Mateus 8

कोरलागिन्याजन आसबेलन्या

1 येशु डान्डातन लाहा पाइना घिन्या हुल आछिन्ट लागिऊ। 2 तोलोअ कोर लागिन्या आल्योङ रांऔ, ओटन आहाक घुन्डा टिकिस्यु ऐआढोव, "औ प्रभु, नङ चाहिनकन ङाजन सबेलौ ऐदुदुना।" 3 येशुले आकुई पसारस्यु नकाजन आछुउ, ओटन ऐलेऊ, "ङा इच्छ्या ऐढोङा, नङ बेलन्ते।" ओचोएटै नकाल कोर बेलौ। 4 तब येशुले नकाजन ऐआढोव। "काङ्काईजन तापानस्यौर। तर नङ हिनस्यु पुजाउरो ल्योङ थनसिन्ते, ओटन मोशाल आग्या अनुसारला भिटी चराइते, ओटन रुयाङ साची ग्याताहनत्या।"✝8:4 लेवी १४:१-३२

येशुले रोमी कप्तानल नोक्करजन आसबेलन्या

5 जब येशु कफर्नहुम सहरल हिनौ तोलोअ कप्तान आल्योङ रा:स्यु बिन्ति ढास्यु। नकाले ऐलेऊ, 6 "औ प्रभु, ङा नोक्कर लुला ताइस्यु भ्याईज दुख डोएस्यु झिमलै थाला परीस्यु लेया।"

7 येशुले कप्तानजन ऐआढोव, "ङा रा:स्यु नकाजन सबेल्ङा।"

8 तर कप्तानले ऐलेऊ, "औ प्रभु, ङाझिमल नङजन स्वागत ढान्या लायकला ङा मालेङदी, तर नङ बचन याएज छ्योङस्याङते, ओटन ङा नोक्कर बेलन्यालेया। 9 दानाङभन्या ङा बै अढिकारीयाङल न्युउल लिज्याङा, ओटन ङा न्युउल सिपाइयाङ लेरा, ओटन ङा तोलोअजन ‘हिनन्ते’ ऐढोङा, ओटन ना हिना, ओटन छुट्टैजन ‘रांन्ते’ ऐढोङा ओटन ना रांया। ङा सेवाऱ्याजन ऐटाइन्या ढोते, ऐढोङा, ओटन नकाले ना ढोवा।"

10 नकाल छेन थएस्यु येशुले अचम्म आमानिउ! ओटन आछिनछिन रांन्याङजन ऐआढोवाङ, ङा मछ्यु, जेजन ऐढाच्या, इस्राएललं बै आवाए घिन्या बिस्वास ङा डोएस्यु मालेङदी। 11 ङा जेजन ऐढाच्या, पुर्ब सनर पच्छिमङन तबर जना रांन्या लेरा, ओटन अब्राहाम, इसहाक सनर याकूबस स्वर्गला राज्यल भोसलं चुङन्या लेरा।✝8:11 लूका १३:२९ 12 तर इस्राएल राज्यला सन्तान बाहेरला चिऊन्याल क्याइसिरा। नङं रुयाङ व्अरन्या लेरा ओटन ह्वा ज़िङ कैन्यालेरा।✝8:12 मत्ती २२:१३; २५:३०; लूका १३:२८ 13 तब येशुले कप्तानजन ऐआढोव, "हिनन्ते, नङ जोमनताइन्या बिस्वास नढोनु, नङजन ओमनजै ग्याताईत्या।" तब नका नोक्कर नवाए बेलाई बेलौ।

येशुले तबर रुयाङजन आसबेल्वाङ

14 येशु पत्रुसलं झिमल रायापाइना नकाल माइज्यू नाएबोरले थलिस्यु चारपाईत आवङज्यान्या आरङौ। 15 ओले नाल कुई आछुस्यौ, ओटन नकाजन नाएबोरले आराहौ। ओटन नकाले सोस्यु आसेवा ढाऔ तअसिऊ। 16 जब ओइ ताहौ, तब आल्योङ नकाङै तबर जना दुस्टआत्मा लागिन्याङ राहोन्वाङ। ओटन ओले बचनङन जै दुस्टआत्माङजन आपलिइवाङ। ओटन नाएबोरन्याङ ज्वाए लेवाङ नका सोगलैजन आसबेल्वाङ। 17 यशैया अगमबक्ताले आछ्योङन्या अगमबानी पुरा ताहौ नाल्ट ऐताहौ। "ओले ओलजै गेमि दुर्बलताङ आलाङौ, ओटन गेमि नाएबोरयाङ सिमस्यु आलाङौ"✝8:17 यशैया ५३:४; १पत्रूस २:२४

