Nkan lɛ ne kam te neshir
1 Ne kuti nkan lɛ ne yime, nkan ilɛmɛ ne yi bǝn Arik, nkan ilɛmɛ ne yi Arik. 2 Nkan ilɛmɛ ne yi bǝn Arik ne kuti.
3 Ne atu amaa Arik nena kiki bɔbɔk; bane na ikinuŋ ne yaŋ maa ba. 4 Nkanlɛ me iyi nkɔŋ kɛ vli, fe ivli kǝŋe ne Gli laŋ amkpa nyɛ aneshire. 5 Ilaŋa ilaŋ ne bu, ama ibu bane ku ilaŋa iyir ba.
6 Arik ne shar iner nuŋ; ndi azhɔu sak maa te Yɔɔna. 7 Iwa ne nyɛ te abla aneshir ilɛ ne atu ayi laŋa, te duŋ aneshir bɔbɔk abɛ wɔ lɛ didik kǝ Arik te tanyɛmɛ. 8 Iwa Yɔɔna ne tu maa ba wa ayi ilaŋa ba; ne nyɛ te bla ilɛ ne atu waŋ ndi ayi ne laŋa. 9 Waŋai wa ayi ilaŋ didik ilaŋ yiŋ ndi ne nyɛ gɔnmimi.
10 Nkan ilɛmɛ ne yi ne gɔnmimi, neme Arik ne na gɔnmimi netu amaa, ne yiŋɛ igɔnmimi bane zhiu ba. 11 Ne nyɛ ben aneshir amaa, ama aneshir amaa bane tau ba. 12 Ndi iye amɛ, aneshir abaŋ ndi ne tau ne sak maa tena tanyɛmɛ bene abɔu; atei nek ba mgbyamgbyaŋ kɛ yi amumuen abɛ Arik. 13 Ba ne yi amumun abɛ ŋli ne ikpa kǝŋe ba, bai nŋli kɛ kpa kǝ azhizhi ane kur lulum bǝn iwa ba; Arik wa ne tu maa ayi Tetɛɛ men.
14 Nkan lɛmɛ ne kam te ineshir tena, shaga ne ta zhɔk bǝn izub, isɔŋ ne miŋ mɔr. Tane yik Ngɔŋ maa, ai ngɔŋ kɛ ta maa ndi Izu ben Tetɛɛ maa.
15 Yɔɔna ne lɛ ne atu amaa, Ne zhin arumɔ te ŋar kɔr te di, <<Waŋa ayi waŋ ndi Mne bla lɛ ne atu amaa ndi Mne ndi, <A nyɛ ne goŋ muŋ, ama ayi Ngɔŋ anaŋ me, te ne amene yime rɛ kuti teshe aŋlim.>>> 16 Ne na iki didik maa ngɔŋ tane ta anu adidik ne atu ayi anu adidik. 17 Arik wa nɛ nǝk Musa lɛ kɛ cɛr maa; iki didik ben na zub ire ben Yesɔ Kristi. 18 Ba nuŋ ne zen ayik Arik ba, ama Arik iwa kiki maa, ndi ayi ben Tetɛɛ, ai wa ne duŋ azhiu.