2 Nao ol man Filistia oli kamaot, oli kam mekem faet long ol laen blong Isrel, mo oli faet strong tumas, gogo ol man Filistia oli winim olgeta, mo oli kilim samwe long fo taosen man oli ded long ples ya. 3 Taem ol laen blong Isrel ya we oli no ded oli kambak long ol haos tapolen blong olgeta, ol lida blong olgeta oli talem se, "?Olsem wanem ya? ?Hae God i letem ol man ya oli winim yumi tede from wanem? Yumi mas go long Silo, yumi karem Bokis ya we i Saen blong Promes* blong hem i kam, blong hem i stap wetem yumi, i tekemaot yumi long han blong ol enemi ya blong yumi, i sevem yumi." 4 ✝Nao oli sanem sam man oli go long Silo, blong karem Bokis ya i kam. Tufala pris* ya Hofni mo Finehas we tufala i pikinini blong pris ya Ilae, tufala i kam wetem Bokis ya. Bokis ya i saen blong jea blong Hae God we hem i stap sidaon long hem i stap rul. Hae God ya, hem i hae we i hae mo hem i gat olgeta paoa.

5 Taem ol man oli luk Bokis ya i kam kasem ples ya we oli stap long hem, oli glad tumas, nao oli stap singsingaot bigwan, we i mekem ples i muv. 6 Mo taem ol man Filistia oli harem ol noes ya we oli mekem, oli talem se, "!Ei, olgeta! ?Yufala i harem noes ya? !Hemia ol Hibru* ya!* ?Oli stap singsingaot from wanem?" Mo taem oli harem we Bokis ya i kamtru finis long ples ya we ol laen blong Isrel oli stap long hem, 7 oli fraet we i fraet. Oli talem se, "!Wan god i kamtru finis long ples blong olgeta! !Yumi lus nao! !Neva wan samting olsem i kasem yumi bifo! 8 !Ol god ya blong olgeta oli gat paoa ya! ?Hu bambae i save tekemaot yumi long han blong olgeta, i sevem yumi? Hemia ol god ya, we bifo, oli sanem ol bigbigfala trabol i kam kilim ol man Ijip, oli ded long draeples. 9 !Be yumi no mas fraet! !Yumi no woman ya! !Yumi mas stanap strong! Sipos no, bambae oli spolem yumi! Bambae oli mekem yumi kam slef* blong olgeta, olsem we bifo, yumi mekem olgeta oli kam slef blong yumi. !Yumi man ya! !Naoia yumi mas faet!"

10 Ale, oli go mekem faet bakegen, nao oli strong tumas, oli winim ol laen blong Isrel, oli ronem olgeta, oli kilim toti taosen soldia blong olgeta oli ded, mo ol narafala oli ronwe wanwan blong gohom. 11 Long faet ya, Hofni mo Finehas, tufala pikinini blong Ilae, tufala i ded, mo Bokis ya we i Saen blong Promes blong Hae God, ol man Filistia oli karem i go long ples blong olgeta.