1 Yesɔ ne na lɛ ben abɛ zeu ne nkan lelɛ te di: 2 <<Ikɔb kǝ gbarshu yi ndi Itum waŋ ndi ne naa zu maa igyaŋ yi kpa ŋa. 3 Ne shar agene maa abɛ te abla abaŋ ndi wa ne zhɔ ba gyaŋa te abɛ nyɛ, fe ne kyak nyɛmɛ.

4 <<Ne na shar agene anuŋ te di, bla zhin abaŋ ndi ne bla ba gyaŋa te di mne nka sur kili me ŋklɛ: mne nka yak narum ngɔŋgɔŋ, ben alandɔŋ, neka na kiki bɔbɔk aŋyak, nyɛ zhin igyaŋa fe.>

5 <<Fena abaŋ ndi ne bla ba igyaŋa ne kyak nyɛmɛ, nuŋ ne kɔmɔ ne ahwaŋ amaa, nuŋɔ ne gar wɔb azɔb amaa. 6 Nki aneshir ne vuŋ agene, te tsik ba te aŋlɔk ba. 7 Itumɔ ne baŋ afuk. Nǝ shar abɛ kpaakpa maa abɛ gar ate tsik abɛ ŋlɔk aneshir abaŋa ŋun te goŋ ntun mǝne.

8 <<Itu mɔ adi agene amaa, <Ne ka na kiki yi gyaŋa bɔbɔk, abaŋ ndi ne bla ba gyaŋa ne kyak nyɛmɛ. 9 Tsǝn gar zhin nkuŋkɔŋ ne miŋ ntun te zhɔ zhin kɔ te ner tawa ndi zhin te yigu.> 10 Ankyak agene ne kɔmɔ ne miŋ ntun ate bla aneshir abaŋ ndi aba ne yik ba adidik bǝn amimin, fe aneshir ne shak kɔb kɛ gyaŋa.

11 <<Ndi Itumɔ ne nyɛ amkpa ne gyaŋa te wa abɛ nyɛ yik acɛ nɛ, ne yik neshir nuŋ ndi bane su anklu ba. 12 <Ikpa muŋ,> arib, <une na kikin te yir amkpa ne gyaŋ yaŋ su anklu yi gyaŋai?> Inere alɛ lak kana.

13 Fe Itumɔ abla agene, <kpa zhin newu ne ŋɔk bǝn aza te baŋ zhine wu tyak zhɔk ne abɛm, ne amkpa ne amatib bu, ndi azhin te ŋu aŋin.>

14 <<Ne zhɔ aneshir tetɛk, te hria watsɔb.>>

15 Ankyak Ferisawa a kɔmɔ ne abɛm te kpa anu ndi aba tei vuŋu ne lǝlɛ maa. 16 Ne shar abɛ ze ba tsen bǝn abɔu bǝn aner abɛ Hirudiya abɛ gar bǝn Yesɔ te di, <<Ine Tsar>> adi,<< ta ne zhi uyi ner didik una bla zub, una tsar ankɔŋ ayou Arik ndi bau kam lɛ mi sen ba. Bau zǝ ki yiŋ ndi aneshir ablai ne tu mi ba, bau na zǝ lǝlɛ yi aneshir angɔngɔŋ ba. 17 Bla ta, uwa une yik kikin? Ne rɛ tabǝ ya kaisar gendu ma kɔ bɛ duŋ ini?>>

18 Ankyak Yesɔ, ne zhi nnɛ mǝne adi, <<Izhin abɛ kamgli, anii duŋ zhin wɔb me ne zhɔk adɔmɔ? 19 Tsar me zhin azɔb ayi nek gendu.>> Akɔ gli azɔb dinaros agliu ma, 20 Fe arib ba, <<Waŋa ayi izhu yi ŋɔwa? Bǝn cɛr yi ŋɔwa?>>

21 <<Iyi kɛ kaisar>>, asagu ma, <<Nek zhin kaisar iki yiŋ ndi yi Kaisar, te nek zhin Arik ki yiŋ ndi yi Arik.>>

