1 Apenee Yesu aleingela kho nyoomba yenaa alevakhwitangela Vayahudi, no omoo alekhole no muntu yunaa angile apolile mokhono. 2 Omoo vantu vamoonga angile vamolindile Yesu amopon'ye muntu oyoo Nsiko ya Khosuupa, ili vakhowole khomositacha. 3 Yesu aleamowela muntu oyoo yunaa aleapolile mokhono, "Wiije epa ili vantu vensi vakhowone." 4 Apenee Yesu avawolya, "Khopumana ne njaanga jisu, khokhopogiwa khonojee mbi Nsiko ya Khosuupa? Mbi, khonojaa masoga ao mabe? Khopon'ya ao khowolaga?"

Ila evenee angile vapombola myaa. 5 Yesu aleavakunaa vensi khwa kesila, aleasayaa mudugo kho nguno ya okhaku wa meoyo jawe. Apenee amowela muntu oyoo, "Gololaa mokhono gwakhoo!" Nanoyo agololaa mokhono gwakwe, gwawa mopanga khanke. 6 Apaponye Mafalisayo alevapuma panji, vandyaa khopalana palomwii ne idale la vantu va Helode, vandyaa khopooga njela ya khomowolaga Yesu.

7 Yesu aleawokhaa epoo palomwii ne vahemba vakwe, vapeta pampelo ya ilambo lya Galilaya, ne idale ikolo la vantu alelamolonda. Vantu evoo alevapumelaga Galilaya, Yudea, 8 ne vaange alevapuma Yelusalemu, Idumea, no khopuma lwande jensi ja keeya ya lweje Yolodani ne lwande jensi jenaa jekhopilima ihala la Tilo ne sidoni. Madale egoo gensi ga vantu alegamopetela Yesu kho nguno alevategelaga mpola nyinki jenaa angile khonojaa. 9 Kho nguno angile khole vantu vinki, Yesu aleavawelaa vahemba vakwe vamwandalele ipogo yemwi, ili idale la vantu likhiije landye khomosunkhanga. 10 Kho nguno aleapon'yaa vantu vinki, valwile vinki alevandyaa khwisunkhaanga khopeta khonaa apwale Yesu ili vamopalye no khoponiwa malwile ganaa alevakholwaala. 11 Vantu vanaa angile vasalinkhanaga ne mademi panaa alevamowona Yesu, alevandya khogwa panse paulongolo wakwe no khokowa madoolo, khwa khopaala, "Ogwegwe amwene Mwana wa Matuunda!" 12 Ila Yesu aleavagilyaa kho okhakha vakhavawele vantu kete omwene ananuu.

13 Yesu aleatantaa paketonda, avetaa evoo vanaa angile avalomagaa viije khwakwe. Nanevo vamopetela, 14 nanuyo asagolaa movamoonga vawe vantu ikomi ne vawele, vanaa aleavetaa vatomwi, avawelaa, "Navasagolaga onywenywe mowe palomwi nane no khovalagelelya mpola nsoga, 15 ne navapelaga olaala wa khopumya mademi."

16 Ne evoo vantu ikomi ne vawele vanaa angile avasagolaga avenee ewa, Simoni yunaa Yesu aleamwetaa Petulo. 17 Ne vaange angile Yakhobo no Yohana, vana va Zebedayo, ewa vadogo vawele aleavetaa Boanege, emaana yakwe, "Vana va ngilimo." 18 Avasagolaa no Andelea no Filipo no Batolomayo no Mateo no Tomasi no Yakhobo mwana wa Alufayo no Tadayo no Simoni Moteteli wa nse yakwe. 19 Yuda muntu yunaa khopumelaa ihala la Kalioti, yunaa aleamogalokhaa Yesu.

20 Apenee Yesu aleatuwaa khonaa angile khikhalaga. Idale la vantu likhongan'yaa khanke, ninga Yesu ne vahemba vakwe alevakhonya kholya endya. 21 Panaa vadogwakwe Yesu alevategeela mpola ejoo, alevawookha vapeta khomosola kho nguno vantu alevakhopaala asalenkhanagaa.

22 Valaangi va njaanga ja Musa vanaa alevakhopuma Yelusalemu, alevapaala, "Oyo atite Beelzebuli, molaala wa mademi, amwenee yunaa khomopelaa olaala wa khopumya mademi."

23 Apenee Yesu aleavetaa vantu no khopaala nanevo kho mefwano, "Mbi Khatawe nokhowolaa mbi khwibidinja mwenee? 24 Mbe vantu va wami womwii vasambanalaga no khwikhowa venee kho venee, wami owoo olalekha khwikhala. 25 Mbe khaye yemwii ilasambala khotale tale no khwandya khwikowa, odogo owoo olaacha. 26 Mbe, wami wa Khatawe olasambalana no kholegonkhana, wami owoo olalekha khwikala, no owoo olaawa odugo wakwe."

27 Khotopo muntu yunaa nokhowola khokholanga khaye ya muntu yunaa atite ngulu no khomosukha muntu nsawo yakwe khotopo khomotunga taali oyoo yunaa atite ngulu, papene alakhowola khomosukha nsawo yakwe.

28 "Khapanga nkhovaweela, vantu valawochelwa mabe gawe gensi palomwi ne vanaa vakhomotokha Matuunda, 29 ila yunaa khomotokhaa Moye wa Matuunda, alalekha khowochelwaa mabe gakwe wome wakwe wensi, kho nguno muntu yunaa khonojaa gechoo alaawa atite mabe nsiko jakwe jensi ja wome." 30 Yesu aleapalaa gechoo kho nguno vantu alevakhopaala, "Atite idemi."

31 Apenee aleviija valuna vakwe Yesu palomwi no maye wakwe, alevimelela panji, vamotoma muntu apete amwete. 32 Idale la vantu alevikhalaga khomopilima Yesu, nanevo vamowela, "Maye ne valuna vakhoo vapwale panji vakhokhopooga." 33 Yesu avawolya, "Maye waane ne valunane a vananuu?" 34 Apenee avakunaa vantu vensi vanaa alevamopilimaga, apalaa, "Kunagi! Ewa avenee maye waane ne vadogwane. 35 Muntu yeyensi yunaa khonojaa ganaa Matuunda alomile, ewa avenee mokolwane no iloombo lyane no maye waane."