1 Ndi ne te gbahir ne Urshelima te nyɛ Betafaji ne gbu yi Zetun, Yesɔ ne shar aner ayaa ni min abɛ tsene maa, 2 te di ba, <<kɔmɔ zhin ne ntun yiŋ ndi iyi ne ti min, izhin tei yik ne kpa tatur amɔ, bǝn vǝn maa. Zuk ba gli nyɛmɛ. 3 Iner nuŋ te di zhin kinuŋ, zhin bɛ diu Ŋgɔŋ awɔb ba, atei gli ba aŋyaga azizaŋa.>>

4 Kiyiŋɛ nena amɛ te lɛ kɛ ine bla shar yi Arik bɛ shaga:

5 <<Bla itun yi Sihiyona,

<Tɔ, itum amin anyɛ bǝn abɔu,

Ne zi itu azhɔk te asa tatur,

Akɔ sɔŋ ne tu tatur.>>>

6 Abɛ tsene maa ne gar ate na ndi Yesɔ ne diba 7 Ne gli tatur ben vǝvǝn taturo, te lab nklunklu men ne agɔŋ taturo, Yesɔ ayuŋɔ sɔŋ ne goŋɔ. 8 Ntsan aneshir ngɔŋ ne lab nklunklu men ashur ne ankɔŋ, anuŋ ne mlik anga ilik ashur ne ankɔŋ. 9 Ntsan aneshir aku ti maa bǝn abaŋ ndi a zen gbaru asak tedi,

<<Hosana bǝn Zu Doda!>>

<<Anu adidik ai kɛ waŋ ndi ne nyɛ ne sak kɛ Ŋgɔŋ!>>

<<Hosana ben Arik!>>

10 Ndi Yesɔ ne yir Urshelima, ntuno bɔbɔk ne zhaŋ te rib, <<Ayi ŋɔwa?>>

11 Ntsan aneshir adi, <<Waŋa ayi Yesɔ, ine bla shar yi Arik arɛ Nazara ne Galili.>>

12 Yesɔ ne yir Akabakɔŋ te yar abɛ lɛb kiki agli rumɔ. Ne kam tebur kɛ abɛ sen azɔb aku ne mimi ben mben yi abɛ lɛb angu abɛ kɔb tyak zhɔk. 13 <<Ne cɛr yi Musa,>> a diba, <<<Akabakɔŋ muŋ atei zhɔ kɛ te kɔb kɛ ben Arik,> Fe izhin baŋ kɛ <te bǝ ye ikɔb kɛ abɛ zhib.>>>

14 Abɛ amfik bǝn abɛ ku aza anyɛ bǝn abɔu ne akabakɔŋ, ne duŋ ba arɛ. 15 Fe ndi ngɔŋ ne abɛ na ndum kǝ Arik bǝn abɛ tsar nkanlɛ ne yik kiyiŋ ndi Yesɔ ne nai ndi amumun ne gbaru asak ne gar kɛ akabakɔŋ. <<Hosana ayou Izu Doda,>> Ankyak ate mfu.

16 Aribu. <<Uwɔ kiyiŋ ndi amumun abaŋ adi?>>

<<Mm,>> Yesɔ mtanyeme, <<ba zhin ne zen bla,

<<<Ibaŋ rɛ anu amumun ben asen amumun

Ne duŋ ba agbar asak ka?>>

17 Ankyak a ru ne miŋ ntuno te kɔmɔ ne Batanya, amɔ ne kur o.

18 Amblimblɛ bib ndi Yesɔ ne vuŋ ankɔŋ te sɔŋ akama kɔmɔ ne miŋ ntun, ikasa ne vuŋu. 19 Ne yik itiŋ bwab ne tu ankɔŋ, te gar tiŋe fe bane yik kɛ ne dɔ ba anak ayi amgbavu ankyak. Fe ne nek kɛ anu amimin te di, <<Kǝr bǝ na dɔ mgbyaŋ ba gar klɛtu!>> Ne amkpama tiŋ bwaba iku te klu.

20 Ndi abɛ tsene maa ne yik amɛ, ne vuŋ anu amen. <<Itiŋ bwab nena kikin te ku andanda me?>> Arib.

21 Yesɔ adi, <<Mbla zhin izub, izhin te tanyɛmɛ ne susun amin te ba zhin ne lene ba, zhin tei na kiyiŋ ndi ne naŋ itiŋ bwab, fena izhin te di Igbu yiŋɛ, <Tsǝn, tun tu mi zhɔk ne nek ngɔŋ,> fe itei na yeme. 22 Izhin te tanyɛmɛ, izhin tei ta kɔte nii ndi izhin te rib ne ben.>>

23 Ndi Yesɔ ne yir ŋa kɛ Akabakɔŋ, fe, ndi azǝn tsar, ngɔŋ ne abɛ na ndum kǝ Arik bǝn angɔŋgɔŋ aneshir ne nyɛ bene bɔu. <<Ayi mgbyamgbyaŋ takǝ u na kiki yiŋɛ?>> Arib. <<Fena ayi ŋɔwa ne nǝgu mgbyamgbyaŋ kǝŋe?>>

