1 Nao biaen i no longtaem, ol soldia blong ol man Moab mo ol soldia blong ol man Amon wetem ol soldia blong ol man Mehun* we oli fren blong olgeta, oli kam blong mekem faet long King Jehosafat wetem ol man blong hem. 2 Nao sam man blong karem tok oli kam talemaot long king se, "King. I gat plante soldia oli aot long Edom oli stap kam, oli pas narasaed long Ded* Si long is, oli stap kam blong mekem faet long yu. Oli winim taon ya Hajajontama finis, oli holem i blong olgeta."

(Nem ya Hajajontama, hem i narafala nem blong taon ya Enkedi.) 3 Nao taem king i harem nius ya, hem i fraet tumas, mo i prea long Hae God blong i soemaot rod long hem. Nao hem i sanem tok i go long ol man Juda,* se oli mas livim kakae blong oli prea. 4 Nao ol man oli aot long evri taon long Juda, oli kam long Jerusalem* blong prea long Hae God, blong i soemaot rod long olgeta. 5 Mo olgeta ya wetem ol man Jerusalem oli kam wanples long niufala yad blong haos* blong Hae God. Mo king i go stanap long fes blong olgeta, 6 nao i prea se, "Hae God. Yu yu God blong ol bubu blong mifala. Yu yu stap long heven mo yu stap rul long olgeta kantri long wol ya. Yu yu strong tumas, yu gat olgeta paoa, mo i no gat man i save girap, i agens long yu. 7 ✝Yu yu God blong mifala. Ol bubu blong mifala bifo oli laen* blong Isrel* ya we bubu blong hem Ebraham, we i fren blong yu. Mo taem olgeta oli kam long kantri ya, yu yu ronemaot ol man we oli stap long ples ya fastaem, nao yu givim kantri ya long olgeta blong oli stap long hem oltaem. 8 Olgeta we oli stap kamaot biaen long olgeta oli stap holem kantri ya kam kasem tede, mo sam long olgeta oli bin wokem haos ya blong yu blong ona long yu. 9 Olgeta ya oli save se sipos trabol i kam long olgeta blong panisim olgeta, oli save kam stanap long fran blong haos ya we i ples blong mekem wosip long yu, oli save prea long yu. Nating we bigfala faet i kam, no wan strong sik i kam spolem olgeta, no i gat hadtaem blong kasem kakae, be oli save kam prea long yu from trabol ya, mo yu yu save harem olgeta, mo yu save sevem olgeta.

10 ✝"Naoia ol man Amon wetem ol man Moab mo ol man Edom oli kam blong mekem faet long mifala. Be bifo, taem ol bubu ya blong mifala oli aot long Ijip oli kam, yu no letem olgeta i pas long graon blong ol man ya, oli pasraon long ol ples ya, mo oli no spolem wan long olgeta nating. 11 Ol bubu ya blong mifala oli mekem i gud long olgeta, be naoia olgeta oli kam blong ronemaot mifala i gowe long graon ya we yu yu givim long mifala. 12 !Yu yu God blong mifala! Plis yu panisim olgeta, from we mifala i no naf nating long fes blong olgeta ya we oli stap kam blong mekem faet long mifala. Mifala i no save se bambae mifala i mekem olsem wanem, be mifala i stap luk long yu blong yu halpem mifala."

13 Long taem ya, olgeta man Juda wetem ol woman mo ol pikinini blong olgeta oli stap stanap long fran blong haos blong Hae God. 14 Nao Spirit blong Hae God i kam long wan Livaet* we i stap wetem olgeta, i givim paoa long hem. Man ya, nem blong hem Jahasiel, mo papa blong hem Sekaraea. Stori blong ol bubu blong hem i olsem. Sekaraea, papa blong hem Benaea, mo Benaea, papa blong hem Jehiel, mo Jehiel, papa blong hem Matania, mo Matania, papa blong hem Asaf, mo Asaf i laen blong Livae.*

15 ✝Nao Jahasiel i talem se, "King. Mo yumi ol man Jerusalem, mo yumi ol narafala man Juda. Hae God i talem se yumi no mas letem tingting blong yumi i foldaon, mo yumi no mas fraet blong go faet long olgeta ya we oli plante we plante. Faet ya, ansa blong hem i no stap long yumi, i stap long God. 16 Tumora bambae yumi wokbaot blong go mekem faet long olgeta. Bambae olgeta oli folem rod ya we i pastru long ol hil long ples ya Sis, mo bambae yumi save faenem olgeta taem oli kam antap long en blong krik, long ples ya saed i kam we rod i kamtru long bigfala draeples ya klosap long Jeruel. 17 ✝Bambae yumi no go mekem faet long olgeta, yumi stap stanap rere nomo, yumi wet. Bambae yumi luk we Hae God i mekem yumi win. !Olgeta! !Yumi no fraet! !Yumi go fesem olgeta! !Hae God bambae i stap wetem yumi!"

