1 Yesu panaa aleamalya khopaala empola ejoo, aleawokhaa kho nse ya Galilaya, apetaa kho nse ya Yudea, nkelo ya lweje Yolodani. 2 Vantu vinki valevamoloonda okhoo, nanoyo akavapon'ya valwile vinki okhoo.

3 Apenee vamoonga va Mafalisayo vakamwijela ili vamogeme, vamowolya, "Mbi, njaanga jisu jekhogoomba mogwisha khomolekha molijakwe kho nguno yeyensi?"

4 Yesu akavaweela, "Mbi, mokhasoma kho Maandekho ga Matuunda, khopuma mwandyo kete Matuunda aleawombaa mogwisha no mokhiima? 5 Ne aleapaala, ‘Kho nguno eye, mogwisha alamolekha ise no nyinya, no khwiungan'yaa no molijakwe. Nanevo vawele ewa valaawa mowele gomwii.’ 6 Gechoo, khotopo vawee vawele khanke, ila vawaaga mowele gomwii. Kho gechoo, kenaa aunganajaa Matuunda, muntu akhelekhan'ye."

7 Mafalisayo vamowolya khanke, "Mbe ega a ga khapanga, kho kee Musa alealagelelya mogwisha amopele molijakwe talatasi ya wileki?" 8 Yesu akavaweela, "Musa aleavagombelaa onywenywe khovalekha valiji jenyu kho nguno ya khopokeela malaangi ga Matuunda. Ila khopuma mwandyo Matuunda aleakhaloma ewee gechoo. 9 Gechoo nkhovaweela, kela muntu yunaa akhomolekha molijakwe kho nguno yeenge yeyensi, ila nkha ya osencha, no khopeta khotoola mokhiima yoonge, oyoo alaawa khonojaa osencha."

10 Apenee vahemba vakwe wakamoweela, "Mbe mpola ja mogwisha no molijakwe jele gechoo, amba visoga kholekha khotoola."

11 Yesu akavaweela, "Nkha vantu vensi navakhowola khopokeela ilaangi ele. Ila topo evoo vanaa Matuunda avaalajaa khopokeela. 12 Nkhopaala gechoo, kho nguno vagwisha vamoonga khotopo vatoole, kho nguno valelilwee gechoo, vaange vanogajwaa gechoo ne vantu, ne vaange valamolaga kholekha khotoola kho nguno ya owami wa khochanya pa Matuunda. Kho gechoo, muntu yeyensi yunaa nokhowolaa khopokeela maligi ega, agapokele."

13 Apenee vantu vamoletela Yesu vana modo, avatolele mekhono jakwe kho metwe jawe ili avafunyele. Ila vahemba vakwe alevawakhakela evoo vanaa alevawaletaga vana vado. 14 Apenee Yesu akavaweela vahemba vakwe, "Movaleke evoo vana vado viije khwaane, ninga mokhavagilye kho nguno owami wa khochanya pa Matuunda awa vantu vanaa vapwale kete vana ewa."

15 Yesu panaa aleamalya khovafunyela vana evoo, akawookha epoo.

16 Apenee molomyana yomwii iijaa khwa Yesu, akamowolya, "Molaangi, nojee kento kee ili nepate opanga wa nsiko jensi patokhola odugo?"

17 Yesu akavaweela, "Kho kee okhombolya a mpola kee yenaa nsoga? Matuunda aleemwi amwenee mosoga. Ila mbe okhopooga khwingela kho opanga wa nsiko jensi patokhola odugo, otegelelye njaanga ja Matuunda."

18 Molomyana oyoo akamowolya Yesu, "Njaanga kee?"

Yesu akamoweela, "Okhawolage, okhasenche, okhiiwe, okhapale owoni wa opepi, 19 vakolyee iso no onyokho, motogwee mwiyo kete venaa witogwile ogwegwe."

20 Molomyana oyoo akapaala, "Njaanga jensi ejoo najewambaga. Kento kee keenge kenaa nkhopogiwaa nojee?"

21 Yesu akavaweela, "Mbe opogile okhapongokelwe ne kento, petaa ogolyee vento vyensi venaa otite, ne mpia ejoo ovagawele vapeena. Mbe olanoja gechoo, amba witolelaga nsawo jakhoo khochanya pa Matuunda. Apenee wiije ondonde."

22 Ila molomyana oyoo panaa aleategelaa mpola ejoo, awokhaa ne masaayo kho nguno angile atite nsawo nyinki.

23 Apenee Yesu akavaweela vahemba vakwe, "Nkhokhoweela khapanga, amba vikhamu modugo mosawi khwingela kho owami wa khochanya pa Matuunda. 24 Nkhovaweela khanke, a vepelu khwa ndimwana yunaa akhwetwa ngamia khokela kho idoli la losiinge, khokela mosawi khwingela kho owami wa khochanya pa Matuunda."

25 Vahemba vakwe panaa valevategeela gechoo, valevakumya modugo no khomowolya, "Mbe gechoo, ananuu yunaa nokhowolaa alaponiwa?"

26 Yesu akavakuuna no khovaweela, "Kewuntu mpola eye ekhakhowolekha, ila khwa Matuunda mpola jensi jekokhowolekhaa."

27 Apenee Petulo akamoweela, "Kunaa, osweswe khwalekhaga vyensi, khwakholondaga ogwegwe, seji nasu kholapata chanuu?"

28 Yesu akavaweela, "Nkhovaweela khapanga, Mwana wa Muntu panaa aliikhala pa kegoda chakwe cha olaala kho liwelelo ipyaa. Onywenywe vanaa mondondile moliikhala kho vegoda ikomi ne vewele, oko mokhotengemekha vantu va melombelo ikomi ne jewele ja Vaizilaeli. 29 Kela muntu yunaa aelekhagaa nyoomba yakwe ao valunakwe ao viloombo vakwe ao ise no nyinya ao vanakwe ao megoonda jakwe kho nguno yaane, alapokela mala igana khokela evyoo, ne alapata opanga wa nsiko jensi wonaa otokhola udugo. 30 Ila vantu vinki vanaa valongwile, valaawa va odugo, ne vanaa va odugo valaawa va mwandyo.