1 Angile jesigile nsiko jewele topo khopikha wenga wa Pasakha ne wenga ya mikate yenaa ikhatulwa amila. Vapumya matambekho ne valaangi va njaanga alevakhopooga njela ya khomogweela Yesu khwa osweki no khomoulaga. 2 Ila alevapala, "khokhanoje mpola eye kho ituungo la wenga Pasakha, kho nguno vantu vakiije vanojee iwo."

3 Yesu panaa aleapwale okhoo Betania kholyaa endya ya mesee khokhaye pa Simoni yunaa angile atite malimwa. Maye yomwi aleijaa ne nsopa yenaa ekhonogelelwa kho ibwee la Alabasta, yenaa angile itite makuta matukeleli ganaa gakhogolwa khwa mpia nyinki, apwataa nsopa eyoo no khomwitelelya Yesu makuta egoo khwi itwe.

4 Vantu vamoonga vanaa alevapwale epoo, alevapalana venee kho venee, "Kho kee khotomelaa makuta ega vibe? 5 Makuta ega anga avakhowola khogolyaa khwa mpia nyinki modugo, ne mpia ejoo khovapeela vapeena." Vamokhakela vikhakha maye oyoo.

6 Ila Yesu aleavawelaa, "Kho kee mokhomogayanjaa? Moleki maye oyo, kho nguno anojelagaa mpola nsoga modugo. 7 Vapeena mopwale nanevo nsiko jensi, namokhowola khovaalya ituungo lelensi lenaa amotogwa. Ila onene amba nkha palomwi nanywi nsiko jensi. 8 Omwene anojagaa lenaa akhowolagaa, agwitekelajaa mowele gwaane makuta ili khwandalela mazyeekho gaane. 9 Nkhovaweela khapanga, kho lwande yeyensi pa liwelelo panaa Mpola Nsoga elatengwa, empola eye yenaa anojagaa maye oyo, lelapalwa kho nguno ya khomokombola mwenee."

10 Apenee Yuda wa Isikalioti, yomwi wa evoo vahemba ikomi ne vawele Yesu, aleapeta kho vapumya matambekho valaala ili amogalokhe Yesu. 11 Vapumya laala matambekho valaal va Matuunda panaaa alevategela mpola ejoo, alevatogwa, alevalamolapela valamopela Yuda mpia. Apenee andyaa khopooga njela ya khomogalokha Yesu.

12 Nsiko ya kwandya ya wenga ya mikate yenaa ikhatulwa amila, nsiko yenaa nkholo wa pasakha yenaa kesenjwa, vahemba va Yesu alevamowolya, "Mbi khopooga khopete khweni ili khokhwandalele endya ya Pasakha?"

13 Apenee Yesu avatoma vahemba vakwe vawele avawela, "Mopete kho ihala, okhoo moliitanga no mogwisha yomwi akepolagaa ngeelo ya meje. Mwiije momolonde, 14 mpakha pakhaye yenaa aliingela, momowele mokhalakhaye, ‘Molaangi khowolyaa, kele khwenii chumba chaane kho nguno ya vahenja monaa ndaalya endya ya Pasakha palomwi ne vahemba vaane?’ 15 Nanuyo khavalageela chumba kekolo kenaa kepwale pachanya mwigolofa kenaa chandalelagwa no khonogelelwaa visoga. Onywenywe mokhwandalele endya ya Pasakha omoo." 16 Evoo vahemba vawele alevawookha vapeta kho ihala, vapikha kela kento kete venaa Yesu aleavawelaga. Gechoo vandaa endya pasakha.

17 Panaa aleyapikha mesee, Yesu aleiija no khowaa ne palomwi ne vahemba vakwe ikomi ne vawele omoo. 18 Panaa alevakholya endya, Yesu aleapala, "Nkhovaweela khapanga, yomwii wenyu yunaa kholyaa palomwi nane, alangalokha."

19 Epoo vahemba vakwe alevasaaya, kela yomwi aleandya khomowolya Yesu, "Mbi, amba onene Odaada?"

20 Yesu avawelaa, a yomwi wenyu onywenywe ikomi ne vawele, oyo yunaa khodobyaa mokate mwibakuli palomwi nane. 21 Khapanga, Mwana wa Muntu alaafwa kete venaa aleyandekhwa kho Maandekho ga Matuunda, ila amba magayo makolo khwa muntu yunaa khomogalokhaa Mwana wa Muntu kho nguno alagaya. Anga amba visoga mbe muntu oyoo anga akhalelwe.

