1 Yesu aleavetaa vakhombe vakwe ikomi ne vawele, avapelaa olaala wa khodaga mademi no khopon'ya malwile gensi. 2 Ega agenee mina ga evoo vakhombe vakwe ikomi ne vawele, wa mwandyo, Simoni yunaa khwetwaa Petulo, no Andelea modogwakwe, no Yakobo mwana wa Zebedayo, no Yohana molunakwe no Yakobo, 3 Filipo no Batolomayo, no Tomasi, no Mateo yunaa angile mokungan'ya khodi no Yakobo mwana wa Alufayo no Tadeo, 4 Simoni Mokananayo no Yuda Isikalioti yunaa aleamogalokha Yesu.

5 Yesu aleavatomaa vakhombe evoo ikomi ne vawele no khovapeela malagelelyo ega, Mokhapete kho vantu vanaa nkha Vayahudi, khanke mokhingele kho mahala ga Samalia. 6 Ila petagi khwa vantu va Izilaeli, kho nguno vapwale kete nkholo jenaa japwelaga. 7 Panaa amba mopetile khwawe, tengagi khwa khopaala, ‘Owami wa pachanya khwa Matuunda watelelaga.’ 8 Pon'yaji valwile, mofufole vachi, pon'yaji ewa malimwa vagombwe khokumbekha Matuunda no khopumya mademi. Mwapokelaga olaala owo patokola kholepa kento, nanyu vaalaji patokhola khovaweela valepe kento. 9 Mokhakepole momefukho jenyu zahabu, ninga mpia, ninga kechele yeyensi momefukho yenyu. 10 Khanke mokhakepole miligo ao myenda jewele, ao velato, ao nkhome. Kho nguno kela motomami akhopogiwa khopeelwa vento venaa akhovepoga, khwa vantu vanaa akhovapetela.

11 "Panaa molaingela kho ihala lelensi ao khaye, pogagi mbe apwale muntu yeyensi yunaa akhovapokeela onywenywe, nanyu mwikhalage khwakwe mpakha panaa molawokha okhoo. 12 Panaa mokhwingela kho nyoomba, ‘Movalamoche khwa khovaweela wikhalo mosoga owee nanyu.’ 13 Mbe vantu va khaye eyoo, valavagomba, wikhalo wenyu mosoga oliikhala palomwi nanevo. Ila mbe valasita khovagomba, wikhalo wenyu, olavatuwela onywenywe. 14 Mbe muntu yeyensi alasita khovapokeela ao khovategelelya, apenee panaa amba mokhowookha kho khaye eyoo ao ihala eloo, mwiije mokung'untage lonkoonde momegolo jenyu kete lomekho ya malaangi khwawe. 15 Nkhovaweela khapanga, kho nsiko ya itengemekho, vantu va ihala eloo valapata magayo makolo khokela ganaa valevapata vantu va ihala la Sodoma ne Gomola.

16 "Tegeleli, nkhovatoma kete nkholo pakhate ya mapoge. Gechoo movaage vasogu kete njokha, ne movaage vapolo kete njewa. 17 Mwiyangalelage ne vantu, kho nguno valavagweela no khovakenkha kho mavanza, khanke valafwemba ne nkhome ja ntila kho nyoomba ja khwitangela Vayahudi. 18 Kho nguno mwangombaga, gechoo molakenkhwa paulongolo ya valaala va nse ne vami, ili mokhowole khovaweela Mpola Nsoga, vantu vanaa nkha Vayahudi. 19 Ila panaa valavagweela no khovakeenkha khwi ivanza, mokhatungumale molapala chanuu ao molapala mbi. Matuunda alavapela mpola ja khopaala kho ituungo eloo. 20 Kho nguno amba nkha onywenywe vanaa molapala, ila a Moye wa Matuunda yunaa a Isenyu, amwenee yunaa alapala khokelela khwenyu.

