1 Fe abɛ ŋas alu klɛ bɔbɔk mǝne te gliu te kɔmɔ ben Bilatus. 2 Fe azeu ne wɔbo akla, tedi, <<Tani wɔ neshir waŋa azǝn la ntun mɔrɔ. Ayara ne ya gendu iye kaisar tena di wa ayi Kristi, Itum>>

3 Fe Bilatus a rib Yesɔ, <<Uyi Itum ne Yahudawa yi?>>

<<Mm, ndi une bla,>> Yesɔ tanyɛme.

4 Fe Bilatus abla ngɔŋ ine na ndum kǝ Arik bǝn aneshir te di, <<Bam ne vuŋ iner waŋa ne lalɛ nuŋ ba.>>

5 Fena akyak, <<Azǝn lɛk asusun aneshir bɔbɔk ne Yahudiya ne tsar maa. Ne baŋ are ben Galili te kam aŋyak ayaŋa.>>

6 Ndi ne wɔ me, Bilatus ne rib ka iner waŋa ayi awɔ ne Galili. 7 Ndi ne wɔ te Yesɔ ayi ne aŋɔk kɛ Hiridus, fe akɔ turu akɔmɔ bǝn Hiridus, waŋ ndi ayi ne Urshelima ne kpaŋa.

8 Ndi Hiridus ne yik Yesɔ, ne nyer ngɔŋ, ne baŋ mkpaŋ te azǝn wɔb te wa abɛ yigu, ne baŋ mkpaŋ azǝn wɔ kiki yi na maa, awɔb te wa abɛ na yik ki ngɔngɔŋ iyi vuŋ anu ben Yesɔ. 9 Fe Hiridus ne rib bu kiki tetɛk, Yesɔ bane sagu ma ba. 10 Ngɔŋ ine na ndum kǝ Arik ben abɛ tsar atɔra ane cɛr Musa ne klikli amɔ, te azǝn sagu iyah te bla kiki mimin ne tɔ maa. 11 Fe Hiridus ben abɛ kpaakpa maa azǝn sagu iyah te zen mlagu. Ne suu kiki didik, te kama gliu te kɔmɔ ben Bilatus 12 Nǝ bere Hiridus bǝn Bilatus nɛ yi akpa; ne bǝne tǝ zor ne akpa mɛn.

13 Bilatus ne zhɔ angɔngɔŋ abɛ na ndum Arik abiŋ, ben abɛ gli aneshir, 14 te na diba, <<Izhin ne gli iner waŋa igli nyɛmɛ ndi azǝn shɔk aneshir abɛ wɔb akla. Nga mne rib bu ne ti min bam ne vuŋu ne lalɛ nuŋ ba. 15 Tǝ vuŋ Hiridus maayi, ba ne Vuŋu ne kinuŋ ba te gliu aŋuru kama Gli tama; ndi izhin yik bane na kinuŋ ndi ne mla abɛ ŋunu ba. 16 Tǝ yeme, M tei duŋ a shuru a sisa te zhɔ gu.>> 17 Nǝ mkpaŋ kɛ na gyaŋ M tei zhɔk zhin neshir zhiin ne miŋ abaŋ ndi ne kpaba,

18 Ne kɔr zhin ne ŋar kɔr, <<Abɛ baŋ ner waŋa agli atibe! Te zhɔk ta Barabas!>> 19 (Barabas ne zhɔ gu ne jaru ne lɛ keŋ ndi ne te tsik ŋgbuu ne ntun,te ne tsik ner nuŋ aŋun.)

20 Ne wɔb te bɛ zhɔk Yesɔ, Bilatus ne na lɛ bene bɛba. 21 Fe aneshire akyak te ŋur ruru te di, <<Kpaŋ zhine wu! Kpaŋ zhine wu!>>

22 Mkpaŋ kɛ ntar alɛ bene bɛba: <<Anii? Ayi lɛ nii ne la kɛ? Bam ne vuŋu ne lɛ nuŋ keŋ ndi ne mla tǝ bɛ ŋunu ba. M tei duŋ tsǝgu ne asisa te zhɔ gu.>>

23 Ama ne kɔr ŋgɔŋ azǝn kyak te zen wɔb te bɛ kpaŋu ne kuŋkun, te yaa atɔŋ ŋgɔŋ. 24 Ankyak Bilatus anaa ba ki wɔb men. 25 A zuk ner ne kur ne jaru m ɔ azhɔk waŋ ndi ne ku ne lalɛ mimin te na ŋun neshir, ayi wa aba ne ta nyɛmɛ bene bɔu, te kama vuŋ Yesɔ wa nek.

