1 Chipano nifunjha, bwanji, Mnungu waakana wandhu wake? Notho! Ine namwene ni Mwizilaeli, mbadwa wa Ibulahimu, wa fuko la Benjamini. 2 Mnungu siwadakane wandhu wake Yawo wadasangha, kuyambila poyamba. Mkumbukila malembo ya Mnungu umo yakambila nghani za Eliya yapo wadampembha Mnungu kwa nghani za Izilaeli, 3 "Ambuye waipha alosi wanu ni kugomola maguwa yanu. Nangokhalape ine nekha, niine afuna kunipha!" 4 Bwanji Mnungu wadamuyangha chiyani? Wadamuyangha, "Najhiikila wandhu wanga alufu saba yawo sadamlambile mnungu waunami watanidwa baali." 5 Chipano nde umo ili pa ndhawi ino ya chipano. Alipo wandhu wanga ochepa yawo akhalila, yawo adasanghidwa ni Mnungu ndande ya ubwino wake. 6 Mnungu waasangha wandhu kwa ubwino wake, osati kwa vichito vao. Pakuti ngati kusangha kwake kudakakhulupilila vichito va wandhu, ubwino wake sidakalanjho ubwino.

7 Chipano bwanji? Wandhu a Kuizilaeli siadachipate chijha amachifunafuna, nambho wonjhe adasanghidwa adachipata. Wajha wandhu wina adachitidwa sadaujhiwa uthenga wa Mnungu, 8 ngati umo yalembedwa mmalembo ya Mnungu,

"Mnungu waichita mitima yao kukhla yolemela,

ni mbaka lelo lino sakhoza kupenya kwa maso yao,

ni kuvela kwa makutu yao."

9 Niiye Daudi wakamba,

"Maphwando yao yakhale misambha ya kwakodwecha,

aghwe ni kulangidwa.

10 Maso yao yatilidwe mdima

siadakhoza kupenya.

misana yao ikwatame kwa kulaga siku zonjhe."

11 Chipano nitofunjha a Ayahudi yapo agwa bwanji saukanjho? Notho kuchokana ni kulakwa kwao uomboli wajhela wandhu amaiko yina, kuti Ayahudi apate kwaonela njhanjhe 12 Kulakwa kwa Ayahudi kwachita mwawi waukulu pa kwa wandhu a jhiko, nikulakwila kwao mchizimu kwa peleka mwawi waukulu kwa wandhu amaiko yina, ngati Ayahudi ambili sabwele kwa Kilisito sikukhale mwawi wakukulu kupunda kwathu.

13 Chipano nikukambilani anyiimwe wandhu amaiko yina, ndande ine nakhala mtumwi wa maiko ina nijhidamila njhito yanga, 14 kuti nachite wandhu wanga akuoneleni anyiimwe njhanjhe, ni nipate kwaombola akumojhi wao. 15 Ikakhala kukanidwa kwao, kudapeleka jhiko livanichane ni Mnungu, siikhale bwanji yapo savomelezedwe ni Mnungu? Kwao sikukhale bwanji ngati usati umoyo pambuyo pa nyifa!

16 Ikakhala chibandhu choyamba cha bumunda chachochedwa kwa Mnungu, bumunda lonjhe laikidwa kwa Mnungu, mizo ya mtengo ikakhala yachochedwa kwa Mnungu ni ndhawi zake sizikhale zachochedwa kwa Mnungu. 17 Nambho ngati ndhawi za kumojhi mtengo wa Mzeituni zadulidwa, ni pamalo pake ndhawi za mtengo wa Mzeituni wa mthengo zavyalidwa. Anyiimwe wandhu amaiko yina nde ndhawi zimenezo za mizetuni ya mthengo ni chipano mgwilizana mbhavu ni mwawi wa mchizimu ni ngati mitengo ya Mizeituni mbusitani. 18 Chipano simdadelela wajha adulidwa ngati ndhawi! Ata ngati chilipo cho jhidamila, kumbukilani kuti osati anyiimwe muthangatila mizo, nambho mizo nde iyo ikuthangatilani anyiimwe.

19 Nambho siukambe, "Ndhawi zidadulidwa dala ine nivyalidwe pachikhonyo." 20 Yetu ndhawi zimenezo zidadulidwa ndande ya kosakulupilile kwao, nambho iwe waiima kwa chichikhulupi chako, iwe siudajhidama nambho uope. 21 Pakuti, ngati Mnungu siwadalengele lisungu Ayahudi, yawo ali ngati ndhawi izo zidali mmayambo, bwanji uganiza siwakulengele iwe lisungu? 22 Mnungu umo wali wabwino ni iye ni mkali. Iye ni mkali kwa anyiwajha agwa, ni wabwino kwaiwe ngati siundekele kukhala pa ubwino wake, ngati chimwecho iwe nawenjho siudulidwe. 23 Ayahudi nawo chimwecho, ngati sabwelele kumkhulupililanjho, siabwezeledwenjho yapo adali kuyambila kale. Pakuti Mnungu wakhoza kwabwezelanjho. 24 Anyiimwe wandhu amaiko yina, muli ngati ndhawi ya mtengo wa mzeituni wa mthengo, nambho mwachochedwa kumeneko, mwavyalidwa mmunda waung'ono pamalo yapo padali osati panu. Nambho Ayahudi ali ngati mitengo ya mizeituni, nisiilimba kupunda anyiiwo kuvyalidwanjho pa mtengo umweo uli wao.

25 Achabale wanga nifuna muujhiwe uzene uwu dala simdajhiona anjelu kupunda. Mbuli ya kwa idali Ayahudi idali kwa ndhawi yochepape, mbaka yapo wandhu amaiko yina samkhulupilile kwa Mnungu. 26 Pamenepo ndipo jhiko lonjhe la Izilaeli siliomboledwe, ngati umo yalembedwa,

"Mwomboli siwajhe kuchokela Kusayuni,

siwavichoche machimo ya mbadwa wa Yakobo.

27 Ichi nde chipangano icho sinichite nao

ndhawi iyo siniyachoche machimo yao."

28 Ndande aukana Uthenga Wabwino, Ayahudi akhala adani Amnungu, nambho kwa mbhaso yanu anyiimwe wandhu amaiko yina. Nambho ndande adasanghidwa akali mabwenji Amnungu ndande ya achatate wao. 29 Mnungu wakathokwapacha wandhu mbhaso zake ni kwaasangha, siwadandaula kuti wachita chimwecho. 30 Poyambapo anyiimwe mdamkana Mnungu, nambho saino mwalengeledwa lisungu ndande ya kupanduka kwao. 31 Chimwecho kuchokana ni lisungu ilo mwapachidwa, Ayahudi ampanduka Mnungu chipano kuti nao alandile lisungu la Mnungu. 32 Pakuti Mnungu wamanga wandhu wonjhe pamojhi kwa kukana kwao kuti wapate kwalengela lisungu wonjhe.

33 Yetu, Mnungu wali ni chuma chambili kupunda, kujhiwa ni njelu ya Mnungu vilibe mathelo! Lisungu lake silipenyeka, ni njila zake sizijhiwaka!

34 Ngati umo yalembedwa, "Yani uyo wayajhiwa maganizo ya Ambuye?

Yani wakhoza kukhala mundhu wa kumthangatila maganizo?

35 Yani uyo wampacha Mnungu chindhu chalichonjhe

kuti wakhoze kubwezeledwa chindhu chimenecho?" 36 Pakuti vindhu vonjhe vichokela kwake, ndande yake vonjhe viendekela kukhalapo. Ulemelelo ukhale kwake ni hadi muyaya ikhale chimwecho.