1 Yesu akapaala nanevo khanke khwa mefwano, khwa khovaweela, 2 "Owami wa Matuunda wipyanile no mwami yomwii yunaa aleamwandalelaa molomyana wakwe endya ya wenga. 3 Mwami oyoo avalagelelya vatomami vakwe vapete khoveeta vanaa valevalalekhagwa viije kho endya ya wenga, ila vensi vanaa valevalalekhagwa valevasiita khwija. 4 Apenee mwami oyoo avalagelelya khanke vatomami vaange no khovaweela, ‘Mopete movawele vanaa valalekhagwa kete, Endya ya wenga ele teali, kho nguno vento vyensi nandalelaga. Nasenjaga ng'oombe jenaa jenonile, palomwi ne nkholo jenaa jenonile. Gechoo, ijagi kho endya ya wenga!’ 5 Ila vantu vanaa angile valalekhagwa, alevakhasosopa. Vapeta kho melemo jawe, yomwii apetaa kho mogoonda gwakwe, no yoonge apetaa khogolya idookha lakwe, 6 ne vaange vavagweela vatomami va mwami, vawakowa modugo no khovawolaga. 7 Mwami oyoo panaa aleategelaa gensi ganaa gapumelaga kho vatomami vakwe, akilwaa modugo. Apenee avalagelelya masinjala vakwe vapete khovawolaga vaolagi evoo no khotima ihala lawe. 8 Khanke, mwami oyoo akavaweela vatomami vakwe, ‘Vento vyensi vya endya ya wenga vyandalelagwa, ila evenee valevabyeeda kholalekhwa khwawe. 9 Gechoo, petagi kho njela, no khomolalekha muntu yeyensi yunaa moliitanga nanoyo mowelagi iije kho endya ya wenga.’ 10 Vatomami evoo vawookha no khopeta monjela, vavakongan'ya vantu vensi vanaa valevitaanga nanevo, vanaa angile vasoga ao vabe. Apenee nyoomba ya endya ya wenga yijola vahenja.

11 "Mwami panaa aleingelaa mokhate ili avalamoche vahenja, aleamowonaa muntu yomwii yunaa angile akhalyala mwenda gwa wenga. 12 Mwami amowolya, ‘Molaasi waane, kho kee wingelaga epa patokhola kholyala mwenda gwa wenga?’ Ila muntu oyoo aleakhapala chechensi. 13 Apenee mwami akavaweela vatomami vakwe, ‘Momotuunge muntu oyo mekhono ne megolo mopete momojutele panji kho kiiti. Okhoo alakota no kholoman'ya mino khwa osaati.’ "

14 Apenee Yesu amalelya khwa khopaala, "Vantu vanaa vakhwetwa a vinki, ila vanaa vakhosagolwa a vatiiti."

15 Mafalisayo vakapuma panji khopalana venaa valamogwela Yesu khwa mpola jakwe. 16 Apenee vavalagelelya vahemba vawe khwa Yesu palomwi ne valaasi va Helode khomowolya empola eje, "Molaangi, khomanyile kete ogwegwe ole muntu wa khapanga, avivyoo okholiga maligi ga Matuunda khwa khapanga. Ninga gechoo khomanyile kete ogwegwe okhakhomotungumala muntu yeyensi ninga mbe awee atite olaala wa khochanya. 17 Gechoo, okhowele ogwegwe okhoheewa chanuu? Mbi a visoga osweswe kholepa khodi khwa Kaisali mwami wa Loma, ao khotopo?"

18 Ila Yesu aleamanyaa kete vantu ewa angile vakhomogema. Gechoo akavaweela, "Onywenywe van'ya, kho kee mokhongema? 19 Mondagele mpia eyoo, yenaa mokhotomela kholepa khodi."

Nanevo vakamopeela kechele kemwii. 20 Apenee Yesu avawolya, "Osho ne lina ele, a ga nanuu?"

21 Vakamoweela, "A ga Kaisali."

Apenee, Yesu akavaweela, "Mopeli Kaisali ganaa gakwe, ne venaa vya Matuunda mopeli Matuunda."

