1 Petulo ni Yohana yapo adali akali kwaauzila wandhu, adafika ajhukulu wamkulu wa alonda a nyumba ya Amnungu ni Asadukayo. 2 Adakwiya kupunda yapo wadaona Petulo ni Yohana niayaluza ni kwaalalikila wandhu kuti Yesu wahyuka, chindhu icho chilangiza kuti wandhu akufa siahyuke. 3 Chimwecho adaagwila Petulo ni Yohana ni kwaayika mndende mbaka siku la kawili pakuti ndhawi imeneyo idali ujhulo. 4 Nambho wandhu ambili yawo adavela uthenga ujha adakamba Petulo ni Yohana adakhulupilila ni adali waachimuna ochuluka kufikila ngati elufu zisano. 5 Siku la kawili, achogoleli a Ayahudi, azee ni oyaluza thauko adasonghana ku Yelusalemu. 6 Kumeneko adapezana ni wamkulu wa ajhukulu uyo wamatanidwa Anasi ni Kayafa ni Yohana ni Isikanda ni wandhu wina ambili yawo adali a khamu la Wamkulu wa mjhukulu. 7 Adaaimika atumwi pachogolo pawo, adaafunjha, "Mchita vindhu ivi kwa mbhavu ziti, kapina kwa ulamulilo wa yani?"

8 Ndiipo Petulo wadaayangha uku wajhala mbhavu za Mzimu Woyela, "Anyiimwe achogoleli ni azee a wandhu a ku Izilaeli! 9 Ngati lelo lino mtifunjha nghani za chindhu chabwino icho wachitidwa yujha ndendele ni umo walamichidwa, 10 basi ijhiwike kwa anyiimwe ni kwa wandhu wonjhe a Izilaeli kuti, kwa jhina la Yesu Kilisito wa ku Nazaleti, uyo mudampachika pamtanda, nambho Mnungu wadamuhyukicha, nde ilo lamchita mundhu uyo wali pachogolo panu walame. 11 Yesu uyu nde yujha wadakambidwa Mmalembo Yoyela,

‘Mwala uwo mdaukana anyiimwe omanga nyumba,

chipano wakhala mwala waukulu wa msingi.’

12 Yesu yokha nde uyo wakhoza kwaombola wandhu, pakuti pajhiko lonjhe, palibe jhina lina tapachidwa ilo likhoza kutiombola."

13 Anyiwajha achogoleli ni azee yapo adaona kulimba mtima kwa Petulo ni Yohana ni kuti ni wandhu yawo saadasome, adazizwa kupunda, adajhiwa kuti adali pamojhi ni Yesu. 14 Nambho pakuti adamuona yujha mundhu wadalamichidwa waima pamojhi ni Petulo ni Yohana, saadakhoze kwaakambila chindhu chilichonjhe. 15 Chimwecho wadaalamula Petulo ni Yohana ni yujha wadalamichidwa atuluke kubwalo kwa bwalo la milandu, ni anyiiwo adakhalila mnyumba niakambila kuusu nghani zimenezi achinawene kwa achinawene. 16 Adafunjhana, "Taachite chiyani wandhu anyiyawa? Kila mundhu uyo wakhala ku Yelusalemuu wajhiwa kuti chodabwicha ichi chachikulu chachitika, niife sitikhoza kukana chindhu ichi. 17 Nambho, kuti tikhoze kuchekeleza vindhu ivi visadaendekela kuwanda kwa wandhu ambili, taaonye wandhu anyiyawa kuti saadakambanjho kandhu kwa mundhu waliyonjhe kwa jhina la Yesu."

18 Ndiipo wajha achogoleli wa nyumba ya milandu wadaatana mkati ni kwakaniza sadaakambila kapina kwaayaluza wandhu kwa jhina la Yesu. 19 Nambho Petulo ni Yohana wadaayangha, "Mlamule mwaachinawene wake ngati ni bwino pamaso pa Mnungu kuti tikuveleni anyiimwe kapina Mnungu. 20 Nambho ife sitikhoza kusiya kukamba yayo tayaona yathu ni kuyavela." 21 Ndiipo azee a bwalo la milandu wadaakanizanjho kwa ukali kupunda ni kwaasiilila. Pakuti siadapate ndande ya kwaalanga, ndande wandhu wonjhe amamtamanda Mnungu kwa icho chidachitika. 22 Pakuti msinghu wa yujha mundhu wadalamichidwa udapitilila vyaka alobaini.

23 Pampajha Petulo ni Yohana yapo adasiilidwa, adabwelela kwa okhulupilila achanjawo ni adaakambila yayo adakambilidwa ni waakulu wa ajhukulu ni azee. 24 Wokhulupilila wajha yapo adavela chimwecho, adavomelezana kumpembha Mnungu kwa pamojhi niakamba, "Imwe Ambuye, nde yawo mudaumba kumwamba ni jhiko lapanjhi ni nyanja, ni vindhu vonjhe ivo vili mkati mwake. 25 Mudakamba ni atate wathu Daudi kwa njila ya Mzimu Woyela, pokamba,

‘Bwanji, ndande yanji wandhu amayiko yina anyanjhila?

Bwanji, ndande yanji mafuko ya wandhu yaganiza kumuukila?

26 Mafumu ya pajhiko ajhikonja,

ni olamulila asonghana pamojhi,

kuti achuchane ni Ambuye Amnungu pamojhi ni Kilisito wake.’

27 Zenedi Helodi ni Pontio Pilato adasonghana pamojhi ni Wandhu osati Ayahudi ni wandhu a ku Izilaeli kumchucha Yesu, mtumwi wanu Woyela, uyo mudamsangha wakhale Kilisito. 28 Yetu, anyiiwo adakomana dala amchite vindhu vijha imwe mdavifuna ni kudapangidwa kuyambila kale kwa mbavu zanu ni chifuno chanu. 29 Chipano Ambuye, onani kuofya kwao. Mutikhozeche ife mbowa wanu kuyakamba mau yanu popande mandha yaliyonjhe. 30 Langizani mbhavu zanu kuti mwaalamiche wandhu, mchite vodabwicha kwa jhina la Mwana wanu Yesu Woyela."

31 Yapo adangomaliza kupembhela, pamalo pajha adakomanilana padatingizika. Wandhu onjhe adajhazidwa ni Mzimu Woyela ni kukamba mau la Mnungu popande mandha.

32 Gulu la wandhu lidamkhulupilila Yesu lidali ni mtima umojhi ni mzimu umojhi. Palibe uyo wadanena kuti vindhu ivo alinavo ni vake, nambho adagawana wonjhe vindhu vonjhe ivo adalinavo. 33 Atumwi adapeleka umboni wa kuhyuka kwa Ambuye Yesu kwa mbhavu zonjhe, ni mwawi wa Mnungu udali pamojhi nawo wonjhe. 34 Wala padalibe ata mundhu mmojhi pa gulu lawo uyo wadalibe kandhu, pakuti kila ndhawi, wajha adali ni minda ni nyumba adavigulicha, adajhanazo ndalama izo adazipata, 35 ni kwaapacha atumwi, ndalama zijha adazipata ni anyiiwo adazigawa kwa kila mmojhi kuchokana ni umo wadafunila.

36 Mundhu mmojhi Yosefu, mundhu wamtundhu wa Alawi, uyo wadabadwila ku Kupulo, atumwi amamtana Balinaba, mate yake, Mundhu uyo waathila wandhu mtima, 37 iye wadali ni munda. Wadagulicha mundawo ni zijha ndalama wadaapacha atumwi.