21 "Kho ituungo eloo ilapumela kete, modogo alamogalokha modogwakwe ili awolagwe, no daada alamogalokha mwanaakwe, nanevo vana valavakhokholanga valeli vawe no khovawolaga. 22 Vantu vensi valavasimbela onywenywe kho nguno mwangombaga onene. Ila muntu yeyensi yunaa alikhamelelya mpakha kho odugo, oyoo amwenee alaponiwa. 23 Mbe valavanojela vibe kho ihala lemwii, kembelelagi kho ihala leenge. Nkhovaweela khapanga, khotopo momale molemo gwenyu kho mahala gensi ga Izilaeli panaa Mwana wa Muntu alaawa akhale apikhe.

24 "Mohemba nkha molaala khokela molaangi wakwe, no motomami nkha molaala khokela mwene wakwe. 25 Ila mohemba atogwee khowa kete molaangi wakwe, avivyonye no motomami atogwee khowa kete meyaa wakwe. Mbe molaala wa khaye etagwaa Belizebuli. Mbi, onywenywe, khotopo vaveete vantu vanaa vapwale kho nyoomba yakwe mina mabe?

26 "Gechoo, mokhavatungumale vantu evoo. Kela kento kenaa kekundekilwe, kelakundokolwa, ne kela kenaa keswekilwe, kelamanyekha. 27 Gensi ganaa nkhovaweela onywenywe kho kiiti, gapalagi pa welo. Khanke gensi ganaa nkhovaweela khwa khopwepweta, gapalagi pa welo. 28 Mokhavatungumale vanaa vakhowolaga mowele, ila vakhakhowola khowolaga moye. Ila onywenywe momotungumalagi Matuunda aleemwi topo, kho nguno omwene amwenee nokhowolaa khonoona mowele palomwi no moye kho moto gonaa gokhalimaga nsiko jensi patokhola odugo. 29 "Wilombe vawele vakhogolwa khwa mpia nndo. Ila khotopo ninga yomwiwawe yunaa alaagwa panse patokola Daada yenyu khomanya. 30 Ila onywenywe ninga nyele ja metwe jenyu jensi, javalajwaa. 31 Gechoo mokhatungumale, kho nguno onywenywe a vasoga khokela idale la wilombe evoo.

32 "Muntu yeyensi yunaa alapala paulongolo ya vantu kete onene nde wakhowakwe, nane ndapala paulongolo ya Daada yaane yunaa apwale khochanya kete a wakhowane. 33 Ila muntu yeyensi yunaa khonsitaa paulongolo ya vantu, nane ndamosita paulongolo wa Daada yaane yunaa apwale khochanya.

34 "Mokhahewe kete nijaga kho liwelelo ele kho nguno ya kholeeta wikhalo mosoga. Onene nkhiija kholeeta wikhalo mosoga, ila kholeeta wologo. 35 Kho nguno nijaga kholeeta wologo kate ya molomyana no isewe, mwalele no nyinya, kate ya mokhoi no mokhoyakwe. 36 Ne vanyambuda va muntu, a vantu va khokhayakwe.

37 "Yeyensi yunaa amotogilwe onyinya ao ise khokela onene, akhapogiwa awee mohemba waane, khanke yeyensi yunaa amotogilwe molomyana wakwe ao mwalele wakwe khokela onene, avivyoo nanoyo akhapogiwa awee mohemba waane. 38 Muntu yeyensi yunaa khositaa khokepola mosalaba gwakwe no khondoonda, oyoo akhapogiwa awee mohemba waane. 39 Kho nguno yeyensi yunaa awotogwile opanga wakwe, alawopwelya, ila yeyensi yunaa alawopwelya opanga wakwe kho nguno yaane, oyoo amwenee alawopon'ya opanga wakwe.

40 "Muntu yeyensi yunaa akhovapokela onywenywe, akhonipokela onene, avivyonye, ne yeyensi yunaa khonipokela onene, khomopokela yunaa andagelelaja. 41 Yeyensi yunaa akhomopokela molooti wa Matuunda, kho nguno a molooti. Matuunda alamopela mfinga kete yenaa alapelwa molooti. Yunaa okhomopokela muntu mosoga kho nguno a muntu mosoga, Matuunda alamopela mfinga kete yenaa alapelwa yunaa a mosoga. 42 Yeyensi yunaa alamopela yomwii wa vantu ewa kekhombe cha meje majijimu kho nguno a moloondi waane, nkhovaweela khapanga, Matuunda khotopo aleke khomopeela mfinga."