26 Ndi ne baŋu agli te ru, avuŋ Siman awɔ ne kurane waŋ ndi atsǝn are ntun nuŋ, a baŋ nkpɔk nkunkun kɛ gen asagu te duŋu gli kɛ te zǝ Yesɔ. 27 Ntsan aneshir ne zeu, bene amba a zen zhin te lɔ susun maa. 28 Yesɔ akama tɔ tedi ba, <<Izhin aŋɔ abɛ Urshelima, duŋ zhin ne tɔ muŋ ba; izhin bǝ zhin atu min ben amumun amin. 29 Mkpaŋ tei nyɛ ndi zhin tei di, <Anu adidik ben amba bǝ sɔŋ klu, ndi ba ne ŋli ba abaŋ ndi bane ma ayak men ba!> 30 Fe <<<atei di Igbu ngɔngɔŋ, <<zhaku ne atu amɔr!>> Te na di igbu, <<Bǝ zǝr kuta!>>> 31 Te yi ndi iki anai amee ndi nkunkuŋ nak ri yi shushu, ani tei na tǝ nkunkuŋo te klu?>>

32 Aneshir anuŋ amɛ yaa, abɛ lalɛ, ne gar ŋlɔk ba ben abɔu. 33 Ndi ne kɔte yir amkpawaŋ ndi azhɔu te akpukpo tu, amɔ ne kpaŋu ne mkpɔk kuŋkun kɛ gen, ben abɛ zhib nuŋ ne ŋɔk lii maa, ine yaa maa ne ŋɔk mla. 34 Yesɔ adi <<Tetɛɛ, zuk ba zhɔk, te bane zhi kiyiŋ ndi aba nai ba.>> Ne gab nklunklu maa te zhɔk ankeŋkam.

35 Aneshire aklɛ zen tɔ, fe angɔŋgɔŋ azǝn mlagu. Te di, <<Ne ta anuŋ ashur; duŋu abɛ ta tu maa azhɔk ate yi ndi wa ayi Kristi ayou Arik, waŋ ndi ne hriau. >>

36 Abɛ kpaakpa anyɛ mlagu. Te nǝgu amashir mwamwaŋ 37 te di, <<Ate yi ndi uyi itum ane Yahudawa, ta tu mi zhɔk.>>

38 Ne cɛr lɛnuŋ asak ne tu maa, ndi icɛre di: <<WAŊA AYI ITUM ANE YAHUDAWA.>>

39 Izhin ne min abɛ la lɛme ndi ne kpaŋ ba ne mkpɔk nkuŋkun kɛ gen amɔ ayen Yesɔ, <<Di ka ayi wa yi Kristi mɛ? Ta tu mi zhɔk te na ta ta shur!>>

40 Fe izhin ma atsaŋu. <<Bau klu sisik Arik ka,>> a di, <<bɔbɔk mɔrɔ uyik ne kpaŋ ta anenen yi? 41 Taba ne na ta anenen ne lalɛ mɔr, ai kiyiŋ ndi ta ni nai ayi ne na ta. Ama iner waŋa bene lalɛ ba.>>

42 Fe adi, <<Yesɔ, shum zhi ndi utǝ yir ikɔb ngɔŋ mi.>>

43 Yesɔ atanyeuma te di, <<Mǝna blau lɛ didik, aliŋe uyi bene bɛm ne amkpa ne kur sik ne gbarshu>>

44 Nǝ yi ne tsutsu arik, fe amkpaa akama te buu te ku gɔŋmimi gar zǝ yar Kǝrfe tar kɛ kab arik, 45 ilaŋ arik ne gburkli, mplɛ anklu kɛ Akabaŋkɔŋ ne gbuŋa shur yaa. 46 Yesɔ a lɛk kɔr ne mgbyamgbyaŋ te di, <<Tetɛɛ, ne ŋɔgo mi Mǝne nek izhu muŋ.>> Ndi ne bla me, ivli maa gburkli.

47 Ndi ngɔŋ ne blɛ amkpama ne yik amɛ, fe akɔ gbar Arik asak tedi, <<Ayi lɛ didik iner waŋa ayi tsetser.>> 48 Ndi aneshir bɔbɔk abaŋ ndi ne gar tɔmɔ ne yik kiyiŋ ndi nena, a ŋur asa amen te kama tibɛ. 49 Ankyak bɔbɔk abaŋ ndi ne zhiu, ben amba baŋ ndi ne zeu are Galili, ne klɛ gbagbaŋ, te zen tɔ kiki me.

50 Fe neshir nuŋ waŋa ndi azhɔu te Yusuu, ayi ne min kɛ abɛ te ŋas, ayi neshir didik tena klu sisik Arik, 51 Ba ne mǝne tanyɛmɛ ne lɛ mǝne ba ben kiyi na mǝne. Are ntun iyi Yahudawa ne Arimatiya te azǝn ŋub ikɔb ŋgɔŋ kɛ Arik. 52 Yusuu ne gar ben Bilatus, te ben abɛ nek wa ikum kɛ Yesɔ. 53 Fe a gli kumɔ azime, te nyɛn kɛ ne mplɛ anklu te baŋu azhɔk ne min bɛ ndi ne sub mkpaŋ iyiŋ ndi ba ne zǝn zhɔk nuŋɔ ba. 54 Iber yuŋɔ ai bɛr yi ŋub, ibɛr yi sɔŋ sik ne te gbahir

55 Amba abaŋ ndi ne zǝ Yesɔ are Galili ne zǝ Yusuu te yik ibɛmɛ te yik amkpa waŋ ndi ne zhɔk ikumɔ. 56 Ankyak amba ma ne kama kɔmɔ, te kɔte wɔb wurdi bǝn anyɛ ane kin. Ne sɔŋ asik ne bɛr yi sɔŋ sik te nek ŋgɔŋ ne ilɛ kǝ kpa nyak.