1 Mafalisayo vamoonga ne valaangi va njaanga ja Musa vanaa alevapuma Yelusalemu, alevikhongan'yaa panaa Yesu aleapwale. 2 Alevawawona vahemba vamoonga va Yesu vakholya endya kho mekhono yenaa ikhagombwa kho njela ja khokumbekha, kete venaa aleilomilwe kho njaanga ja Vayahudi.

3 Kho nguno Mafalisayo ne Vayahudi vensi alevakholoonda malaangi ganaa alevapokela khopuma kho vakoko jawe, evenee alevakhalijaga endya patokhola khokawala khopumana ne desituli ja khokumbekha Matuunda. 4 Khanke, panaa vakhotuuwa khopuma mwisokho, alevakhalijaga kento chechensi patokhola khokhawala mekhono, alevakholoonda njaanga jiinge kete venaa njela ya vakhosiinga vekhombe ne nyoongo ne ngegele ja shaba.

5 Apenee Mafalisayo ne valaangi va njaanga vamowolya Yesu, "Kho kee vahemba vakhoo akhavakholoonda mapokeelo ga vakoko visu, ila khopumana ne desituli ja khokumbekha Matuunda?"

6 Yesu avawela, "Molevapepi! Isaya mokuuni wa Matuunda aleakunaa visoga khonguno yenyu, panaa aleandekha.

‘Vantu ewa vakhonkholya kho mpola topo,

ila momeoyo jawe, valekhotale nane.

7 Khonkumbekha khwawe khotopo chechensi, khonguno vakholiga njaanga jawe venee, jenaa onene alenkhavapela.’

8 "Onywenywe mokholekha njaanga ja Matuunda, ila mokholoonda njaanga ja vantu."

9 Yesu aleendelela khovaweela, "Oywenywe motite njela nsoga yenaa ikhovanojaa khosiita njaanga ja Matuunda ili mowe mokholoonda malaangi genyu. 10 Kho nguno njaanga ja Musa alejapalaa, ‘Motogagwe daada yakhoo no maye wakhoo’ no ‘muntu yeyensi yunaa khomotokha daada wakwe ao maye wakwe khopogiwaa khowolagwa.’ 11 Ila onywenywe mokholaanga ‘Mbe muntu atite kento kenaa nomopelaa daada yakwe ao maye wakwe,’ ‘Kento echoo a kolobani’ emaana yakwe a kento kho nguno ya komopumelya Matuunda, 12 gechoo mokhovanojaa vantu evoo vakhavalye valeli vawe. 13 Gechoo avyenee venaa mokhowocha olaala wa njaanga ja Matuunda khwa njela ya malaangi ganaa mwagapokelaga. Khanke, jepwale mpola nyinki jenaa mokhonojaa kete ejoo."

14 Apenee Yesu alealyetaa khanke idale la vantu, avawelaa, "Ntegeleli vensi ili mokhowole khomanya. 15 Khotopo kento kenaa kekhomwingela muntu mokhate khopuma panji ne kenaa kekhomonoja muntu akhagombwe kho desituli ja khomokumbekha Matuunda. Ila kenaa kekhopuma mokhate mwa muntu achenee kekhomonoja muntu akhagombwe khomokumbekha Matuunda." 16 Va matwi ga khotegeela ategeele!

17 Yesu ne vahemba vakwe panaa alevalelekha idale eloo la vantu no khwingela mokhate, vahemba vakwe alevamowolya avasonsomolele emaana ya mofwano ogoo. 18 Yesu avawelaa, "Mbi, ninga nanyu mokhamanya, kete kento kenaa kekhomwingela muntu mokhate khopuma panji, khotopo kemonoje muntu akhagombwe khomokumbekha Matuunda? 19 Kho nguno kekhakekhomwingela momooyo, gechoo, kekhomwingela mondaa, apenee kekhwija kekhopuma panji ya mowele gwakwe." Khwa khopaala gechoo, Yesu aleanojaa endya jensi jegoombwe khomokumbekha Matuunda.

20 Apenee Yesu endelelaa khopaala, "Kenaa kekhopuma mokhate khwa muntu achenee kekhomonoja muntu akhagombwe khomokumbekha Matuunda. 21 Kho nguno momooyo gwa muntu gakhopuma maheewo mabe kete, osencha, wiwi, owolagi, 22 wiketuu, wimi, obe, opepi, khotamanela nsawo, wiilu, ntoki, osiiti no oleele. 23 Obe wensi owo okhopuma momooyo gwa muntu, agenee gakhomonojaa muntu akhagombwe khomokumbekha Matuunda."

24 Yesu aleawokhaa epoo no khopeta lwande ja pepi ihala la Tilo. Okhoo aleingelaa mo nyoomba yemwi yenaa aleakhaloma muntu yeyensi amanye, ila aleakhakhowola khiswekha. 25 Epoo mokhiima yomwi angile atite mwalele yunaa aleingelagwaa ne idemi, mokhiima oyoo panaa aleategelaa mpola ja Yesu, apaponye aleamotungamelaa pamegolo jakwe. 26 Kho nguno mokhiima oyoo angile nkha Moyahudi, ila omwene angile khopumelaa ihala la Foinike kho nse ya Silia. Amolombaa modugo Yesu amopumye mwalele wakwe idemi. 27 Ila Yesu aleamowela "Valekee vana vikhote taali, kho nguno nkha visoga khosola endya ya vana no khojejutela embwa."

28 Ila mokhiima oyoo aleamowela, "Odaada, ila ninga embwa jenaa jepwale panse ya meza jekholya masigelo ganaa alevakholya vana."

29 Yesu amowelaa mokhiima oyoo, "Kho nguno ya khogoomba khwakhoo, tuwaa khokhaye, kho nguno idemi lamopumaga mwalele wakhoo!"

30 Apenee mokhiima oyoo, aleapetaa khokhaye yakwe, amopikha mwalele wakwe agonagaa mo kegonelo, ne idemi alelamopumaga.

31 Apenee Yesu aleawokhaa pepi ne lwande ja ihala la Tilo. Akelelaa Sidoni apikha Dekapoli emaana yakwe mahala ikomi, khokelela ilambo la Galilaya. 32 Epoo vantu alevamoletela Yesu muntu yomwi yunaa angile kameme no nkiwa, vamoloomba amotolele mokhono gwakwe muntu oyoo ili amopon'ye. 33 Yesu aleamokenkha muntu oyoo khompelo khonaa alekhotokhola vantu, amoketela lojala mo matwi, apenee atyela matye mo lojala no khopalyaa lolemi lwa muntu oyoo. 34 Apenee Yesu aleakunaa pachanya khwa Matuunda, aputelaa kho ngulu amowelaa, "Efata," emaana yakwe "Digokhaa."

35 Apaponye muntu oyoo andyaa khotegeela no lolemi lwakwe lwatungolwa, andyaa no khopaala.

36 Yesu aleavawelaa vakhamowele muntu yeyensi mpola eyoo. Ila venaa alekhovagilya, avyenee alevakhwendelela khosambalyaa mpola ejoo. 37 Vantu vensi alevakhumya modugo, vandyaa khopaala, "Khonojaa gensi visoga, avaalaja velembaa khotegeela, ne makameme khopaala."