22 Panaa valevategeela gechoo, valevakumya modugo, vamolekha ne vakawookha epoo.

23 Nsiko ayeyoo, vamoonga va Masadukayo vanaa angile vakhopaala khotopo ofufolo valevamopetela Yesu no khomowolya, 24 Molaangi, Musa aleatwandekela kete, "Mbe muntu achee, no khomolekha molijakwe atokhola mwana, modogwakwe amosole mosimbe oyoo, ili khomolelela modogwakwe mwana yunaa afwilee. 25 Apenee valevapwale vadogo saba. Wa mwandyo aleatolaa, afwaa patokhola kholekha mwana, apenee modogwakwe wa owele amosolaa mosimbe oyoo. 26 Yawaa avivyoo khwa modogwakwe wa owele no wa otato mpakha no oyoo wa saba. 27 Vadogo evoo vensi saba panaa valevafwaa, no mosimbe oyoo nanoyo afwaa. 28 Gechoo, khowelee, nsiko yenaa vachi valafufokha, mokhiima oyoo alaawa moliji wa ananuu? Kho nguno vensi saba angile molijawe."

29 Yesu akavaweela, "Mokhopweela, kho nguno mokhamanya Maandekho ga Matuunda ninga olaala wakwe. 30 Kho nguno vachi panaa valafufokha palaawa khotopo khotoola ninga khotoolwa, ila valaawa kete vatomami va khochanya khwa Matuunda vanaa vakhavakhotoola ni khotoolwa. 31 Ila khougela khofufokha khwa vachi, mbi mokhale mosome Maandekho ga Matuunda venaa aleavawelaa? Aleavawelaa kete, 32 ‘Onene a Matuunda wa Abulahamu no Matuunda wa Isaka no Matuunda wa Yakobo.’ Gechoo, Matuunda Omwene nkha Matuunda wa vachi, ila a Matuunda wa vapanga."

33 Madale ga vantu panaa valevategeela gechoo, valevakumya modugo kho maligi gakwe.

34 Mafalisayo panaa valevategeela kete Yesu angile avanojaga Masadukayo vakhapale chechensi, vikungan'ya palomwi. 35 Apenee yomwii wawe, yunaa angile molaangi wa njaanga ja Musa, amowolya Yesu khwa khomogema. 36 "Molaangi, kho njaanga jensi ja Matuunda, a njaanga kee yenaa nkolo khokela jensi?"

37 Yesu akamoweela, " ‘Motogwe Mwene Matuunda wakhoo khwa mooyo gwakhoo gwensi, khwa maheewo gakhoo gensi, ne khwa masala gakhoo gensi.’ 38 Njaanga eye ayenee yenaa nkolo khokela jensi, khanke ayenee ya mwandyo. 39 Ne njaanga ya owele yenaa nkolo kete eyoo, ‘Motogwe mwiyo kete venaa witogwile gwegwee.’ 40 Njaanga jensi ja Musa ne malaangi ga valooti va Matuunda vekhwisowelela njaanga ejoo jewele."

41 Mafalisayo panaa valevikungan'ya palomwi, Yesu akavawolya. 42 "Mokhoheewa kee khougela Kilisto?" Mbi a mwana wa nanuu?

Nanevo vakamoweela a mwana wa Daudi.

43 Yesu akavawolya, "Gechoo, nekhowolekhaa mbi, Daudi panaa kholongolwaa no Moye wa Matuunda, akhomweta Kilisto kete a Mwene? Kho nguno Daudi aleapalaa, 44 ‘Mwene Matuunda aleamowelaa Mwene waane.

Wikhale kho lwande yaane ya molyelo lwande lonaa lotite ngulu,

mpakha panaa ndavakinda vanyambuda vakhoo.’

45 Mbe Daudi akhomweta Kilisto, ‘Mwene,’ nokhowola mbi Kilisto awee mwanakwe?"

46 Khotopo muntu yeyensi yunaa aleakhowola khomoweela lelensi Yesu, khanke khwandelya ituungo eloo, khotopo muntu yunaa aleagema khomowolya.