22 Ndi ne wɔ me, ne sak ŋɔk ne ne, te akam atibe.

23 Nǝ bǝn ane Sadukiyawa, abaŋ ndi adi ner te ku ikamlu ba yime ba, ne nyɛ te rib bu. 24 <<Ine tsar,>> adi, <<Musa ne bla ta te di ineshir ate ku iyaŋ vǝvǝn, zumen abɛ baŋ iwa ma wakɔ te ŋlii zumen ne kumɔ vǝvǝn. 25 Amunwa ataŋgba ne ne miŋ mɔr. Nǝ kuti amene ne ta iwa ma te akam aku, yaŋ yik vǝvǝn, izumen ne baŋ iwa ma. 26 Ine ya ben ine ntar ma, gar kɔmɔ ben ne taŋgba amene. 27 Ankyak,iwama maayi, ne ku. 28 Azizaŋ fa, ne ikamlu yi goŋ ku, iwa waŋa ayou ŋɔwa ne miŋ kɛ aneshir ataŋgba baŋa, ndi bɔbɔk mǝne ne tau?

29 Yesɔ adi ba, <<Yaŋ zhi ilɛ kǝ Arik min ben mgbyamgbyaŋ ma duŋ zhin lɛ cɔk.>> 30 Fe ndi abe ku te kamlu ne vli, atei yi ndi abɛ shar ayou Arik ne gbarshu ba tei ta amba kɔ gar ŋa ba; 31 Nǝ atu ayi ku te kamlu ba zhin ne tɔ ki yiŋ ndi Arik ne di zhin ka, 32 <<Nga myi Arik ayou Ibrai, Arik ayou Ishaku, bǝn Arik ayou Yakubu>? Ba yi, Arik ane akum ba ayi Arik ane aner abɛ ku ba ama ayou atsitsir.>>

33 Ndi ntsan aneshir ne wɔ iyiŋɛ, ne sak aŋɔk ne ne ne tsar ma.

34 Ndi Ferisawa ne wɔ Yesɔ ne tsaŋ Sadukiyawa, akɔ biŋ akpa mɛn. 35 Izhin ne miŋ mǝne ndi aine tsar cɛr Musa, awɔb te wa abɛ vuŋ Yesɔ ne lalɛ aribu te di:

36 Arib te di<<Ne Tsar, ilɛ takɛ yi ngɔŋ ne icɛr yi Musa?>> 37 Yesɔ adiu; <<<Duŋ susun mi bɔbɔk, bǝn iri mi, bǝn alambur ami abɛ nak nyer Arik ami.> 38 Waŋa ayi ilɛ ngɔŋ kǝ kpa nyak. 39 Fe ikǝ kpa nyak kǝ yaa ma nayi amɛ: <<Nyer kpami ndi tu mi.> 40 Icɛr yi Musa bǝn abɛ bla shar yi Arik ne zhaŋ asɔŋ ne ilǝlɛ ngɔngɔŋ yaa iyiŋɛ.

41 Ndi Ferisawa ma ne kyu abiŋ, Yesɔ ne rib ba, 42 <<Izhin di te Almasihu ayi ŋɔɔ wa? Ayi zu ŋɔɔ wa?>>

<<Ayi Izu Doda.>> Adi.

43 Ablaa ba tedi, <<Tǝ Doda ne na kikin te lɛ ne Izhu iyi Arik, te zhɔu te <Ŋgɔŋ?> Ne di,

44 <Ŋgɔŋ ne di Ŋgɔŋ amuŋ:

Zǝ sɔŋ ne ŋɔk li muŋ

Gar te mla ne mkpaŋ ndi M tei shur abɛ te zɔr ami

Nǝ mimi yi aza ami.>

45 Ate yi ndi Doda ne azhɔu te <Ŋgɔŋ,> ayi kikin te ana zhɔu te zu Doda?>>

46 Nuŋ ba ne na diu kinuŋ ba, nak vuŋ rɛ bɛr yuŋɔ, ner nuŋ ba ne na rib bu kinuŋ ba.