22 Panaa alevakholya, Yesu aleasolaa mokate no khogolombela masoga khwa Matuunda, apalaa, agomegan'ya, avapelaa vahemba vakwe, no khovaweela, "Solagi molyee, ogo a mowele gwaane." 23 Apenee asolaa kekhombe kenaa ketite divai, asongelaa khwa Matuunda, avapelaa vahemba vakwe, ne vensi alevang'weela khwa khotomela kekhombe echoo. 24 Yesu avawelaa, "Eye ayenee chaji yaane ya ilekhano ya Matuunda ne vantu, yenaa ketekhaa kho nguno ya vantu vinki. 25 Khapanga nkhovaweela, khotopo ng'weele khanke divai ya zabibu mpakha panaa ndang'wela divai mpyaa kho Wami wa Matuunda."

26 Apenee valeveemba lwembo no khopeta kho ketonda cha Mizeituni.

27 Yesu avawela vahemba vakwe, "Nywenywe vensi molankembela no khondekha, kho nguno yandekwile kho mandekho ya Matuunda kete, ‘Ndamokhowa mosoongi nanewo nkholo valasambala,’ 28 Ila panaa ndafufokha, ndavalongola khopeta Galilaya."

29 Petulo amowelaa, "Ninga mbe vensi valakholekha, onene khotopo nkholeke!" 30 Yesu amowela Petulo, "Nhowela khapanga, otikhu owu, panaa njogolo alaawa akhale khowekha mala jewele, olapala mala jetato kete okhamanya."

31 Ila Petulo alendelela khokhandamelelya khopaala, "Ninga mbe ndalomwa khofwa palomwi nagwe, khotopo nkholeke." Vahemba vensi naneno vapala avivyoo.

32 Apenee vapeta kho lwande yenaa alekeetwa Getisemane. Yesu avawela vahemba vakwe, "Mwikhalage epa panaa amba onene mpetile okhoo kholoomba." 33 Apenee avasolaa Petulo no Yakhobo no Yohana. Nanoyo andyaa khosiima modugo no khogaya momooyo gwakwe. 34 Avawelaa, "Mooyo gwaane gwijolaga masiimo, mpakha ndepepi mfwee. Ikhalagi epa no khwiyandalela."

35 Apenee aleapetaa paolongolo kedoo, abudama alombaa apalaa, amba visoga mbe khalekha khokela ituungo eloo la magayo. 36 Apalaa, "Abba, emaana yakwe Daada yaane, khwako mpola jensi khojekhowola. Nkholomba ompumelye magayo ega, ila ikhawe kete venaa mpogile, ila kete venaa khotogwa gwegwe."

37 Apenee atuuwa kho vahemba evoo vatato, avapikha vatindilaga. Apenee amowolya Petulo, "Simoni, mbi, wagonaga? Mbi, okhakowola khomoloomba Matuunda ninga kho ituungo lemwi?" 38 Apenee, avawelaa, "Mwikhalage miso no kholoomba, ili mokhiije mwingele momagemo. Mooyo gokhotogwaa, ila mowele gotokhola ngulu."

39 Apetaa, khanke kholoomba apalaa mpola ajijoo. 40 Apenee atuuwa khanke kho vahemba vakwe avapikha vakhotindila. Kho nguno miso gawe alegijolaga ndoolo. Nanevo alevakhamanya lakhomowela.

41 Panaa Yesu aleatuuwa kho mala ya otato, aleavawela, "Mokhale mokhotindila no khosuupa? Lawelagi seji, ituungo lapikhaga, Mwana wa Muntu khogalokhwa no kholekhwa khwa vantu vanaa vatite mabe. 42 Lawilagi, khopetage, oyoo yunaa khongalokhaa alepepi khopikha."

43 Apaponye Yesu panaa aleakhale khopalaa, Yuda yomwi wa evoo vahemba ikomi ne vawele apikha palomwi ne idale la vantu vanaa vatite nsiime ne malungu. Vantu ewoo alewatomwile ne vapumya matambekho valaala ne valaangi va njaanga ne vakhombi va Izilaeli. 44 Seji Yuda oyoo yunaa aleamogalukha Yesu, aleavapalaga vantu evoo lomekho eye, "Yunaa ndamosona amwenee mwiije momogwelage oko mwamotola panse ne khomolendelelya."

45 Yuda panaa aleapikha topo, aleamopetela Yesu amowela, "Molaangi!" Apenee amosona. 46 Apenee, evoo vantu alevamogwela Yesu, vamotola panse ne khomolendelelya. 47 Apenee yomwi wa evoo vanaa alevapwale kho lwande wa Yesu yunaa angile alepepi nanoyo, asomolaa mpanga yakwe no khomodomola itwi motomami wa mopumya matambekho molaala.

