(Markus 1:1-8; Luka 3:1-18; Ya 1:19-28)

1 Nǝ mkpaŋ yuŋɔ Yɔɔna ne su aneshir ne nyɛ, te du lɛ kɛ Arik ne shu hwaŋ kɛ Yahudiya 2 Tǝ di, <<duŋ nazhin zumimin, te ikɔb kǝ gbarshu ne te gbahir.>> 3 Waŋa ayi wa ndi ne lǝlɛ maa ne anu akɛ ine bla shar yi Arik ndi azhɔu te Ishaya:

<<Ikɔr zǝn zhɔ ne zizik,

<Na zhin Arik Ŋgɔŋ ankɔŋ>,

Nab zhin ne wu ankɔŋɔ.>>>

4 Nkluŋklu yi su Yɔɔna ne nai ne mfumfuk kpa iyi lakurmi, te na yi ne ririk keŋ ndi avuŋ tiŋ ne maa. Kili maa iyi Adagbyaŋ bǝn ntun. 5 Aneshir azǝn zeu gar igar ke Urshelima bǝn ŋa kɛ Yahudiya te yar ntun yi gar ke inek ne juda. 6 Te bla zumimin yiŋ ndi aba na te, akɔ suu ba ne inek ne Juda.

7 Fe ndi ne yik aneshir tetɛk bǝn Ferisawa azǝn nyɛ, bǝn Sadukiyawa ne amkpawaŋ ndi azǝn su aneshir, Yɔɔna akɔ di ba: <<Izhin ane wa amimin! ŋɔwa ne gbaŋ zhin atɔŋ te zhin bǝ klu mfu kɛ Arik? 8 Na zhin ki didik ndi itei tsar sen asusun min. 9 Fe kǝr ubǝ yik te utei lieru ba te di, <Ibrai ayi ntsǝntsǝm ami,> Mbla zhin kɔ ne miŋ kɛ mkpaŋ yiŋɛ Arik Ŋgɔŋ atei ya sɛne te bǝ kam yi Ibrai vǝvǝn. 10 Angen ayime ane tsɛ atiŋ ririŋ nkunkun, fe nkunkun keŋ ndi bate dɔ gbar didik ba, atei tsɔm kɛ atyak azhɔk ne lu.

11 <<Msu zhin ne amashir te zhin bǝ sen asusun amin. Fe iwaŋ ndi anyɛ ne gɔŋ muŋ aklik anaŋ me, akpaza ayi su amaa bam M tei nzugǝ yir ba. atei suu zhin ne Izhu tsetser bǝn lu. 12 Atsǝn ne mumu maa keŋ ndi atei zǝ antutur kpu aglɛ tibɛ te vuu mbyaŋ didige ashur ne wun te goŋ afumfu mɔ ne lu.>>

(Markus 1:9-11; Luka 3:12-22)

13 Ankyak Yesɔ ne rɛ Galili te gara yar nek ne Juda te Yɔɔna abɛ suu. 14 Fena Yɔɔna ne di wa kyak su ma te di, <<Ayi waa utei sum, fe ukam nyɛ bene bɛm?>>

15 Yesɔ asaga, <<Duŋǝ bǝ yemɛ azizaŋa; iye anenen te tabǝ na iki didik yiŋ ndi Arik ne tanyɛmɛ neyi.>> Amɛ Yɔɔna akɔ tanyɛmɛ te suu.

16 Ndi ne su Yesɔ ne miŋ amashir te lɛgu arumɔ, ate naga ruu ne amashir gbarshu ku bu, akɔ yik Izhu yi Arik Ŋgɔŋ ikuti zǝǝ ndi angu te bwak sɔŋu ne mpa. 17 Ikɔr rɛ gbarshu tedi, <<Waŋa ayi Izu muŋ, waŋ ndim me nyeru.>>