येशुल सिइ ताहौ रोअन्याङ

18 जब येशुले आनावङल घिन्या रुयाङ हुल आरङवाङ, ओले आ सिइयाङजन दहल हूत हिनन्या आग्या आयोवाङ। 19 तोलोअ शास्त्री आल्योङ रांऔ, ओटन ओलजन ऐआढोव "औ गुरु ज्यू, नङ जोङ हिनन्, ङा बै न छिनछिन हिन्ङा।"

20 येशुले नकाजन ऐआढोव, "भुकन्याङल पुउयाङ लेरा, ओटन नमता बायाङल रा:सिप लेया, तर रुल ज़ाल नाल्टता ङए ढल्काइन्या पो बै माल्दी।" 21 ओलं सिइयाङ मध्य छुट्टै तोलोअले ऐलेऊ, "प्रभु ङाजन पहेला ङा बौजन रींन्नाऔ यांङते।"✝8:21 १राजा १९:२०-२१ 22 तर येशुले नाजन ऐआढोव, "नङ ङाछिनछिन रांन्ते, स्यौऱ्याङै रा:स्यौऱ्याजन रांईज ग्यारीनरत्या।"

येशुले आन्ढीजन आसदिङौ

23 येशु डोङ्गाल चरियापाइना सिइयाङ आछिनछिन हिन्वाङ। 24 अभिलच्याङन दहल घिन्या आन्ढी लागिऊ, ओटन छालले डोङ्गाजन टुपौ तअसिऊ। तर नवाए बेला येशु म्वाईज्याऔ। 25 सिइयाङ रा:स्यु ओलजन ऐलेस्यु रासोचटौ, "बचाइसिन्ते प्रभु! गे दुबिङा लेदुया।"

26 येशुले नकाङजन ऐआढोवाङ, "ऐ, अल्पबिस्वासी रुयाङ, जे दानाङ छ्याएज्याच्यो?" तब सोस्यु ओले आन्ढी सनर दहजन आहकारिउ, ओटन आन्ढी शान्त ताहौ। 27 "आका कैताइन्या रु रैस, दानाङभन्या आन्ढी सनर दहले बै इकाल पानन्या मानिरा रैस" ऐलेस्यु नका रुयाङ अचम्मै ताइवाङ।

दुस्टआत्मा लागिन्या नेंलोअ रुनें

28 जब येशु दहल हुदिफन्ट गदरिनीयाङल प्रदेसलं रांऔ, तब दुस्टआत्मा लागिन्या नेंलोअ रुनें ऊईलन नेराज्याऔक ओलसं डोएसिऊने। नकाने आवाए छ्याइला लेऊने, कि काङ्काई बै नलन रांऔ हिनौ माढुदुज्यावाङ। 29 नकाने ऐलेस्यु चिचच्याहौने, "औ परमेस्वरलं ज़ा, नङ घेनङन नै नरोअनु? नैति नङ घोन बेला आमाताहौङन घेनजन सजाय नयांरासिनु?"✝8:29 लूका ४:३४ 30 नकानेतन तचिइ लोएत वोअयाङल तोलोअ घिन्या बगाल लाज्यावाङ। 31 दुस्टआत्माङै ओलजन ऐढास्यु बिन्ति रांढोव, "यदि नङ गेजन पलिइसिनकन, गेजन वोअयाङल बगालल परिङसिन्ते।" 32 ओटन येशुले नकाङजन ऐआढोवाङ, "हिन्चिते।" तब नकाङ पलिईस्यु वोअयाङल पसिवाङ, ओटन वोअल सोगलै बगाल ओरलालन हुर्रिस्यु, दहला रील बुदिस्यु सिवाङ। 33 वोअयाङ छाज्यान्याङ ढोङस्यु सहरल हिन्वाङ ओटन ना दुस्टआत्मा लागिन्यानेजन कैताहौ सोगल रापानस्योवाङ। 34 तब सोगल इलाकाला रुयाङ येशु सकाए डोएसिरावाङ, ओटन ओलजन रङस्यु रुयाङै नकाङल पोलन हिनन्ते ऐलेस्यु ओलजन बिन्ति रांढोव।