Matuunda.

10 Vatite otogwi vanaa vakhogayanjwaa kho nguno ya khonoja ganaa Matuunda khopogaa,

kho nguno owami wa khochanya khwa Matuunda a wakhowawe."

11 "Onywenywe motite otogwi mbe vantu vakhovatokha no khovagayanjaa no khovapalela vibe kho nguno onywenywe a vahemba vaane. 12 Togagwi no khokowa ngiligili, kho nguno mfinga jenyu amba nkolo khochanya khwa Matuunda. Gechoo avyenee venaa angile vakhovagayanjaa valooti vanaa angile vakhwikhala pamyakha."

13 Onywenywe mole kete moleenge khwa vantu va liwelelo lensi. Ila mbe moleenge opwelyee ononu wakwe, olatola chanuu ili etuvyee ononu wakwe khanke? Ekhalomwa khanke khotomelwa, elajutwa panji no khosaambwa ne vantu. 14 Onywenywe, mole kete welo wa vantu va paliwelelo. Ihala lenaa lajengagwa pachanya ya ketonda vantu vensi valagowona. 15 Ninga vantu akhavakhomolekha etala nokhoikundekela khwi idebe, ila vakhotoola pachanya ya kensuunda chakwe, ili ivamolekele vensi vanaa vale monyomba. 16 Avivyoo nanyu, welo wenyu gokhopogiwaa gomoleke paolongolo wa vantu, ili vakhowole khowona manoji genyu masoga, vamokolye Matuunda yunaa apwale khochanya.

17 Mokhahewe kete nijaga khowochaa njaanga ja Musa ne maligi ga valooti va Matuunda. Alenkhiija khowochaa, ila khodugamya. 18 Nkhovaweela khapanga, mpakha panaa khochanya khwa Matuunda ne liwelelo jelawokha, khotopo ninga nukuta yemwii ya njaanga yenaa elawochwaa mpakha gensi gadugame. 19 Muntu yeyensi yunaa khositaa khojeloonda ninga njaanga yemwii yenaa ndo khokela jiinge jensi, ne khovaliga vaange vanojee kete omwene, oyoo alawaa modo modugo kho owami wa khochanya pa Matuunda. Ila oyoo yunaa alajivamba ne khovaliga vaange, oyoo alaawa mokolo kho owami wa khochanya pa Matuunda. 20 Avyenee nkhovaweela, mbe akhamokhonoja ganaa gakhomotoja Matuunda, khotopo mwiije mwingele kho owami wa khochanya pa Matuunda ninga nsiko yemwii.

21 "Mwategelaga kete vantu va myakha valevapelwaa njaanga kete, ‘Okhawolage, ne mbe muntu yeyensi yunaa alamowolaga muntu yoonge, khopogiwa atengemekwe.’ 22 Ila onene nkhovaweela, muntu yeyensi yunaa alamosimbela modogwakwe khapogiwa khotengemekwa. Yeyensi yunaa khomobyedaa modogwakwe, alakenkhwa kho ivanza, khanke yeyensi yunaa alamweta modogwakwe, ‘Moleele’ alapogiwa khwingela kho moto gonaa gokhalimaga nsiko jensi. 23 Gechoo, mbe okeenke sadakha yakhoo kho kechanja cha khopumelyaa sadakha kho Nyoomba ya Matuunda, apaponye wakombola kete mwitakhajaa no moyakhoo, 24 elekhagee sadakha eyoo paulongolo ya kechanja cha khopumelyaa sadakha kho Nyoomba ya Matuunda, petaa taali mwigombye nanoyo. Apenee otuuwe khanke khopumyaa sadakha yakhoo.

25 "Mwigombye nyango gasile no mwitachi wakhoo, ituungo lenaa mokhale mopike khwi ivanza, ili mwitachi wakhoo akhakhopiche khwa motengemeki, nanoyo motengemeki akhopiche khwa masinjala, nagwe otuungwe mokhandulunge. 26 Nkhovaweela khapanga, khotopo opume omoo mpakha panaa olalepa kechele cha odugo.