24 Yesɔ adi, <<Mtei na rib zhin lɛ zhin. Izhin te blam, mte blaa zhin ka yi mgbyamgbyaŋ kɛ ŋɔwa me na kiki yiŋɛ. 25 Isu aneshir Yɔɔna ire me? Ire gbarshu ka rɛ bǝn neshir ni?>>

Alɛ ne akpa mɛn tedi, <<Ta te di, <Ire gbarshu,> ate rib, <Tǝ anii iyar zhin tanyɛmɛ bǝn abɔu?> 26 Fe ta te di, <Ire bǝn aneshir> Ta te sisik aneshir, ne tanyɛmɛ bɔbɔk tedi Yɔɔna ayi ine bla shar yi Arik.>>

27 Ankyak akɔ di Yesɔ, <<Bata ne zhi ba.>>

Fe a di, <<Nga muŋ yi bam tei blaa zhin ka mgbyamgbyaŋ kɛ ŋɔwa me na kiki yiŋɛ.

28 Izhin ne yik kikin? Ner nuŋ ayi ne amumun ayaa. Ne gar bǝn ne kuti me te di, <Izu muŋ, kɔmɔ te na ndum aliŋe ne ahwaŋ.>

29 <<<Bam gar ba,> asagu ma, fe ne sen susun maa te gar.

30 <<Ankyak Tetɛɛ me ne gar bǝn zu maa ne yaa ma te diu ki zhiin yiŋɛ. M tanyɛmɛ, <<M tei gar, ŋgɔŋ,>> ba ne alɔ gar ba.

31 <<Ne min kɛ amumun ayaa abaŋ itawa ne na kiyiŋ ndi tetɛɛ mǝnɛ ne tanyɛmɛ?>>

Adi. <<Nǝ kuti,>> Yesɔ a diba, <<Mbla zhin izub, abɛ ta gendu bǝn abɛ zǝ alulum nten atei kuti a yir kɔb Arik te duŋ zhin. 32 Yɔɔna ne nyɛ te bɛ tsar zhin ankɔŋ ne na iki didik izhin bane tanyɛmɛ bǝn abɔu ba, amɛ abɛ ta gendu bǝn abɛ zǝ alulum anamɛ. Ne me ndi izhin ne yik amɛ, izhin ne kyak duŋ ki mimin min te tanyɛmɛ bǝn abɔu.

33 <<Na wɔ zhin nkanlɛ nuŋ: Ner nuŋ ayi ne ahwaŋ ndi ne shi atiŋ kuŋkun. Ne kam ahwaŋa azik, te ka dudu kɛ bɛr shur ama dɔ nkunkun. Te na me iki kɛ blɛ. Ne baŋ ahwaŋa anǝk anuŋ abɛ na ndum te kɔmɔ ne tsǝn. 34 Ndi mkpaŋ kɛ dɔ nkunkun ne te, ne shar agen amaa ben abɛ na ndum ne ahwaŋa abɛ te kye dɔ nkunkun a Gli iwa ma.

35 <<Abɛ na ndum nǝ ahwaŋ nǝ vuŋ agene; agli te tsugu, te ŋunu, te tyak ne ntara nǝ mkpaŋ. 36 Ne na shar agene anuŋ bene ba, ndi anaŋ abɛ kuti me, fe ne nab ba kiyiŋ ndi ne na abɛ kuti. 37 Nǝ klɛtu bɔbɔk, ne shar izu maa bene ba. <Atai nek izu muŋ ŋgɔŋ,> adi.

38 Fe ndi abɛ na ndum ne ahwaŋ ne yik izu maa, adi akpa mɛn, <Waŋa ayi zu maa. Nyɛ, te tabǝ ŋunu tǝ ta gadu maa.> 39 Fe a baŋu atyak azhɔk ne goŋ abɛmkǝ ahwaŋa te tsǝgu ŋun.

40 <<Ankyak, akiki ne ahwaŋa atei nyɛ, atei na agɛnɛ kikin?>>

41 <<Atei tsǝk aner mimin abaŋa aŋlɔk,>> ne di, <<atei baŋ a ahwaŋ akɔb anuŋ abɛ na ndumo, abaŋ ndi atei nǝgu iki yiŋ ndi iyi maa ne dɔ agbarki nǝ kpaŋ kɛ sɛr ki.>>

42 Yesɔ a di ba, <<ba zhin ne zin tɔ ilɛ kǝ Arik ka:

<<<Mkpaŋ yiŋ ndi abɛ me ne kyagǝ ai yi tei klɛ ne nju ki; Ŋgɔŋ wa ne na mee, fe a ki yi lɛ ne susun ne ayi amɔr>?

43 <<Amɛ mblazhin te ndi ate baŋ kɔb Arik ayar zhin te nek aneshir abaŋ ndi ana ki didik. 44 Waŋ ndi ate zhaku ne mkpaŋ yiŋɛ atei tsik aŋar anzenzaŋ, waŋ ndi mkpaŋa ite zhaku ne tu maa itei mlau te mbumbur.>>

45 Ndi ngɔŋ ne abɛ na ndum kǝ Arik bene bɛ Ferisawa ne wɔ aneshir nkan lelɛ iyi Yesɔ> te zhi te alɛ ne atu amen. 46 Ne wɔb ankɔŋ ane vuŋu, ne te sisik ntsan aneshir adi ayi ine bla shar yi Arik.