1 Yesɔ adi, <<Nga Myi itiŋ Inabi didik, fena Tetɛɛ amuŋ wa ayi ne ahwaŋa. 2 Tetɛɛ amuŋ agyak kɔte nga takɛ ndi bate dɔ gbar ba, fe kɔte nga takɛ ndi ite dɔ gbar ana Ngama te bǝ dɔ gbar ngɔŋ. 3 Izhin menyi tsetser ne ilɛ keŋ ndi mne men blaa zhin. 4 Izhin bǝ yi ne miŋ muŋ, te Nga mbǝna yi ne miŋ min. Nga nkuŋkun ba shur dɔ ne tu maa ba; se ne yi ne mkpuŋkpa kɛ tiŋ Inabime. Izhineba iminyi ba zhin tei shur dɔ ba se izhin neyi ne miŋ muŋ. 5 Yesɔ adi,<<Nga myi itiŋ inabime; izhineba yi ngǝŋga ma. Neshir atei ne miŋ muŋ te mnayi ne miŋ maa, atei shur dɔ tetɛk; mba mte yime ba ba zhin tei na kinuŋ yir ba.

6 Atei ndi inuŋ ate kyak yi bene bɛm, ayi ndi nga inebi ikɛ tsǝm tyak zhɔk te ne klu; ir ngǝŋga ma avui, atuk ashur ne lu te gɔŋǝ. 7 Ate yi ndi izhin te yi ne miŋ muŋ tem nayi ne miŋ min, rib zhin kɔte nii ndi izhin wɔ bǝ, fe atei nek zhin neyi. 8 Iyiŋɛ iyi amɛ tǝ bɛ nek Tetɛɛ amuŋ ngɔŋ maa, te izhin bǝ dɔ agbar tetɛk, tena tsar akpa amin te izhin yi abɛ tsene amuŋ.

9 <<Ndi Tetɛɛ ne nyer me, neme ŋgam na nyɛr zhin. Fena izhin bǝ sɔŋ ne miŋ kɛ tanyɛme muŋ. 10 Ate yi ndi izhin te zǝ inǝk lǝlɛ muŋ, izhin tei sɔŋ ne nyer muŋ, ir keŋ ndi mne zǝ lǝlɛ yi Tetɛɛ muŋ tena sɔŋ ne nyer maa. 11 Mne blaa zhin ki yiŋɛ te nyɛr muŋ bǝ shaga netu min te inyɛr min bǝ shaga. 12 Inǝk lɛ muŋɔ idi: Nyer zhin akpa min ndi Mne nyer zhin. 13 Nyer ngɔŋ ba yi bǝn inuŋ naŋ amɛ ba, te nɛ nǝk tu maa ne atu akpa amaa. 14 Izhineba yi akpa amuŋ ndi izhin te zǝ lɛ kǝ bla muŋ. 15 Bam na zhɔzhin te agen ba, te igen bane zhi ndum kɛ atukɔ amaa ba. Neme, Mne zhɔzhin akpa amuŋ, te kɔte nii ndi Mne tei ben Tetɛɛ Mne nduŋ zhin izhi. 16 Bai zhineba ne hriam ba, ama ayi Ŋgawa mne hria zhin tena ndi zhin bǝ te dɔ agbar ngɔŋ ndi iyi kuŋkun, ir kɛ agbar ane yaŋ klɛtu. Fe Tetɛɛ atei nek zhin iki yiŋ ndi izhin te ribǝ ne sak muŋ. 17 Waŋa ai nǝk ilɛ yayas muŋ: Nyer zhin akpa amin.

18 <<Ate yi ndi aner abɛ gɔnmimi akyak zhin, izhin bǝ zhi te ne kuti akyak me. 19 Ate yi ndi izhin yi abɛ gɔnmimi, ai ibɛ nyer zhin. Ndi iyime, ba zhin yi abɛ gɔnmimi ba, ama ayi ngam ne hria zhin ne miŋ abɛ gɔnmimi. Waŋa ayi kiyiŋ ndi gɔnmimi kyak zhine. 20 Izhin bǝ shuzhi lǝlɛ ndi mne bla zhin neyi: <Igen ba anaŋ atukɔ amaa ba.> Ate sak me iya, atei na saak zhin iya iminyi. Ate yi ndi ne gli tsar muŋ ne asusun amen, atei na gli tsar mine. 21 Atei naa zhin ki mimin ne atu ayi sak muŋ, te bane zhi waŋ ndi ne shar me ba. 22 Abɛdi bam ne nyɛ te lɛ bene bɛba ba, bai bɛ yi abɛ lalɛ ba. Fe, ndi iyi amɛ, ba atei di te aba ne yaŋ zhi zumimin men ba. 23 Iwaŋ ndi ate kyak me akyak Tetɛɛ muŋ maayi. 24 Abɛdi bam nena kiyi duŋ avuŋ anu neyi amen ba, bai bɛ yik akpa amen abɛ lalɛ ba. Ndi azizaŋa neka yik kiki yi vuŋ anu yiŋɛ, te ne kyak me iyi ben Tetɛɛ muŋ. 25 Ama iyiŋɛ nena teduŋ nkanlɛ yi cɛr iyi Musa bǝ shaga: <Ne kyak me iyi sha ne yaŋ lalɛ.>

26 <<Ndi ine nǝ kli didik are ben Arik atei nyɛ, iwaŋ ndi ngam M tei sharu rɛ bǝn Tetɛɛ, Izhu Tsetser ne zub waŋ ndi aru are bǝn Tetɛɛ, atei bla zhin lɛ ne atu amuŋ. 27 Fe izhineba minyi tei bla lɛ ne atu muŋ, te izhin ne menyi bene bɛm ne kuti.