Yesɔ ne bla waŋ ndi atei vuŋu alɛb
18 Yesɔ adi,<<Bam di izhineba bɔbɔk min ba; mne zhi abaŋ ndi mne hria ba. Ama iki yiŋ ndi ne cɛrǝ ibǝ shaga: <Iwaŋ ndi ta li ikili muŋ ai wa ate zor ben abɛm.>
19 Mbla zhin ilɛ kǝŋe te iki yiŋɛ ibǝ shi na, ndi ite na izhin tei tanyɛmɛ te Ayi nga myi Ayi nga. 20 Mbla zhin lɛ didik, iwaŋ ndi ate ta waŋ ndi mne sharu ne ta nga.>>
Yesɔ ne bla waŋ ndi atei vuŋ wa alɛb
21 Ndi Yesɔ ne bla lɛ kǝŋe, ne wɔ lɛn susun te lɛ ndende te di, <<Mbla zhin lɛ didik, izhiin ne miŋ min atei vuŋ me alɛb.>>
22 Abɛ zeu tsin akɔ lɛ ne akpa men te di, tei ayi ŋɔwa ne miŋ mǝnei. 23 Izhin ne miŋ kɛ abɛ tsene maa ndi Yesɔ anyeru, akɔ sɔŋ anyaŋu. 24 Siman Biturus adi Yesɔ, <<Bla ta ulɛ ne atu ayi ŋɔwai?>>
25 Abɛ zǝ Yesɔ tsin ate gbahir ben abɔu te rib bu te di, <<Ŋgon, ayi ŋɔwai?>>
26 Yesɔ adi ba, <<Ai waŋ ndi M tei nǝgu mbwab borodi ndi mne baŋ kɛ ne agbǝgba.>> Fe akɔ su ŋɔk ne agbǝgba ma te baŋ mbwab borodi me, te nek Yahuda Iskariyɔti, izu Siman. 27 Ndi Yahuda ne ta borodi me shetan iyir susun maa.
Yesɔ adiu Yahuda, <<nama andanda tena iki yiŋ ndi utei nai!>> 28 Ama inuŋ ne miŋ kɛ li iklime bane zhi iki yiŋ ndi Yesɔ ne di Yahuda ilɛ kǝŋe ba. 29 Ndi Yahuda iwa ayi ne Gli mgbɔ iyi shur azɔbɔ, abɛ zeu tsin anuŋ ayik tedi Yesɔ adiu abe te alɛb iki yiŋ ndi atei na igyaŋa neyi, kɔ abɛ nek abɛ iyah iki nuŋ. 30 Ndi Yahuda ne ta borodi me, aru abɛm. Ibu ne ka te ne kpaŋa.