18 Nao king i bodaon we fes blong hem i kasem graon, mo olgeta man oli bodaon wetem hem blong mekem wosip long Hae God. 19 Nao sam long olgeta we oli Livaet, oli stanap, oli singaot bigwan, oli presem Hae God. Long olgeta ya i gat ol laen blong Kora, mo ol laen blong Kohat.

20,21 Nao long nekis dei, long eli moning, taem ol soldia oli rere blong go, king i givim tok long olgeta, i talem se, "!Ol man blong mi! !Hae God i God blong yumi! Yumi mas trastem hem, nao bambae yumi save stanap strong. Yumi mas bilif long tok ya we ol profet blong hem oli talem, nao bambae yumi save win." Nao taem hem i talem tok ya finis, hem i talem long ol man blong singsing blong oli putum ol spesel klos blong olgeta we oli stap putum blong mekem wosip, nao oli wokbaot i go fastaem long olgeta. Nao olgeta oli aot, oli go long draeples longwe, klosap long Tekoa, mo ol man ya blong singsing oli stap singsing se,

"Yumi talem tangkiu long Hae God.

Oltaem bambae hem i lavem yumi,

gogo i no save finis."

22 Nao taem oli stat blong singsing, Hae God i mekem ol enemi blong olgeta oli fraet tumas, nao oli lusum hed. 23 Nao ol soldia blong Amon wetem ol soldia blong Moab oli girap, oli go mekem faet long ol soldia blong Edom we oli kilim olgeta evriwan i ded, nao ol soldia blong tufala kampani ya oli stap faet long olgeta bakegen we oli stap kilkilim olgeta. 24 Nao taem ol soldia ya blong Juda oli go kasem wan wajhaos* we i stap long draeples ya, mo oli lukluk i godaon long ol enemi ya blong olgeta, oli luk we olgeta evriwan oli ded finis, oli stap slip olbaot long graon, we i no gat wan long olgeta i ronwe.

25 Nao taem king wetem ol soldia blong hem oli go blong karemaot olting blong olgeta ya, oli luk we oli gat plante buluk i stap, wetem plante samting blong faet, mo plante klos mo plante narafala samting we praes blong olgeta i antap.* blong faet, mo plante klos mo plante narafala samting we praes blong olgeta i antap. Nao oli stap tri dei long ples ya blong putumgud ol samting ya wanples, be oli no karem evri samting i kam, from we i plante tumas. 26 Nao long namba fo dei blong hem, oli go wanples long bigfala levelples ya Beraka, nao oli stap presem Hae God from ol samting we hem i mekem. From samting ya nao, kam kasem tede, oli stap kolem ples ya se "Beraka", we i min se "Presem". 27 Nao king i lidim ol soldia blong hem i gobak long Jerusalem we oli glad tumas from we Hae God i winim ol enemi blong olgeta. 28 Mo taem oli kam insaed long taon ya, ol man blong singsing oli stap kilim gita mo oli stap blu long trampet, nao olgeta evriwan oli maj i go long haos blong Hae God. 29 Nao taem ol man blong ol narafala kantri oli harem we Hae God i winim ol enemi ya blong ol man blong hem, olgeta oli fraet tumas. 30 Nao Hae God i mekem King Jehosafat i stap gud nomo, we i gat pis long olgeta ples.

31 Taem King Jehosafat i kam king blong Juda,* hem i gat toti faef yia, mo hem i stap rul twanti faef yia long kantri ya, we hedkwota blong hem i stap long Jerusalem.* Mama blong hem, nem blong hem Asuba, we i dota blong Silihi. 32 King ya i stap mekem ol samting we i stret nomo long fes blong Hae God, olsem we papa blong hem King Asa i bin mekem bifo, 33 be hem i no brebrekemdaon ol ples ya blong mekem wosip long ol narafala god. Nao from samting ya, nating we Hae God i God blong ol bubu blong olgeta, be olgeta oli no obei long hem long olgeta tingting blong olgeta.

34 Ol narafala samting we hem i mekem, i stat long stat blong rul blong hem i kam kasem en blong hem, oli raetemdaon long buk ya we nem blong hem Ol Stori blong Jehu, we papa blong hem Hanani, we hem i haf blong buk ya we nem blong hem Ol Stori blong ol King blong Isrel.

35 Nao King Ahasia blong Isrel* i stap mekem plante samting we i nogud we i nogud, mo wan taem, King Jehosafat ya i go mekem fren wetem hem. 36 Nao tufala i stat wokem ol sip blong tufala long ples ya Ejionkeba. 37 Be Profet Eliesa, man Maresa we papa blong hem Dodavahu, hem i go tok long hem from samting ya blong wonem hem. Hem i talem se, "Yu yu stap mekem fren wetem King Ahasia, be from samting ya, Hae God bambae i spolem ol sip ya we yutufala i stap wokem." Nao ol sip ya oli brok long ples ya, we oli no ron nating.