27 "Mwategelaga kete vantu valevaweelwa, ‘Okhasenche.’ 28 Ila onene nkhovaweela kete, mogwisha yeyensi yunaa khomokuuna mokhiima yoonge khwa khotamanela, oyoo khaawa anogaja osencha no mokhiima oyoo, momooyo gwakwe. 29 Mbe liso lakhoo la molyelo lelakenkela onojee mabe, lekumpolee no kholesutya patale. Kho nguno amba visoga khopwelya kewongelo kemwii khokela mowele wakhoo gwensi khosutwa kho moto gonaa gokhalimaga nsiko jensi. 30 Khanke mbe mokhono gwakhoo gwa molyelo golakhokenkela onojee mabe, owodomole no khowosutya patale. Kho nguno amba visoga khopwelya kewongelo kemwii khokela mowele gwakhoo gwensi khosutwa kho moto gonaa gakhalimaga nsiko jensi.

31 "Khanke mwategelaga njaanga yenaa kepalaa, ‘Muntu yeyensi yunaa akhomolekha molijakwe, akhopogiwa amopele etalatasi ya khomolekha.’ 32 Ila onene nkhovaweela, muntu yeyensi yunaa akhomolekha molijakwe, kho nguno yenaa nkha ya osencha, akhomonoja molijakwe awee mosencha. No mogwisha yeyensi yunaa alamotola mokhiima yunaa alekhagwaa, oyoo khaawa khonojaa osencha.

33 "Khanke mwategelaga njaanga yenaa vantu va myakha alevaweelwa kete, ‘Okhaune kelapo chakhoo, ila dugamya kelapo chakhoo paulongolo wa Mwene.’ 34 Ila onene nkhovaweela, okhalape khwa kelapo, khanke okhalape khwa khotomela lina la khochanya khwa Matuunda, kho nguno a kegoda cha kewami cha Matuunda. 35 Ninga mokhalape khwa nse, kho nguno Matuunda apenee khotulaa megolo jakwe, ninga mokhalape khwa ihala la Yelusalemu, kho nguno a ihala la Mwami molaala. 36 Ninga mokhalape khwa mitwe jenyu, kho nguno khotopo mokhowole khogalolya ninga nyele yemwi ewee nyilu ao nyelo. 37 Mbe mokhopaala avyenee, ‘Gombagi’, ao mbe mokhosiita, ‘Sitagi’, kho nguno mpola jensi jenaa jelaongelekha kho egoo, amba gakhopuma khwa Khatawe.

38 "Mwategelaga njaanga yenaa kepalaa, ‘Muntu mbe alamolekha yoonge liso nanoyo alemekwe liso, ne muntu mbe alamokumpola lino moyakwe nanoyo akumpolwe lino.’ 39 Ila onene nkhovaweela, okhalepekelye obe khwa muntu yunaa akhonojelaga obe. Mbe muntu alakhopatola nkhofi pi itama la molyelo, mogalolye ne itama la mokege. 40 Khanke mbe muntu alakhositacha kho ivanza ili asole ngwanda yakhoo, molekele ne nkhoti yakhoo. 41 Mbe muntu alakong'ang'anelya omokepolele moligo gwakwe kelometa yemwii, ogwegwe kepolaa ninga kelometa jewele. 42 Mbe muntu alakholomba kento, mopelee. No muntu mbe alapoga omwalumye kento, okhamwime.

43 "Mwategelaga khanke njaanga yenaa kepalaa, ‘Motogagwee moyakho, ila mosimbele nyambuda wakhoo.’ 44 Ila onene nkhovaweela, mowee mokhovatogwa vanyambuda venyu, ne khovalombela evoo vanaa vakhovagayanjaa, 45 ili mopate khowa vana va Matuunda, yunaa Daada yenyu khwikala khochanya. Kho nguno omwene amwenee khovamolekela lyonse lakwe vantu vasoga ne vabe, khanke khovatonyelaa mbula vantu vasoga ne vabe. 46 Mbi molapata mfinga kee khwa khovatogwa topo evoo vanaa vakhovatogwa onywenywe? Ninga vakungany'a khodi nanevo vakhonojaa avivyoo. 47 Mbe mokhovalamochaa vadogo venyu topo, mokhonoja manoji kee khokela vaange? Ninga vantu vanaa vakhamogomba Matuunda, avivyoo nanevo vakhonoja. 48 Gechoo movaage vasoga khwa kela kento, kete Daada yenyu yunaa apwale khochanya venaa a mosoga khwa kela kento.