1 Nǝ kpaŋ yuŋɔ Itum Hiridus ne wɔ ru sak kɛ Yesɔ, 2 fe abla agen amaa, <<Waŋa ayi Yɔɔna ne su aneshir; ne ku te kama lu! Waŋa yi kiyiŋ ndi mgbyamgbyaŋ kǝ na kiki yi vuŋ anu iyi ne atɔ maa.>>

3 Ndi Hiridus ne mǝne vuŋ Yɔɔna te kpau te ku ne jaru ne tu ayi Hirudiya, iwa zumen Filibus, 4 te Yɔɔna ne zen blau te di: <<Icɛre bane tanyɛmɛ ba te ubǝ gliu ba.>> 5 Hiridus ne wɔb te wa abɛ ŋun Yɔɔna, ne klu sisik aneshir, te ayigu ayi ine bla shar yi Arik.

6 Nǝ iber yi ŋli Hiridus ne kama nyɛ fe va ayou Hirudiya ne glu te duŋ susun kɛ Hiridus ne nyɛr. 7 Tǝ ne sherim tedi wa atei nugu kiyiŋ ndi atei bene. 8 Iya maa ne shɔgu, tedi, <<Gar di abɛ nugu itu kɛ Yɔɔna ne su aneshir ne agbǝgba.>> 9 Fe susun kɛ Itum ne cɔkla, neka sherim ne ti kɛ abɛ nyɛ gyaŋ maa, ne tanyɛme te abɛ nugu kiyiŋ ndi ne bene 10 te duŋ ate kyaŋ tu kɛ Yɔɔna ne jaru. 11 Ne gliu tu mɔ ne agbǝgba te nyɛ nek vǝvǝn iwa ma, iwa nena ta Gli yaa maa. 12 Abɛ tsene maa na ndum ne nyɛ te baŋ mkpuŋ kpa maa akɔ te ru te kɔmɔ te bla Yesɔ.

13 Ndi Yesɔ ne wɔ me, ne lɔ duŋ amkpama te yir igu te gar amkpa nuŋ. Nak wɔ yiŋɛ ntsan aneshir azeu ne za rɛ ntuntun. 14 Ndi Yesɔ ne yir te yik ntsan aneshir ŋgɔŋ, ne wɔ lɔ susun mǝne te na ba te duŋ ba rɛ.

15 Ndi amgbalu nɛ te, abɛ tsene maa gar bǝn abɔu te di, <<Amkpa waŋa ayi ne kɔnsa, bau duŋ aneshir aŋar akɔmɔ nǝ ntuntun, te amkpa neka te riri. Tǝ abe te lɛb kili ali.>>

16 Yesɔ asaga, <<Bane te tǝ bɛ kɔmɔ ba. Nǝk zhine ba kinuŋ atali.>>

17 <<Adiu tayi ne mwɔ mgbyaŋ borodi me tuŋ bǝn ambɛ me yaa,>> aba sagu ma. 18 Yesɔ adi, <<Glim azhin ne yime.>> 19 Akɔ di aneshire abɛ zǝ sɔŋ ne agǝga shushu. Abaŋ borodi me tuŋ ma tena baŋ ambɛ ayaa ma te lɛk ayi atɔ gbarshu, te nyer Arik te mlik borodi me. Te nek abɛ tsene maa, aba na ta gab aneshire. 20 Aneshire ne li bɔbɔk mǝne te hri te vu mbumbur ndi ne dǝk ge ashak sisa me wur ane yaa. 21 Abaŋ ndi ne li kili me ne yi alulum azhin amɛ tuŋ, bane bla amba ben amumun ba.

22 Andanda Yesɔ akɔ di abɛ tsene maa abɛ yir miŋ igu te kuti aglɔ agar gɔŋ yuŋ, fe ne duŋ ntsan aneshire aŋar baliŋ. 23 Ndi ne duŋ aneshir akɔmɔ, ne yuŋ gar kɛ atugbu Iwa kiki maa te gar ben Arik. Ndi amgbalu ne te, aye amɔ kiki maa, 24 Ndi gumɔ ne yi shaan ne agankubgbu, ankyak ankun amashir akar igu te nguŋgu ŋgɔŋ fuk atu nege.

25 Ndi Kǝrfe tar kɛ bu ne te gbahir Yesɔ a nyɛ bǝn abɛ tsene maa, te atsǝnetsǝn netu amashire. 26 Ndi abɛ tsene maa ne yigu atsǝnetsǝn ne tɔ amashire, fe sisik ku vuŋ ba. <<Ayi anerim,>> adi, te ŋar zhin ne sǝsǝk.

27 Ankyak Yesɔ akɔ diba andanda: <<klik zhin susun! Ayi Nga. Duŋ te zhinbe klu sisik ba.>>

28 <<Ŋgɔŋ, atei wa,>> Biturus asaga, <<ta nyɛmɛ tem nyɛ bene bɔu ne atu amashire.>>

29 <<Nyɛ,>> adi. Fe Biturus aru ne miŋ igu, te tsǝn ne tɔ amashire te gar ben Yesɔ. 30 Ndi ne yik fuk ngungumɔ ite ngɔŋ, ne klu sisik te akɔ zen rim dɔ ne min amashir, te ŋar zhin, <<Ŋgɔŋ, tam zhɔk!>>

31 Andanda Yesɔ anab ŋɔk maa te vuŋu. Adi, <<Uwa ne tanyɛmɛ watsɔb,>> <<Anii duŋu lɛ ne?>>

32 Fe ndi ne yir igu, ŋguŋgumɔ ku te zee. 33 Ankyak abɛ yi ne miŋ igu akɔ zekuru, tedi, <<Ayi zub Uyi Izu Arik.>>

34 Ndi ne ka glɔ agankubgbu, ne zǝ ne ntun iyi Jenisara. 35 Ndi alulum abɛ amkpa yuŋɔ atɔ Yesɔ azhi, akɔ shar azǝ ntuntun. Aneshir bɔbɔk ne gli abɛ lɔ gliu ma 36 te benu te di abɛ duŋ abɛ lɔmɔ bɛ sak ŋɔk ne tɔŋ anklu maa, fe bɔbɔk abaŋ ndi ne sagu ŋɔk ne rɛ.