48 Ila Yesu avawelaa, "Mbi, mwijaga ne mpanga ne malungu khongwela kete onene a mosuki? 49 Nsiko jensi alempwale palomwi ne nywenywe nkoliga kho nyoomba ya Matuunda, ninga alemokhangwela, ila seji lazima Maandekho ga Matuunda gadugame." 50 Apenee vahemba vakwe vensi alevamolekha no khokembela.

51 Molomyana yomwi yunaa angile ikumbaga mwenda mwelo topo, nanoyo alekhomolonda Yesu, panaa alevamogweela, 52 alekhaa mwenda gwakwe gwa khwikuumba no khokembela oko alebwiinda.

53 Apenee, vamokenkha Yesu kho mopumya matambekho molaala wa Matuunda, panaa vapumya matambekho valaala va Matuunda vensi, vakhombi va Izilaeli ne valaangi va njaanga ja Musa vensi alevikhungan'ya palomwi. 54 Petulo aleamolondelelyaa Yesu khotale, mpakha kho lokinga khwa mopumya matambekho molaala, ikhalaa palomwi ne valindeleli oko vakhota moto. 55 Vapumya matambekho valaala ne ivaanza lensi alevapoga owoni wa khomositacha Yesu ili vakhowole khomowolaga ila alevakhapata. 56 Vantu vinki angile wapumyaa mpola ja opepi khomougela Yesu, mpola jawe jekhapyana. 57 Apenee vantu vaange aleviimelela vapalaa mpola ja opepi khomougela Yesu vapalaa, 58 "Osweswe alekhwamotegeela khopalaa, ‘Ambomola nyoomba eye ya Matuunda, yenaa aleyajengwa ne mekhono ja vantu, kho nsiko jetato ndajenga nyoomba yeenge yenaa ikhajegwa ne mekhono ja vantu.’ " 59 Ila ninga gechoo, mpola ja vantu alejekhapyana.

60 Epoo mopumya matambekho molaala, imelelaa paolongolo yawe, amowolya Yesu, "Mbi, ogwegwe khotopo opaale khapanga yakhoo, khokhowugela ogwegwe?" 61 Ila Yesu ikhala myaa, ale akhapala ninga mpola yeyensi. Molaala wa mofumya matambekho amowolya khanke, "Mbi, ogwegwe amwene kilisto, Mwana wa Matuunda yunaa Khokhomokholya?" 62 Yesu amowela, "Onene, amwene, molamowona Mwana wa Muntu yunaa ikhala kho mokhono wa molyelo wa ngulu, kiija ne malunde ya pachanya ya Matuunda." 63 Mopumya matambekho molaala ademolaa mwenda gwakwe, apalaa "Mbi, khole nguno ya khopooga vawoni vaange? 64 Onywenywe vensi mwategela venaa khomotokhaa Matuunda. Onywenywe mokholamola mbi?" Vensi alevaloma awolagwe.

65 Apenee, vantu vamoonga alevandya khomotyela matye, vamotuunga ketambala momiso, vamodokulanga no khomoweela, "Lotaa ananuu yunaa akhokowaa." Nanevo valindeleli alevamopatulanga makhofi.

66 Petulo panaa aleakhale apwale kho lokinga oloo, mwalele yomwii yunaa angile matomami wa mopumya matambekho molaala aleijaa. 67 Panaa aleamowona Petulo khootaa moto, aleamokunaa modugo, amowelaa, "Ninga nagwe angile opwale palomwi no Yesu Monazaleti." 68 Ila Petulo asitaa, apalaa, "Nkhamanya, ninga nkhelewa kenaa khopaala." Apenee Petulo apumaa, apetaa kho njela ya khwingelela. 69 Motomami oyoo wa kekhiima panaa aleamowona Petulo khanke, aleavawela vanto evoo vanaa angile vimelelaga epoo, "Muntu oyoo a yomwi wawe," 70 Ila petulo asitaa khanke.

Ituungo panaa lakela vantu vanaa alevemaga nanuyo vamowela, "Khapanga ogwegwe a yomwi wawe, kho nguno ogwegwe ole Mogalilaya." 71 Ila petulo aleandyaa khololoma no kholapa kete, "Nkhamomanya muntu yunaa mokhomopalela."

72 Apaponye njogolo yawekha mala ya owele. Apenee, petulo akhombola mpola yenaa Yesu aleamowelaa, kete, "Panaa njogolo alaawa akhale khowekha mala jewele, olapala mala jetato kete okhamanya." Apene Petulo aleadagadaa no khwandya khokoota.