1 "Mwiyangalele mokhanoje manoji masoga paulongolo pa vantu ili vantu vavawone. Mbe mokhonoja gechoo, khotopo mopokeele mfinga yeyensi khopuma kwa Daada yenyu yunaa apwale khochanya.

2 "Panaa mokhovaalya vapeena, mokhavapalele vantu kenaa mokhonoja, kho nguno van'yaa onojaa gechoo kho nyoomba ya khwitangela Vayahudi no kho njela, ili vantu vawakholye. Nkhovaweela khapanga, evenee vapataga mfinga jawe. 3 Ila ogwegwe panaa okhovaalya vapeena, onojee inoji eloo khwa osweeki, ninga molaasi wakhoo wa khapanga akhamanye. 4 Vaalye vantu khwa osweeki, no Daada yakhoo yunaa agawine ganaa giswekile, alakhokolya.

5 "Ila panaa mokhomoloomba Matuunda, mokhawe kete muntu yunaa akwinoja mosoga ila nkha mosoga, kho nguno evenee vakhotogwa kholoomba vimelile kho nyoomba ya khwitangela Vayahudi no khompelo ya njela, ili vantu vavawone. Nkhovaweela khapanga, evoo vapataga mfinga jawe. 6 Ila ogwegwe panaa okholoomba, wingelage mokhate ya chumba chakhoo, dindaa molyango, apenee omolombe Daada yakhoo yunaa akhakhwigela. No Daada yakhoo yunaa agawine ganaa giswekile, alakhokolya.

7 "Panaa mokholoomba mokhawe ne mpola nyinki jenaa jetokhola emaana kete vantu vanaa vakhamomanya Matuunda. Evenee vakhoheewa kete Matuunda alavategela khopumana ne mpola jawe nyinki. 8 Mokhawe kete evenee, kho nguno Daada yenyu amanyile echoo kenaa mokhopooga ninga mbe mokhale momolombe. 9 Gechoo, onywenywe lombagi khwa Matuunda mkipaala,

‘Daada yisu yunaa opwale khochanya.

Lina lakhoo likoliwee,

10 Owami wakhoo wiije,

ganaa ogatogilwe agenee ganojeke paliwelelo, kete venaa gakhonojekha khochanya pa Matuunda.

11 Okhopele leelo endya yisu ya kela nsiko.

12 Okholekolele mabe gisu,

kete venaa nasu khokhovalekolela vanaa vatonejelaga mabe.

13 Okhatutule mo magemo,

ila okhoponye no oyoo Mobe. Kho nguno wami, ne ngulu, ne olaala a vyakhoo nsiko jensi patokhola odugo. Avyeene gechoo.’

14 "Yesu endelelaa khopaala, Mbe mokhovalekolela vantu mabe gawe, Daada yenyu wa khochanya, nanoyo alavalekolela nanyu mabe genyu. 15 Ila mbe akhamokhovalekolela vaange vanaa vakhovanojela mabe, avivyoo no Daada yenyu yunaa apwale khochanya khotopo avalekolele nanyu mabe genyu.

16 "Panaa mokhotuunga kholya, osho jenyu jekhalagele khosiimba kete venaa vakhonojaa vany'aa. Venee vakhosiimba kho osho jawe ili vigele khwa vantu kete vatungaga kholya. Nkhovaweela khapanga, evoo vapokelaga mfinga jawe. 17 Ila ogwegwe panaa okhotuunga kholya, okhopogiwa okhawale osho wakhoo no khosaakha nyele jakhoo, 18 ili muntu yeyensi akhamanye kete watungaga kholya, ila Daada yenyu yunaa akhakhwigela, amwenee yunaa akhopogiwa amanye topo. Apenee Daada yakhoo yunaa agawine ganaa okhonojaa kho osweeki, alakhokolya."

19 Mokhitolele nsawo jenyu paliwelelo panaa moswa ne kutu panaa vekhonoona, ne viwi vakhowuna no khwiwa. 20 Ila mwitolelage witoleli khochanya khwa Matuunda khonaa moswampi ne kutu vakhakhowola khojinonaanga, ninga viwi khotopo vingele khwiwa. 21 Kho nguno khonaa mokhotoola vento venyu, apenee ne meoyo jenyu jelaawa.

22 "Liso a kete etala kho mowele gwakhoo. Mbe liso lakhoo ipanga, mowele gwakhoo gwensi gokhowa no welo. 23 Ila mbe liso lakhoo lanonekhaga, mowele gwakhoo gwensi gokhowa ne wilo pii. Mbe welo gonaa gopwale mokhate mwakhoo yawaga kiiti, gechoo eyoo kiiti amba ituntumu modugo.

24 "Khotopo muntu yunaa nokhowolaa khovatomamela vamwene vawele, kho nguno alamosimbela yomwi no khomotogwa yoonge, ao alaawa palomwi no yomwi no khomobyeeda yoonge. Gechoo, khotopo mokhowole khomotomamela Matuunda ne nsawo khwi ituungo lemwii.

25 "Gechoo nkhovaweela, mokhawe no wowa khougela wome wenyu kete molalya chanuu ao molang'wela chanuu, ninga mokhawe no wowa khougela mewele jenyu kete molalyala chanuu. Mbi, endya a nsoga khokela wome? Avivyoo, myenda a mesoga khokela mowele? 26 Jekunagi nyonyi, ejenee akhajekhovyala mbeyu ninga akhajekhokongola ninga jetokhola keheenge cha khotolela makongola. Ila Daada yenyu yunaa apwale khochanya khojepelaa endya. Mbi, onywenywee nkha vasoga khokela nyonyi ejoo? 27 Gechoo, ananuu movamoonga venyu nokhowolaa khwiyongelelya ituungo la wome wakwe kho nguno ya wowa?

28 "Kho kee mokwigayanjaa kho nguno ya myenda? Kunagi maluwa ga mwipolu venaa gakhovelekha, akhagakhonoja molemo ninga akhagakhwisunela myenda. 29 Ila nkhovaweela, ninga Mwami Solomoni kho olaala wakwe wensi, aleakhalyala visoga kete maluwa egoo. 30 Mbe Matuunda khogalyekha geeke matiti ga mwipolu ganaa leelo gapwale ne igolo gakhojuutwa mo moto, mbi, Matuunda khotopo avyalyeke onywenywe visoga, onywenywe vanaa mokhomogoomba Matuunda kedo?

31 "Gechoo, mokhawe no wowa khwiwolya kete, ‘Kholaalya chanuu? Ao kholang'wela chanuu? Ao kholalyala chanuu?’ 32 Kho nguno vento evyoo vensi vikhogayelwa ne vantu vanaa vakhamomanya Matuunda. Ila Daada yenyu yunaa apwale khochanya pa Matuunda amanyile kete mokhopooga vento evyoo vyensi. 33 Ila onywenywe pogagi taali Wami wa Matuunda no khonojaa masoga ganaa agatogilwe mwenee, nanoyo alavaongelelya vento evyoo vensi. 34 Gechoo, mokhatungumale khougela igolo, kho nguno magayo ga igolo amba ga igolo, kela nsiko itite magayo gakwe minki.